Read dhopadhola 2 Kigana kwoŋ Kerin 19 Bible Online

2 Kigana kwoŋ Kerin 19 - dhopadhola bible

2 Kigana kwoŋ Kerin 19

¹Kere Yehosafat ma Yuda odok i peco pere maber i Yerusalem.

²To Yehu wod pa Hanani jatuci wac Were romo gine to penjo Yehosafat ni, “Iparo ni obedo gim'otire konyo jakidakana t'imito jono ma jodak Rwoth? Gim'itieko timo okelo keme pa Rwoth kwoŋin.

³To kad'ameno, nitie gimaber manitie kwoŋin, ireyo woko cal pa were madhako Asera i piny me, aka iketho adundo perin ma dwaro Were.”

⁴Makada nende kere Yehosafat obedo i Yerusalem, owotho radhik i dier ji, wok Berseba yupiny tundo i piny matendere ma Efrayim yumalo, to dwoko jo bongi Rwoth, Were pa bacere jo.

⁵Yehosafat oketho jothum banja i kisi tindi madwoŋ m'otinda ma Yuda,

⁶to waco rijo ni, “Kaŋasa gima witimo, rupiri meni ma thumo banja kiwoki bongi ji, to wok bongi Rwoth, aka go labedo gi win ka withumo banja.

⁷Onyo riameno, lworo Rwoth wobedi kwoŋ win, wigwokere win i gima witimo, rupiri Rwoth Were mawan kiyere gi gima k'otire, go tero dhano je marom kosa go kicam nyew.”

⁸Kiri i Yerusalem bende Yehosafat oketho Jolevi moro kodi jocway ri Were i wi migam kodi wic pecin ma Isiraili thumo banja ri joma turo cik pa Rwoth kosa banjin pa ji ma tindi madwoŋ.

⁹Yehosafat omiyo jo or ni, “Witim gime gi cuny win je, ka wilworo Rwoth, i genirok ka wilworo go i kisi gimoro je ma witimo.

¹⁰Ka japiny nyawoti win ma wok i tindi madwoŋ moro je okeli ruwaŋ win gi banja neki, kosa turo cik obedi cik pa Were kosa Or pere, wiripo miyo go fonji maber kwoŋ gima ripo timo, hongo ma kiosa, ŋey jokiri jowobedi jobanja ma timo reco kwoŋ Rwoth. Ka wikitimo ameno win kodi jopiny wadi win wilawinjo meni ma keme pa Rwoth. To ka witimo tic mewin, wik'obedi gi banja.

¹¹Amaria jacway ri Were madwoŋ i wi migam labedo gi meni macowe i banjin manyadini, Zebadia wod pa Isimayil, gavana ma Yuda, labedo gi meni macowe i banjin ma kisi ndelo. Jolevi joripo neno nike gim'oyere i kakiosa otimere. Bedi win jomiseni aka witim gim'aoro win, aka weyi Rwoth wobedi i thenge pa ŋat'otire.”