Read dhopadhola 2 Kigana kwoŋ Kerin 20 Bible Online

2 Kigana kwoŋ Kerin 20 - dhopadhola bible

2 Kigana kwoŋ Kerin 20

¹Rumacen ma hongo moro, jolweny ma Mowab kodi Amon kanyacel gi jom'omakere gi Jomeuna.[1]

²Cwo mogo jobino to jowaco ri Yehosafat ni, “Jolweny kweth jobino monjin wok i Edom, wok bor kalo nam, aka neni, jonitie i Hazazon Tamar (Engedi).”

³Yehosafat obwok, aka okwayo Rwoth wonyuthi go gir'atima, to wodho or ma riyo kec i Yuda paka rom.

⁴Ji ma Yuda jocokere kanyacel to jorango kony wok bongi Rwoth, ji jobino wok i kisi tindi madwoŋ ma Yuda.

⁵To Yehosafat cungo ruwaŋ ji ma Yuda kodi Yerusalem, i Ot pa Rwoth, ruwaŋ diedipo manyen,

⁶to kwayo ni, “Awi Rwoth Were pa kwarere mawan, ikibedo Were manitie i polo? Iŋat'ikidhum kerin je ma piny? Initie gi meni kodi nyalo, aka ongoye ŋata nyalo piem kodin.

⁷Were mawan, ikiriemo woko jono m'oyido jobedo i piny me kwoŋ Joisiraili, t'imiyo nyikway Abraham mere perin cil gi cil?

⁸Nyikwaye jotieko bed'iye, aka jotieko geto rin i iye ot ma lamin, ka jowaco ni,

⁹‘Ka gimarac opodhi kwoŋ wan, obedi lweny, thumo banja, two nundu kosa kec, walacungo ruwaŋ ot me, rupiri nyingin nitie i ot me, to waywak rin i teko mawan, ilawinjo wan t'ibotho wan.’ ”

¹⁰“Onyo pama neni, ji ma Amon, Jomowab kodi ji ma got Edom jotieko monjo wan. Munyo kwarere mawan jowok Misir, ikiyeyo jo donjo i piny no, ameno to kwarere mawan jowire woko kwoŋ jo aka jok'oreyo jo woko.

¹¹Onyo pama joculo wan ka jobino romo wan gi mbaka wok i lowo m'imiyo wan lunjo.

¹²Ibedo Were mawan, ik'othum rijo banja? Kole wangoye gi meni ma ciro ji kweth me je ma jobino monjo wan. Wakuya gir'atima to waketho waŋ wan kwoŋin.”

¹³I hongo no cwo je ma Yuda oyido jocungo ruwaŋ Rwoth gi nyithindho pajo ma dhoth, mon pajo kodi nyithindho pajo.

¹⁴To cuny pa Rwoth loro kwoŋ Yahaziel wod pa Zekaria aka nyakwar Benaya, Jeyel, kodi Matanaya, Jalevi ma wok i nono pa Asaf, i dier kacokirok.

¹⁵Yahaziel owaco ni, “Winji win, ji je ma Yuda kodi ji je ma jobedo i Yerusalem, kodi kere Yehosafat: Rwoth waco riwin ama: Wikiri wibwok kosa wikirin gi lwak ji me. Kole lweny me k'obedo mewin to apa Were.

¹⁶Dikin kadhi win wilweny gi jo. Jolaluwo gi Ziz; wilanwaŋo jo i gike ma milelo, yuwok ceŋ ma thim ma Yeruel.

¹⁷Wik'olweny, maki win kabedo mewin, cungi win matek, aka wilaneno ka Rwoth miyo win loyo. Ji ma Yuda gi Yerusalem, wikiri wiganagana kosa wibwoki. Kadhi wilweny aka Rwoth labedo gi win.”

¹⁸Kenyo Yehosafat okulo wiye piny to nyime geyo lowo, to ji ma Yuda kodi ma Yerusalem je jopodho piny ruwaŋ Rwoth, lamo go.

