Read dhopadhola 2 Kigana kwoŋ Kerin 17 Bible Online

2 Kigana kwoŋ Kerin 17 - dhopadhola bible

2 Kigana kwoŋ Kerin 17

¹Yehosafat olunjo bamere Asa paka kere to ridhere matek kwoŋ Isiraili.

²Oketho jolweny i tindin madongo m'otinda je ma Yuda, kodi jolweny ma kuro piny Yuda, kodi i tindin madongo je i Efrayim ma bamere Asa oyido omako.

³Rwoth oyido nitie gi Yehosafat, rupiri oluwo tim pa bamere macon, aka go k'olamo Bal,

⁴to otiyo ri Were pa bamere, owinjo or pere, makiweno paka kerin ma Isiraili jotimo.

⁵Riameno Rwoth oketho keri i cingi Yehosafat, aka ji ma Yuda je jokelo rigo mic to Yehosafat ŋaŋ t'imiyo go wor.

⁶Yehosafat ofore i luwo yo pa Rwoth, aka medo kwoŋ meno okwanyo woko kalamo manyakafir kodi cal pa were madhako Asera i Yuda.

⁷I oro mar'adek ma dhum pere, odhiro jodhum me: Benhayil, Obadia, Zekaria, Nethanel kodi Mikaya, fonjo Cik pa Rwoth i tindin madongo je ma Yuda.

⁸Jolevi abuŋwen kodi jocway ri Were i wi migam ario jokwaŋo jo. Jolevi me obedo: Semaya, Nethanel Zebadia, Asahel, Semiramoth, Yehonathan, Adoniya, Tobia kodi Tobadoniya. Aka jocway ri Were i wi migam me obedo Elisama kodi Yehoram.

⁹Jofonjo i Yuda; aka oyido jooro kitawo ma Cik pa Rwoth, jowotho i tindin madongo ma Yuda aka jofonjo i dier ji.

¹⁰Rwoth omiyo kerin je m'othoko Yuda lworo lwenyo gi Yehosafat.

¹¹Jofilistia moro jokelo ri Yehosafat mic ma feza gi zahabu, aka ji ma jowok i piny pa Jowarabu bende jokelo rigo mic ma wot rombo 7,700 kodi wot diegi 7,700.

¹²Ameno Yehosafat omedere ameda bedo ŋatadwoŋ. Go ogeto cel i Yuda paka rom, kodi tindin madongo je m'ikan'iye gigipiny.

¹³Yehosafat otimo tic i tindi madongo i Yuda. Go oyido nitie gi jolweny matek, cwo ma jomiseni i Yerusalem.

¹⁴Me kitipin pajo cungo kwoŋ nonin pajo: Adina oyido obedo jamituka ma nono pa Yuda, aka oyido telo jolweny 300,000

¹⁵Ŋat'oluwo go i dwoŋ obedo Yehohanan gi jolweny 280,000

¹⁶mar'adek i dwoŋ obedo Amasia wod pa Zikiri won oyido omiyere tiyo ri Rwoth, gi cwo ma jomiseni 200,000.

¹⁷Jamituka ma lweny ma nono pa Benyamin obedo Eliada dhano ma jamisen gi cwo 200,000 m'oyido jonitie gi kwote kodi aserin ma lweny.

¹⁸Ŋat'oluwo go i dwoŋ obedo Yehozabad gi jolweny 180,000 m'oyido jonitie gi gilweny.

¹⁹Jolweny me oyido jotiyo ri kere Yehosafat i Yerusalem, medo i wi jolweny man ma go oketho i tindin m'otinda je i Yuda paka rom.