Read dhopadhola 2 Kigana kwoŋ Kerin 14 Bible Online

2 Kigana kwoŋ Kerin 14 - dhopadhola bible

2 Kigana kwoŋ Kerin 14

¹Kere Abija otho aka oyiki go i tindi madwoŋ pa Daudi, to Asa lunjo go paka kere. I hongo ma dhum pa Asa piny okwe ma oro apar.

²Asa otimo gimaber gim'otire ruwaŋ Rwoth Were pere.

³Okwanyo woko migame pa jopath kodi kalamo manyakafir, oturo piny sirin to toŋo woko cal pa were madhako Asera.

⁴Asa omiyo ji ma Yuda cik timo mito pa Rwoth, Were pa kwarere pajo, kodi kuro cik kodi or.

⁵Go bende okwanyo woko i tindin madongo ma Yuda kalamo manyakafir kodi migame ma buban, aka ker obedo i siem munyo go dhumo.

⁶Asa bende ogeto tindin madongo m'otinda i Yuda, rupiri piny oyido okwe. Go k'obedo gi lweny i oro no je, kole Rwoth omiyo siem.

⁷To Asa waco ri ji ma Yuda ni, “Weyi win wageti tindin madongo me, to wathoko jo gi kor udi acurcur, waŋkace kodi nywenye, piny me fodi obedo amawan, rupiri watieko timo mito pa Rwoth Were mawan, aka go otieko miyo wan siem.” Ameno jogeto aka kisi gimoro je okadho maber.

⁸Kere Asa obedo gi jolweny 300,000 wok i Yuda m'oyido jotiŋo kwote kodi tonge ma lweny, kodi cwo 280,000 ma jowok i nono pa Benyamin m'oyido jotiŋo kwote kodi aserin ma lweny. Joje oyido jobedo jomaker, aka cwo ma jofonjere lweny.

⁹Jaethopiya m'ilwoŋo ni Zera okwinyo Yuda gi jolweny milion gi cawilin 300 to jomedere tundo kiri Maresa.

¹⁰Asa okadho romo gi go, to jocero bol ma lweny i milelo ma Zefatha i Maresa.

¹¹Asa oywaki ri Rwoth Were pere ni, “Awi Rwoth, in ikipoki kwoŋ konyo jomeni kodi joma nyap. Kony wan, Awi Rwoth Were mawan, kole wagoŋere kwoŋin, aka i nyingin wabino lweny gi kweth jolweny me. Awi Rwoth, ibedo Were mawan; ongoye ŋata nyalo geno kikengila in.”

¹²Ameno Rwoth okengila Joethopiya ruwaŋ Asa kodi Yuda, to Joethopiya jodwire gi ŋwec.

¹³To Asa gi jolweny pere joriemo jo tundo kiri Gerar, to Joethopiya jotho m'ongoye m'obothi; kole Rwoth gi jolweny pere joloyo jo gi meni, aka jolweny jonyaga gigipiny kweth.

¹⁴Kenyo jonyalo turo tindin madongo m'othoko Gerar, rupiri oyido jopoŋ gi lworo ri Rwoth. Jonyaga tindin madongo je aka jomako gigipiny.

¹⁵Jomonjo kiri kambi pa jokwath rombo, aka jomako rombo, diegi kodi ŋamin kweth. Kenyo to jodok i Yerusalem.