Read dhopadhola 1 Kigana kwoŋ Kerin 29 Bible Online

1 Kigana kwoŋ Kerin 29 - dhopadhola bible

1 Kigana kwoŋ Kerin 29

¹Kere Daudi owaco ri ji je ni, “Wodan Solomon ama Were otieko yero, to go fodi thin aka ongoye gi ŋeyo ma tic. Tic m'iripo timo dwoŋ, kwoŋbedo me k'obedo peco pa ji to Ot pa Rwoth Were.

²Ameno gi mindin paran atieko yiko gigipiny ma geto Ot pa Were; zahabu, feza, ywel, nyweny, mbawo kodi telin ma mitere.

³Aka kiri, medo i wi meno, atieko miyo feza gi zahabu wok i lim paran ro mar paran ri Ot pa Were.

⁴Atieko miyo tan ma kalo 100 ma zahabu macil kodi feza manyalo romo tan 240 makicin kor Ot pa Were

⁵kodi yiko gigipiny ma jondijo jolayiko. Onyo ŋa man ma lamiyo gi mito pere mic ri Rwoth?”

⁶Kenyo jotel nonin, jodhum ma nonin, jomituka jolweny, kodi jodhum ma gigipiny pa kere jomiyere miyo

⁷gigipiny me ri tic ma Ot pa Were: Zahabu ma kalo tan 170 feza ma kalo tan 340 ywel manyalo romo tan 620 kodi nyweny ma kalo tan 3,400.

⁸Jono m'oyido jonitie gi telin ma welo jomiyo i kakan pesa ma Ot pa Were, m'oyido dhumere gi Yehiel Jalevi ma wok Gerisom.

⁹Kenyo ji jofore kwoŋbedo oyido jomiyo Rwoth gigipiny kweth gi miyirok aka gi cuny gin acel. Kere Daudi bende osiemere swa.

¹⁰Kenyo won ruwaŋ cokirok pa ji Kere Daudi opako Rwoth. Owaco ni, “Rwoth Were pa kwari wan Yakobo wopak cil gi cil.

¹¹Aperin, awi Rwoth, obedo dwoŋo, meni, dwoŋ, loyo kodi dhum; kole gigipiny ma i polo kodi ma i piny obedo aperin; ibedo Kere, awi Rwoth, aka jadhum madwoŋ loyo kwoŋ gigipiny je.

¹²Ŋaŋo je kodi lim wok bongin, aka idhumo je. Meni kodi teko nitie i cingin; aka inyalo loko dhano mogo je madwoŋ aka matek.

¹³Onyo, Were mawan, wafoyin, aka wapako nyingin ma didwoŋ.”

¹⁴“Kucel an kodi ji paran wakinyalo miyin gimoro, kwoŋbedo gigipiny je jobedo mic ma wok bongin, aka wadwoko rin nyaka gim'obedo aperin.

¹⁵Iŋeyo Rwoth, nike waluwo i kwo paka jopath kodi jokicar, paka kwarere mawan jotimo. Ndelo i piny cale tipo, aka wangoye gi geno.

¹⁶Awi Rwoth Were mawan, gigipiny ma gibe me je ma wamiyo ma geto rin ot ri nyingin maleŋ wok i cingin aka obedo aperin won.

¹⁷Aŋeyo, Were paran, nike idwaro cuny dhano, aka iwinjo maber gi ji ma jotimo gim'otire. I tirok ma cunyan amiyo gigipiny me gi miyirok, aka onyo aneno ji perin, ma jonitie ka jomiyin mic gi miyirok kodi kisangala.

¹⁸Awi Rwoth, Were pa Abraham, Isaka kodi Yakobo, kwarere mawan, kur cil gi cil nger atoŋa kodi paro no i cuny ji perin, aka weyi jowobedi jor'adieri rin.

¹⁹Miy wodan Solomon wokur cik perin je gi cunye acel aka wogeti Ot pa Were m'atieko yiko gigipiny mere.”

²⁰Kenyo Daudi omiyo ji je cik ni, “Pak win Rwoth Were mewin!” Aka cokirok pa ji je jopako Rwoth, Were pa kwarere pajo, aka jokule piny bwonirok ri Rwoth kodi kere pajo.

²¹Ndelo ma yawere jomiyo cowirok mar'ogwaŋe to jowaŋo mic ri Rwoth, aka jomiyo ji camo. Jothumo thwondhe 1,000 wot rombo 1,000 kodi nyithindhi rombo 1,000 ma jowaŋo paka cowirok ma gikululu i wi migam. Jokelo mic ma vini bende.

²²Ameno ndelo no josangala swa paka jocemo to jomedho ruwaŋ Rwoth. Owir Solomon gi mo madirio paka kere. I nyingi Rwoth owir go paka jadhum pajo kodi Zadok paka jacway ri Were i wi migam.

²³Ameno Solomon olunjo bamere Daudi i kom ma dhum ma Rwoth oyido oketho. Go oyindira aka piny Isiraili gipi owinjo go.

²⁴Jodhum je kodi jolweny, kiri gi wot Daudi man je jociko woro Solomon paka kere.

²⁵Rwoth omiyo piny Isiraili gipi lworo Solomon, aka omiyo go dwoŋ ma kere man fodi k'obedo gine i Isiraili.

²⁶Daudi wod pa Yese odhumo Isiraili

²⁷ma oro piero aŋwen. Odhumo i Hebron ma oro abirio aka i Yerusalem ma oro piero adek g'adek.

²⁸Otho i oro ma tiyo, aka oyido oŋaŋ m'iworo; aka wode Solomon olunjo go paka kere.

²⁹Onyo tim pa Kere Daudi wok i cako kiri i gike ondiki i ndiko ma mako kwoŋ jotuci wac Were adek; Samwiri, Nathan kodi Gad.

³⁰Ndiko me waco nger ma go odhum'iye, meni pere, kodi gigipiny je m'otimere rigo, ri Isiraili kodi ker m'othoko.