Read dhopadhola 2 Kigana kwoŋ Kerin 16 Bible Online

2 Kigana kwoŋ Kerin 16 - dhopadhola bible

2 Kigana kwoŋ Kerin 16

¹I oro ma piero adek g'aucel ma dhum pa Asa, kere Basa ma Isiraili omonjo Yuda, to geto Rama, ma geŋo ji wok kosa donjo iy'adec pa kere Asa ma Yuda.

²Ameno Asa okwanyo feza gi zahabu wok i kakan lim ma Ot pa Were kodi i ot pa kere, to dhiro jo ri kere Benhadad ma Siria, gi mikwenda me:

³“Weyi wamakere kanyacel, paka bacere mawan jotimo. Feza kodi zahabu me jobedo mic perin. Pama onyo tur woko makirok perin gi kere Basa ma Isiraili ŋey wonyali wodho woko jolweny pere wok iy'adec paran.”

⁴Benhadad oyere gi rieko ma kere Asa owodho, to dhiro jomituka pa jolweny pere monjo tindin madongo ma Isiraili. Jomako Ijon, Dan, Abel Beth Maka, kodi tindin madongo je i Nafital m'ikan'iye gigipiny.

⁵Munyo kere Basa owinjo kwoŋe, oweyo geto Rama, to miyo tic pere tho.

⁶Kenyo kere Asa ocoko cwo i Yuda paka rom to wodho or ma tiŋo woko telin kodi mbawin m'oyido Basa oro ma geto i Rama, to jooro ma geto tindin madongo ma Geba kodi Mizipa.

⁷I hongo no jatuci wac Were Hanani okidho bongi kere Asa Kere ma Yuda to waco rigo ni, “Kwoŋbedo igoŋere kwoŋ kere ma Siria, makiweno Rwoth Were perin, jolweny pa kere ma Siria jotieko niaŋ kwoŋin.

⁸Ikipoy gim'otimere ri Joethopiya kodi Jolibia, gi cawilin pajo kodi cwo ma jogweyo kayinin? I hongo no, igoŋere kwoŋ Rwoth, to Rwoth ketho jo i cingin.

⁹Kole waŋ Rwoth neno ji ma piny gibe, ma ridho adundin pa jono ma jomiyere rigo. Paka itieko timo gimiŋo me, riameno wok pama kadho yuwaŋe, ilabedo gi lweny noknok.”

¹⁰Gime omiyo Asa omako nge swa gi jatuci wac Were m'omiyo kiri otweyo go i katwec. Obedo i hongo acel me won ma Asa ocako ter'iye ji mogo gi gero.

¹¹Tim pa Asa wok i cako tundo kiri i gike, ondiki i kitawo ma kigana pa kerin ma Yuda kodi Isiraili.

¹²I oro ma piero adek g'abuŋwen ma dhum pa kere Asa, two matek swa omako odondo tiende to ŋolo go; to kad'ameno k'ogiki bongi Rwoth ni wokonyi go to rango kony pa jomilerwa ayin.

¹³Onyo rumacen ma oro ario, Asa otho, i oro ma piero aŋwen g'acel ma dhum pere.

¹⁴Oyiki go i kaliel ma go won ogoro i tindi madwoŋ pa Daudi. Okethi go i kitanda m'okudh'iye gigipiny gi mo maŋwe kur ma yiko delkwoŋe ma yik, to jomoko mac ma kasik m'ogaŋere ywako go.