Read dhopadhola 2 Kigana kwoŋ Kerin 13 Bible Online

2 Kigana kwoŋ Kerin 13 - dhopadhola bible

2 Kigana kwoŋ Kerin 13

¹I oro mar'apar g'aboro ma dhum pa Yerobowam, Abija obedo kere i Yuda,

²aka odhumo ma oro adek i Yerusalem. Yokimere oyido ilwoŋo ni Mikaya nyar Uriel ma wok i tindi madwoŋ Gibeya. Onyo lweny otur i dier Abija kodi Yerobowam

³Abija oyido nitie gi jolweny 400,000 aka Yerobowam oyido nitie gi jolweny 800,000.

⁴Kenyo Abija ocungo malo wi got Zemarayim manitie i piny matendere Efrayim to waco ni, “Winjan win, awi Yerobowam kodi Joisiraili je!

⁵Wikuya nike Rwoth Were pa Isiraili otimo cikirok makiwire gi Daudi, ka miyo go kodi nyikwaye dhumo Isiraili cil gi cil?

⁶Kucel Yerobowam wod pa Nebat, ŋeca pa Solomon wod pa Daudi, oay to gwenyere kwoŋ kere pere,

⁷kodi ji ma bukony jocokere bonge to jokwero Rehobowam wod pa Solomon, munyo Rehobowam fodi thin aka okuya gir'atima aka k'onyalo juko jo.”

⁸“Aka onyo pama iparo nike inyalo juko ker ma Rwoth oketho cingi nyikway Daudi, kwoŋbedo widit swa aka winitie gi rwath dhok ma zahabu ma Yerobowam otimo riwin paka werin.

⁹Wiriemo woko jocway ri Were i wi migam pa Rwoth, nyikway Aron, kodi Jolevi, to wiketho jocway ri Were i wi migam mewin paka ji ma piny man jotimo? Kisi nyatoro ma bino gi rwath kosa wot rombo abirio bedo jacway ri Were i wi migam ri werin moro no.”

¹⁰“To paka riwan, Rwoth obedo Were mawan, aka fodi wakijwango go. Wanitie gi jocway ri Were i wi migam ma jotiyo ri Rwoth ma jobedo nyikway Aron, kodi Jolevi ma jokonyo jo.

¹¹Jomiyo Rwoth kisi odikin g'othieno cowirok awaŋa kodi buban maŋwe kur, joketho mic ma mugat i wi meza zahabu macil, aka kisi othieno jocwinyo talin i wi raŋaw ma zahabu. Kole watiyo ri Rwoth Were mawan, to win wijwango go.

¹²Neni win, Were nitie gi wan paka jatel mawan, aka jocway ri Were i wi migam pere jotiŋo gwarin pajo, aka jotieko yikirok kudho ma lwoŋo wan lweny gi win. Awi Isiraili, wikiri wilweny gi Rwoth, Were pa kwarere mewin; kole wikinyal loyo.”

¹³Yerobowam oyido otieko dhiro jolweny pere moro kwinyo jolweny ma Yuda iy'apondi k'onyo jowok gi yucen, kareno jom'odoŋ jonitie yuwaŋ jo.

¹⁴Aka munyo jolweny ma Yuda joneno kor gi korin, neni, jolweny oyido jonitie yuwaŋ jo kodi yucen, aka joywak ri Rwoth, to jocway ri Were i wi migam jokudho gwarin.

¹⁵Kenyo jolweny ma Yuda jotiŋo dwondi gin to johola koko ma lweny. Aka munyo cwo ma Yuda johola, Were okengila Yerobowam kodi Joisiraili je kareno Abija ama telo jolweny ma Yuda.

¹⁶Joisiraili joŋweco kwoŋ Joyuda, aka Were omiyo Joyuda loyo jo gi meni.

¹⁷Abija kodi ji pere joneko Joisiraili ma kiwacere; to jotho cwo ma romo 500,000 m'odim.

¹⁸Ameno onyali woko Joisiraili i hongo no aka ji ma Yuda jokengila jo, rupiri jokanya Rwoth, Were pa kwarere pajo.

¹⁹Abija oriemo Yerobowam, to mayo go tindin madongo, Bethel kodi calin mere, Yesana gi calin mere, kodi Efron gi calin mere.

²⁰Yerobowam k'olimo meni kendo i hongo ma dhum pa Abija, aka Rwoth rwadho go piny, to tho.

²¹To Abija omedere lokirok matek. Obedo gi mon apar g'aŋwen to nywolo wote piero ario g'ario kodi nyir apar g'aucel.

²²Tim pa Abija man je, kula pere kodi gim'owaco je, ondiki i kigana pa jatuci wac Were Ido.