¹⁹Aka jokitipa ma nono pa Jolevi, apa nyikway Kohath kodi Kora, jocungo malo aka gi woy ma koko ma malo jopako Rwoth, Were pa Isiraili.

²⁰Jocewi odikin i ndelo ma luwo, joay to jokadho i thim ma Tekowa, aka paka jokadho, Yehosafat ocungo to waco ni, “Winjan win ji ma Yuda kodi Yerusalem! Yey win Rwoth Were; aka wilacungo matek; yey win jotuci wac Were pere aka wilanwaŋo gima wimito.”

²¹Aka munyo otieko penjo ji gir'atima, to yero jono m'oyido joripo wer ri Rwoth to jopako go i bol maleŋ, ka joŋanjo ruwaŋ jolweny, kareno jowero ni, “Pak Rwoth! Mar pere makiwire yindira cil gi cil!”

²²Aka munyo jocako wer kodi pak, to Rwoth ketho apondi kwoŋ cwo ma Amon, Mowab kodi got Edom m'oyido jobino monjo Yuda. Okengila jo.

²³Cwo ma Amon kodi Mowab jomonjo joma bedo wi got Edom to joreyo jo kicutho, aka munyo jotieko reyo jo, to wegi jocako nekirok.

²⁴Munyo ji ma Yuda jokidho i wi kisul ma thim, to joneno lwak ji, aka neni, oyido nitie delkwoŋ jom'otho i lowo; m'ongoye kada ŋat'acel m'okwale.

²⁵Munyo Yehosafat gi ji pere jobino kwanyo gim'onyaga, jonwaŋo dhok i thotho i dier jo, lim, nangin, kodi gigipiny ma diwelo, ma jokwanyo ma oro, cuka jok'onyalo tiŋo man kendo. Otero jo ndelo adek coko gim'onyaga, ro thotho mere.

²⁶I ndelo mar'aŋwen jocokere i milelo ma Beraka[2] to jopako Rwoth; riameno nyingi kenyo olwoŋi ni Beraka kiri konon.

²⁷Kenyo to cwo ma Yuda kodi Yerusalem jodok i Yerusalem. Josangala munyo Yehosafat otelo jo. Rwoth omiyo jo atoŋa ma forok ro gim'otimere ri jokwor pajo.

²⁸Munyo jotundo i Yerusalem, jonywar i Ot pa Rwoth munyo jogoyo tongol, kodi adungu kareno jokudho gwarin.

²⁹To lworo Were poŋ kwoŋ kerin ma piny munyo jowinjo nike Rwoth okengila jokwor pa Isiraili.

³⁰Ameno adec pa Yehosafat obed'iye siem, rupiri Were pere omiyo go gi siem i kisi thenge.

³¹Yehosafat odhumo i Yuda. Go oyido jaoro piero adek g'abic munyo cako dhum, to dhumo ma oro piero ario g'abic i Yerusalem. Yokimere oyido ilwoŋo ni Azuba nyar Silihi.

³²Paka bamere Asa m'open dhumo rigo, Yehosafat otimo gim'otire ruwaŋ Rwoth.

³³Kwanyowoko k'oreyo woko kalamo manyakafir je. Ji oyido jok'owire lamo Were pa kwarere pajo gi cuny jo je.

³⁴Giman je ma Yehosafat otimo wok i marapena tundo i macowe ondiki i kigana pa Yehu wod pa Hanani, m'ondiki i kitawo pa Kerin ma Isiraili.

³⁵Rumacen Kere Yehosafat ma Yuda omakere gi Ahazia kere ma Isiraili m'otimo gikidakana.

³⁶Yehosafat omakere gi go ma geto mele ma kidho i Tarsis. Jogeto mele i Eziongeba.

³⁷Kenyo Elieza wod pa Dodavahu ma wok i Maresa oluwo gimoro kwoŋ Yehosafat, ka waco ama: “Kwoŋbedo imakere gi Ahazia, Rwoth lareyo woko gim'itieko timo.” To mele jonyekere ma jok'onyalo cewirok kadho i Tarsis.