Read dhopadhola 2 Kigana kwoŋ Kerin 10 Bible Online

2 Kigana kwoŋ Kerin 10 - dhopadhola bible

2 Kigana kwoŋ Kerin 10

¹Rehobowam okadho i Sekem, kole Joisiraili je oyido jobino kenyo ketho go kere.

²Munyo Yerobowam wod pa Nebat owinjo (oyido go fodi nitie i Misir, kama go oyido oringo iye kwoŋ kere Solomon), odwoko wok i Misir.

³Jo nonin ma yumalo jooro wolwoŋi Yerobowam, aka jokidho gi go bongi Rehobowam to jowaco rigo ni,

⁴“Benin Solomon ojengo bieto mapek kwoŋ wan. K'inoloki bieto me masew t'iloko kwo mayot riwan, walatic rin.”

⁵Rehobowam odwoko jo ni, “Dwoki win ka ndelo adek orumo, alamiyo win radwok.” Ameno to jokadho.

⁶Kenyo Kere Rehobowam openjo jodongo m'oyido jotiyo paka jomic rieko pa Solomon ni, “Wimiyan rieko aŋo ma dwoko ji me?”

⁷Aka jodwoko go ni, “K'ibedo gi wor ri jome t'isangala jo, luw gi jo wac maber, aka jolatic rin noknok gi wor.”

⁸To Rehobowam okwero rieko pa jodongo ma jomiyo go, to kadho bongi yac ma jobedo muworo pere, aka m'oyido onyo jobedo jomic rieko pere.

⁹Openjo jo ni, “Wimiyan rieko timo aŋo? Aŋo m'adwoki ji ma jokwayan loko bieto pajo masew?”

¹⁰Jodwoko go ni, “Me a gim'iripo waco rijo ni, ‘Cingan manyako dinywol loyo pier baba!

¹¹Baba oketho bieto mapek kwoŋ win, to alaloko mapek loyo. Go ocwado win g'adasa to alacwado win gi luth kayina!’”

¹²Ameno Yerobowam gi ji je jobino bongi Rehobowam i ndelo mar'adek, paka kere Rehobowam oyido owaco rijo.

¹³Kere oweyo rieko ma jodongo jomiyo go aka oluwo gi jo gi gero

¹⁴paka yac jomiyo go rieko. Go owaco ni, “Baba oketho bieto mapek kwoŋ win, to alaloko jo mapek loyo. Baba ocwado win g'adasa, to alacwado win gi luth kayina!”

¹⁵Ameno kere k'owinjo ji; kole oyido obedo mito pa Rwoth kelo gima go oyido owaco wotundi i kare ri Yerobowam wod pa Nebat luwo bongi jatuci wac Were Ahija ma wok Silo. Meno am'omiyo kere k'owinjo ji.

¹⁶Aka munyo ji je joneno nike kere k'owinjo jo, jodwoko kere ni, “Adec aŋo ma wanitie gine i Daudi? Wangoye gi gir'alunja i wod pa Yese. Joisiraili wadok win peco! Weyi Rehobowam won wokure!” Ameno ji jodok i wema pajo,

¹⁷aka joweyo Rehobowam paka kere pa ji m'oyido jobedo iy'adec ma Yuda kende.

¹⁸Kenyo kere Rehobowam ooro Adoniram, m'oyido telo jotic gi mbaka, kadho bongi Joisiraili, to jogoyo go gi telin to tho. Aka kere Rehobowam oidho cawila pere to ringo i Yerusalem.

¹⁹Wok i hongo no kiri konon me, ji ma yumalo ma ker ma Isiraili jobedo kanyo jolwenyo gi ker pa Daudi.