Read dhopadhola 2 Kigana kwoŋ Kerin 11 Bible Online

2 Kigana kwoŋ Kerin 11 - dhopadhola bible

2 Kigana kwoŋ Kerin 11

¹Munyo Rehobowam otundo i Yerusalem, olwoŋo kanyacel jolweny ma jober loyo wok i nono pa Yuda gi Benyamin ma romo 180,000. Go oyido mito lweny ŋey wodwoki dhum pere kwoŋ nonin ma yumalo Isiraili.

²To Rwoth waco ri Semaya jatuci wac Were ni,

³“Waci ri Rehobowam, wod pa Solomon, gi jonono pa Yuda kodi jonono pa Benyamin, kodi ji je ni,

⁴‘Wikiri wimonji wutmin win won, Isiraili. Dok win peco wijoje. Gim'otimere obedo mito paran.’” Joje jowinjo cik pa Rwoth aka jok'olwenyo gi Yerobowam.

⁵Rehobowam odoŋ i Yerusalem aka ogeto cel i tindin madongo ma Yuda kodi Benyamin:

⁶Ogeto Bethelehem, Etam, Tekowa,

⁷Bethzur, Soko, Adulam,

⁸Gath, Maresa, Zif,

⁹Adorayim, Lakis, Azeka,

¹⁰Zora, Ayijalon kodi Hebron.

¹¹Otimo cel matek, to ketho jomituka ri je, aka i kisi acel oketho kakano cemo, mo kodi vini.

¹²Rehobowam bende oketho kwote kodi tonge malac i tindin je to loko jo matek swa. Ameno Yuda kodi Benyamin jobedo i dhum pere.

¹³Jocway ri Were i wi migam kodi Jolevi m'oyido jonitie i ker ma yumalo ma Isiraili jomiyo Rehobowam kony pajo.

¹⁴Jolevi joweyo lowo kodi lim pajo to jodok i Yuda gi Yerusalem, kwoŋbedo kere Yerobowam ma Isiraili kodi wote jok'oyeyo jo tic paka jocway ri Were i wi migam pa Rwoth.

¹⁵Yerobowam oyero jocway ri were i wi migam pere won tiyo i kalamo manyakafir ma lamo jwogere kodi cal m'otimo i cal pa rwath dhok.

¹⁶To, jono je m'oyido joketho cuny jo i lamo Rwoth Were pa Isiraili wok i nonin je ma Isiraili joluwo jocway ri Were i wi migam kodi Jolevi kadho i Yerusalem miyo Rwoth Were pa kwarere pajo cowirok.

¹⁷Gime oloko ker ma Yuda matek, aka ma oro adek jothielo Rehobowam wod pa Solomon, kole ma oro adek jobedo paka i hongo ma dhum pa Daudi kodi Solomon.

¹⁸Rehobowam onywomo Mahalath, nyar Yerimoth wod pa Daudi, ma min oyido obedo Abihayili nyar Eliab nyakwar Yese.

¹⁹Jonywolo wot jo adek: Yeus, Semaria kodi Zaham.

²⁰Rumacen go onywomo Maka, nyar Absalom, aka jonywolo nyithindho aŋwen: Abija, Atay, Ziza kodi Selomith.

²¹Kanyacel, Rehobowam obedo gi mon 18 kodi mon ma thenge piero aucel, to nywolo wote piero ario g'aboro kodi nyir piero aucel. Rehobowam oyido omito Maka loyo,

²²ameno oyero Abija okayo pa Maka kwoŋ nyithindho pere je, lunjo go paka kere.

²³Rehobowam opoko wote tic gi rieko to ketho jo iy'adec je ma Yuda kodi Benyamin i tindin madongo m'otinda. Omiyo jo gima jomito je to nywomo rijo mon kweth.