Read dhopadhola 2 Kigana kwoŋ Kerin 22 Bible Online

2 Kigana kwoŋ Kerin 22 - dhopadhola bible

2 Kigana kwoŋ Kerin 22

¹Ji ma jobedo i Yerusalem joloko Ahazia ocoko pa Yehoram lunjo go paka kere, rupiri jolweny m'oyido jobino gi Jowarabu i kambi oyido jotieko neko wot Yehoram madongo je. Ameno Ahazia wod Yehoram odhumo paka kere i Yuda.

²Ahazia oyido jaoro piero aŋwen g'ario munyo cako dhum, to dhumo ma oro acel i Yerusalem. Yokimere oyido obedo Athalia nyar Ahab, aka nyakwar kere Omiri ma Isiraili.

³Ahazia oluwo tim ma ot pa Ahab, rupiri min am'oyido obedo jamic rieko pere to timo kidakana.

⁴Otimo gimarac ruwaŋ Rwoth, paka ot pa Ahab oyido otimo, rupiri munyo bamere otieko tho, oyido jobedo jomic rieko pere ma mieno go.

⁵Wok i rieko ma jomiyo go, kere Ahazia oriwere gi Yoram kere ma Isiraili kwoŋ Hazael kere ma Siria. Jolweny pajo joromo i Ramoth Giliad, aka Yoram owinjo litho i lweny.

⁶Yoram odok i tindi madwoŋ ma Yezirel both adholin pere, aka Ahazia okidho kenyo limo go.

⁷Were ooro kidho pa Ahazia limo Yoram ma kelo podho pere. Kole munyo go okidho kenyo okidho gi Yoram romo gi Yehu wod pa Nimisi, m'oyido Rwoth otieko wiro ma reyo ot pa Ahab.

⁸Aka munyo Yehu oyido thumo banja ri ot pa Ahab, oromo gi jodhum ma Yuda gi yac pa wutmin Ahazia m'oyido jokwaŋo Ahazia, to Yehu neko joje.

⁹Yehu orango Ahazia, aka omaki munyo oyido opondo i Samaria, t'ikelo go bongi Yehu t'ineko. Oyiki go rupiri jowaco ni, “Go obedo nyakwar Yehosafat, m'orango Rwoth gi cunye je.” To ngoye nyatoro i ot pa Ahazia m'onyalo dhumo ker.

¹⁰Onyo munyo Athalia yok Ahazia owinjo nike oneki wode, owodho or nike woneki ji ma peco pa kere je.

¹¹To Yehosabith nyakwar kere Yoram aka nyamin Ahazia, okwanyo Yowas wod pa kere Ahazia to kwalo go kwoŋ wot kerin m'oyido icegin neko to ketho go bongi japidi pere i kisika. Ameno Yehosabith nyar Kere Yehoram aka cipa Yehoyada jacway ri Were i wi migam; m'oyido obedo nyamin Ahazia obotho Yowas kwoŋ tho i cingi Athalia.

¹²Ma oro aucel Yowas opondo i Ot pa Were, munyo Athalia dhumo piny ma Yuda paka nyamicala.