Read dhopadhola 2 Kigana kwoŋ Kerin 12 Bible Online

2 Kigana kwoŋ Kerin 12 - dhopadhola bible

2 Kigana kwoŋ Kerin 12

¹Tekin Rehobowam loko dhum pere m'ocwiny paka kere, go kodi ji jojwango cik pa Rwoth.

²I oro mar'abic ma dhum pa Rehobowam, kwoŋbedo oyido jokitim adieri ri Rwoth, Sisak kere ma Misir obino to monjo Yerusalem,

³gi jolweny cawilin 1,200 kodi cwo 60,000 ma jogweyo kayinin. Jolweny ma kikwanere jobino gi Sisak wok i Misir, Libia, Sukim kodi Ethopiya.

⁴Sisak omako tindin madongo m'otinda ma Yuda aka obino tundo kiri Yerusalem.

⁵Kenyo Semaya jatuci wac were obino bongi Rehobowam kodi jodhum ma Yuda, m'oyido jocokere i Yerusalem kwalok kwoŋ Sisak, aka owaco rijo ni, “Me apaka Rwoth waco, ‘Wijwangan, ameno nyo atieko jwango win i cingi Sisak.’ ”

⁶Kenyo jodhum ma Isiraili kodi kere jomwole to jowaco ni, “Rwoth otire.”

⁷Munyo Rwoth oneno nike jomwole, wac pa Rwoth obino kendo ri Semaya ni, “Jotieko mwole; aka ak'orey woko jo, to alabotho mogo kwoŋ jo, aka akilakonjo keme paran kwoŋ Yerusalem gi cingi Sisak.

⁸Kad'ameno jobino bedo ŋecin pere, ŋey jowonyal ŋeyo rapok i dier tiyo ran kodi tiyo ri jodhum ma piny.”

⁹Ameno Sisak kere ma Misir obino to monjo Yerusalem; okwanyo lim je ma Ot pa Were kodi ŋaŋo ma ot pa kere; to kwanyo kisi gimoro. Go bende okwanyo kwote ma zahabu ma Solomon oyido otimo;

¹⁰aka kere Rehobowam otimo kwote man gi ywel culo waŋ m'oyido otim gi zahabu aka omiyo jotel pa jokur ma waŋkac pa kere kuro.

¹¹Aka noknok ka kere okidho i Ot pa Rwoth, jakur oyido bino to tiŋo kwote, aka rumacen dwoko i kisika m'ikan'iye.

¹²To kwoŋbedo Rehobowam omwole, Rwoth k'oreyo jo woko kicutho i keme pere; aka gigipiny okadho maber ri Yuda.

¹³Ameno Rehobowam odhumo i Yerusalem to medo dwoŋ pere paka kere. Go oyido jaoro piero aŋwen g'acel munyo cako dhum, aka odhumo ma oro apar g'abirio i Yerusalem, tindi madwoŋ ma Rwoth oyido oyero kwoŋ nonin je ma Isiraili paka kabedo m'iripo lam'iye go. Yok Rehobowam oyido ilwoŋo ni Nama ma wok i Amon.

¹⁴Rehobowam otimo gimarac, kole go k'oketho cunye i rango mito pa Rwoth.

¹⁵Onyo tim pa Rehobowam, wok i cakirok tundo i gike ondiki i Kigana pa Semaya kodi Ido jotuci wac Were. Lweny obedo ma kicoki i dier Rehobowam kodi Yerobowam.

¹⁶Rehobowam otho aka oyiki go kam'oyik'iye bacere pere i tindi madwoŋ pa Daudi; aka wode m'ilwoŋo ni Abija olunjo go paka kere.