Read dhopadhola 2 Kigana kwoŋ Kerin 1 Bible Online

2 Kigana kwoŋ Kerin 1 - dhopadhola bible

2 Kigana kwoŋ Kerin 1

¹Solomon wod pa Daudi oridho ker pere matek, aka Rwoth Were pere oyido nitie gi go aka omiyo go silwany to loko go jameni.

²Solomon olwoŋo Joisiraili je, jomituka ma ganin kodi miya acel, jothum banja, jotel pa Joisiraili je kodi jotel ma pecin.

³Aka Solomon, kodi cokirok ma ji no je jokidho i kabedo ma malo m'oyido nitie i Gibeon, kole Wema ma romo pa Were, ma Musa ŋeca pa Rwoth oyido otimo i thim, oyido nitie kenyo.

⁴To Daudi oyido otieko kelo Kakan ma Cikirok pa Were wok i Kiriath Yerim i kabedo mere m'oyido Daudi otieko yiko, kole go oyido otieko jengo wema mere i Yerusalem.

⁵Aka kiri migam ma nyweny ma Bezalel wod pa Uri, nyakwar Hur, oyido otimo, oyido nitie kenyo ruwaŋ Wema Maleŋ.

⁶Solomon oidho malo kenyo i wi migam ma nyweny ruwaŋ Rwoth, m'oyido nitie i Wema ma romo, to miyo cowirok mar'ogwaŋe gana acel.

⁷Wor no won Were omenyere ri Solomon, to waco rigo ni: “Kway gim'imito ni amiyin.”

⁸Solomon owaco ri Were ni, “Itieko nyutho mar madwoŋ makiwire ri baba Daudi, aka ilokan kere m'olunjo go.

⁹Awi Rwoth Were, weyi cikirok m'itimo gi baba Daudi wotundi i gike pama, kole iŋat'ilokan kere pa ji mathoth paka fukefuke ma piny.

¹⁰Pama onyo miyan rieko kodi ŋeyo ma dhumo ji me, kole in won inyalo dhumo ji perin me, ma jothoth ama!”

¹¹Were odwoko Solomon ni: “Paka gime oyido nitie i cunyin, aka ikikwayo lim kosa dwoŋ, kosa kwo pa jokwor perin, aka ikikwayo kiri kwo mabor, to itieko kwayo rieko kodi ŋeyo ri kwo perin ŋey inyal dhumo ji paran m'atieko lokin kere rijo,

¹²rieko kodi ŋeyo amiyin. Amiyin bende ŋaŋo, lim perin, kodi dwoŋ, ma kerin je ma jopen bedo rin, aka ongoye man m'obedi gine paka in kendo.”

¹³Ameno Solomon obino wok i kabedo ma malo i Gibeon, wok i Wema ma romo, i Yerusalem. Aka odhumo Isiraili paka rom.

¹⁴Solomon ocoko kanyacel cawilin kodi kayinin; go oyido nitie gi cawilin 1,400 kodi kayinin 12,000. Megi okano i Yerusalem, aka m'odoŋ oketho jo i tindin madongo man.

¹⁵I ndir ma dhum pa Solomon feza oyido nitie kisi kamoro paka telin i Yerusalem, aka yen sida oyido omore paka musikamol.

¹⁶Aka kayinin ma jodonjo i piny pa Solomon oyido jowok i Misir kodi Kuwe, aka jomitan pere oyido jojolo jo wok Kuwe i welo m'oŋeyere.

¹⁷Oyido jo kelo cawila wok i Misir i welo ma feza 600 kodi kayinin i welo ma feza 150 aka jomitan pa Solomon oyido jotero kitana ri kerin pa Johiti kodi kerin ma Siria.