Read dhopadhola 2 Kigana kwoŋ Kerin 2 Bible Online

2 Kigana kwoŋ Kerin 2 - dhopadhola bible

2 Kigana kwoŋ Kerin 2

¹Kere Solomon oyere geto Ot pa Were i nyingi Rwoth, kodi peco pere.

²Aka Solomon oyimo ri cwo 70,000 bieto kodi cwo 80,000 ma ŋinyo telin i piny matendere, kodi 3,600 ma neno paka jotiyo.

³Solomon odhiro ri Hiram, kere ma Tire mikwenda ni, “Paka itimo gi baba Daudi t'idhiro rigo sida ma geto ot pere, ameno bende tim ran.

⁴Neni, acegin geto ot ma miyo nyingi Rwoth Were paran dwoŋ t'amiyo go, ma waŋo buban maŋwe kur ruwaŋe, kodi ma miyo cowirok ma mugat, kodi ma miyo cowirok m'odikin kodi m'othieno, i Sabato gi i dwe manyen kodi kalimin pa Rwoth Were mawan ma ripo, paka Rwoth owodho or nike wotim cil gi cil ri Isiraili.

⁵Ot pa Were m'abino geto labedo madwoŋ, rupiri Were mawan dwoŋ loyo werin man je.

⁶To ŋa manyalo geto rigo ot, k'inen polo, kiri polo m'oŋawere, kinyal tiŋo go? An aŋa maber ageti rigo ot, kwanyo woko paka kabedo ma waŋo buban ruwaŋ go?

⁷Riameno dhiri ran jandijo ma latic gi zahabu, feza, ywel kodi nyweny, kodi ma jonyalo timo nangin manyarangi ariŋo, m'obokere kodi manyabululu. Jandijo no ripo ŋeyo goro gigipiny to riwere kodi jondijo man ma jonitie kodan i Yuda kodi i Yerusalem ma baba Daudi oyero.

⁸Dhiri ran bende yath m'ilwoŋo ni sida, yath ma lwiyo kodi mbawo yath aligum ma wok Lebanon, kole aŋeyo nike ŋecin perin joŋeyo yaŋo mbawin i Lebanon. Ŋecin paran jolariwere gi ŋecin perin,

⁹to joyiko ran mbawin i thotho, kole ot m'amito geto labedo madwoŋ swa.

¹⁰Alamiyo ŋecin perin ma joyaŋo mbawo tan 2,000 ma ŋano, tan 2,000 ma bale, lita 400,000 ma vini, kodi lita 400,000 ma mo oliv.”

¹¹Kenyo Huram kere ma Tire omiyo radwok i balwa m'odhiro ri Solomon ni, “Rwoth okethin bedo kere rupiri omaro ji pere.”

¹²Hiram bende owaco ni, “Rwoth Were pa Isiraili m'ocweyo polo gi piny wopak, m'omiyo kere Daudi wode mariek m'opoŋ gi ndijo kodi niaŋ, go ama lageto ot ri Rwoth, kodi peco pere.”

¹³“Onyo atieko dhiro jal ma jandijo m'opoŋ gi niaŋ, Hiram

¹⁴ma min obedo janono pa Dan, aka bamere oyido wok Tire. Go ofonjere timo gigipiny gi zahabu, feza, ywel, nyweny, tele kodi mbawo, go nyalo tiyo gi nangin manyarangi ariŋo, manyabululu m'obokere kodi law mafoth. Go bende nyalo timo tic ma goro gigipiny m'opokere kodi wodho cal m'omiy go je, gi cwo ma jondijo perin, cwo m'oyido jotiyo ri benin, Kere Daudi.

¹⁵Onyo, paka ri ŋano kodi bale, mo kodi vini, ma rwoth paran otieko luwo kwoŋe, weyi go wodhiri ri ŋecin pere.

¹⁶Wa latoŋo mbawo m'imito wok Lebanon, to wakelo rin m'otwey i wic ka luwo gi nam kiri Yopa, ŋey inyal tero kiri i Yerusalem.”

¹⁷Kenyo Solomon okwano jopath je m'oyido jonitie i Isiraili, munyo Daudi bamere otieko kwano jo, onwaŋ jopath 153,600.

¹⁸Solomon omiyo 70,000 tic ma bielo bieto, 80,000 baro telin i piny matendere, aka 3,600 oketho jo paka nyapalin.