Read dhopadhola 2 Kigana kwoŋ Kerin 21 Bible Online

2 Kigana kwoŋ Kerin 21 - dhopadhola bible

2 Kigana kwoŋ Kerin 21

¹Yehosafat otho aka oyiki go kam'oyik'iye bacere pere i tindi madwoŋ pa Daudi to wode m'ilwoŋo ni Yehoram lunjo go.

²Yehoram wod pa Yehosafat ma Yuda obedo gi wutmin aucel: Azaria, Yehiel, Zekaria, Azaria, Mikaili kodi Sefatiya.

³Bajo omiyo jo mic kweth: Feza, zahabu kodi gigipiny ma welo, kanyacel gi tindin madongo m'otinda ma Yuda; to miyo Yehoram ker rupiri go oyido obedo nyathi marapena.

⁴Munyo Yehoram otieko bedo i kom ma dhum pa bamere to ridho kabedo pere, oneko wutmin je g'abor, kodi jodhum megi bende ma Isiraili.

⁵Yehoram oyido jaoro piero adek g'ario munyo lokere kere, to dhumo i Yerusalem ma oro aboro.

⁶Yehoram oluwo tim ma kidakana pa kerin ma Isiraili, paka ot pa Ahab oyido otieko timo; rupiri dhako pere oyido obedo nyar Ahab. Otimo gikidakana ruwaŋ Rwoth.

⁷Kucel Rwoth oyido kinyal reyo ot pa Daudi, ro cikirok m'otimo gi Daudi, aka paka bende oyido otieko miyo go cikirok nike nyikwaye joladhumo cil gi cil.

⁸I hongo ma dhum pa Yehoram, Edom ogwenyere kwoŋ Yuda to lokere piny pajo wegi.

⁹Kenyo Yehoram okwanyo jomituka pere gi cawilin pere, to ay wor to neko Joedom m'oyido jothoko go kodi jomituka ma cawilin pere.

¹⁰Ameno Edom ogwenyere kwoŋ dhum pa Yuda tundo gunyo ni. I hongo no Libina bende ogwenyere kwoŋ dhum pa Yehoram, rupiri go oyido ojwango Rwoth, Were pa kwarere pere.

¹¹Medo kwoŋ meno, Yehoram ogeto kalamo manyakafir i piny matendere ma Yuda, to neko woko yeyo pa ji ma jobedo i Yerusalem, aka omiyo Yuda timo reco.

¹²Jatuci wac Were Elia odhiro rigo balwa m'osomere ni, “Rwoth, Were pa kwarere perin thumo rin banja rupiri ikiluwo ranen pa benin Yehosafat, kosa apa kwarin Asa kere ma Yuda,

¹³t'itimo rin paka kerin ma Isiraili jotimo, t'ineko woko yeyo pa ji ma Yuda kodi ji ma jobedo i Yerusalem, paka ot pa Ahab oneko woko yeyo pa Joisiraili t'ineko woko kiri wutmin in ma ot pa benin, m'oyido jober loyin.

¹⁴Neni, Rwoth lakelo thoyamo kwoŋ ji perin, nyithindho perin, mon perin kodi lim perin,

¹⁵aka in won gipi ilabedo kodi two malith ma nyagir iyin, cuka nyagir iyin lawok, ro two no kisi ndelo.”

¹⁶To Rwoth liel kwoŋ Yehoram nge pa Jofilistia kodi apa Jowarabu ma jonitie cegin gi Joethopiya.

¹⁷Jomonjo Yuda, to jonyaga cel pa kere, to jotiŋo paka jotwec mon pa kere je kodi wote kwanyo woko Ahazia ocoko pere.

¹⁸Aka munyo gigipiny me orumo, Rwoth okelo kwoŋ kere two ma kibothere ma nyagir iy jo.

¹⁹Hongo omedere, munyo oro ario orumo, to nyagir iye wok ro two to tho i litho madwoŋ. Ji pere jok'omoko rigo mac ma miyo go dwoŋ, paka mac m'omok ri kwarere pere.

²⁰Yehoram oyido jaoro piero adek g'ario munyo olokere kere to dhumo i Yerusalem ma oro aboro; aka ongoye ŋat'obedo gi geregere munyo go otho. Oyiki go i tindi madwoŋ pa Daudi makiweno i kaliele pa kerin.