Read dhopadhola 2 Kigana kwoŋ Kerin 15 Bible Online

2 Kigana kwoŋ Kerin 15 - dhopadhola bible

2 Kigana kwoŋ Kerin 15

¹Cuny pa Were oloro kwoŋ Azaria wod pa Oded,

²aka okadho romo gi Asa to waco rigo ni, “Winjan, Asa, kodi ji je ma Yuda kodi Benyamin: Rwoth nitie gi win tekin winitie gi go. Ka wirango go, wilanwaŋo, to ka ijwango go, go lajwango win.

³Ma hongo malac, Isiraili oyido ongoye gi Were mar'adieri, jacway ri Were i wi migam m'ofonji jo, kodi cik;

⁴to i kidamba pajo, jowire bongi Rwoth, Were pa Isiraili. Jodwaro go to jonwaŋo go.

⁵I hongo no woth oyido tek, rupiri teko kodi mienirok oyido nitie ri ji je ma i piny.

⁶Oyec jo mathindho thindho, piny olwenyo gi piny aka tindi madwoŋ odiyo tindi madwoŋ man, rupiri Were okelo rijo candirok kodi kidamba ma nger je.

⁷To win cwo ma Yuda, bedi win jomiseni! Wikiri wiyey cingin win wolokere manyap, rupiri ilamiyo win kemba i tic mewin.”

⁸Munyo Asa owinjo wac pa jatuci wac Were Azaria wod pa Oded, onwaŋo miseni, to kwanyo woko cal je i piny Yuda paka rom kodi i Benyamin kodi i tindin je m'oyido omako i piny matendere ma Efrayim. Oyiko migam pa Rwoth m'oyido nitie i diedipo ma Ot pa Rwoth.

⁹Kenyo Asa ocoko ji je ma Yuda kodi Benyamin, kodi ji ma jowok Efrayim, Manase, kodi Simeo m'oyido jobedo paka jopath i dier jo, kole ji mathoth oyido jotuk i Yuda munyo joneno nike Rwoth Were pere oyido nitie gi go.

¹⁰Ji jocokere kanyacel i Yerusalem i dwe mar'adek i oro mar'apar g'abic ma dhum pa Asa.

¹¹I ndelo no, jomiyo Rwoth cowirok wok kwoŋ gima jonyaga ma jodwoko gine, megikwe 700 kodi rombo 7,000.

¹²Jotimo cikirok to joyere lamo Rwoth, Were pa kwarere pajo, g'adundo pajo je gi cuny jo je,

¹³Kisi ŋata k'olamo Rwoth, Were pa Isiraili, oyido iripo neko, obedi nyathi, kosa jadwoŋ, jacwo kosa dhako.

¹⁴Jotimo cikirok gi Rwoth gi koko malo, to jokudho gwarin.

¹⁵Ji ma Yuda je josangala gi cikirok me, kole oyido jotimo gi cuny jo je, aka jofore i lamo Rwoth, aka Rwoth ojolo jo to kelo siem i thenge gi thenge.

¹⁶Kere Asa okwanyo woko kiri adhamere Maka wok i dwoŋ pere paka yok kere, kwoŋbedo Maka oyido otimo cal ma mienirok ri Asera were madhako. Asa otoŋo cal no piny, aka owaŋo mathindho thindho i milelo Kidiron.

¹⁷Makada nende Asa k'onyeko woko kalamo manyakafir je i Isiraili, kucel obedo g'adieri ri Rwoth kwo pere je.

¹⁸Asa okelo i Ot pa Were gigipiny ma bamere Abija omiyo Were, kanyacel gi feza, zahabu ma go won omiyo.

¹⁹Lweny man k'obedo kendo cuka i oro ma piero adek g'abic ma dhum pa Asa.