Read dhopadhola 2 Kigana kwoŋ Kerin 23 Bible Online

2 Kigana kwoŋ Kerin 23 - dhopadhola bible

2 Kigana kwoŋ Kerin 23

¹Aka i oro mar'abirio Yehoyada onwaŋo miseni, to timo cikirok kodi jomituka pa jolweny abic: Azaria wod pa Yeroham, Isimayil wod pa Yehohanan, Azaria wod pa Obed, Maseya wod pa Adaya kodi Elisafat wod pa Zikiri.

²Jowotho i Yuda paka rom to jocoko Jolevi wok i tindin madongo je ma Yuda, kodi jotel ma udi pa bacere pa Joisiraili, to jobino i Yerusalem.

³Joje jocokere i Ot pa Were, to jotimo cikirok gi Yowas, wod pa kere. Yehoyada owaco rijo ni, “Ee wod pa kere m'otho! Go onyo labedo kere, paka Rwoth ociko ni nyikway Daudi oyido jolabedo.

⁴Me a gima wiripo timo: Ka jocway ri Were i wi migam kodi Jolevi jobin i tic i ndelo ma sabato, acel wiy adek jolakuro waŋkac,

⁵acel wiy adek jolabedo i ot pa kere kodi acel wiy adek i Waŋkac ma Kindi ot; aka ji je jolabedo i diedipo ma Ot pa Rwoth.

⁶Ongoye ŋata ripo donjo i Ot pa Rwoth kwanyo woko jocway ri Were i wi migam kodi Jolevi ma jonitie i tic, jonyalo donjo rupiri joleŋ, to ji m'odoŋ je joripo winjo fonji pa Rwoth to jodoŋ woko.

⁷Jolevi jolathoko kere, kisi acel gi gilweny pere i cinge, aka ŋat'otemi donjo i Ot pa Were je iripo neko. Wibedi gi kere ka donjo kodi ka wok woko.”

⁸Jolevi kodi ji je ma Yuda jotimo gimoro je paka Yehoyada jacway ri Were i wi migam owodho or. Kisi acel kwoŋ jo okelo cwo pere, m'oyido joripo ywomere i sabato, kodi jono m'oyido joripo tic i sabato.

⁹Aka Yehoyada jacway ri Were i wi migam oketho i cingi jotel tonge kodi kwote mathindho kodi malac m'oyido obedo apa kere Daudi; m'oyido nitie i Ot pa Were;

¹⁰to ketho ji je paka jokur pa kere, kisi dhano manitie kodi gilweny i cinge wok yuthenge ma yupiny ma Ot pa Rwoth tundo yuthenge ma yumalo, thoko migam kodi ot.

¹¹Kenyo Yehoyada owodho woko Yowas, to ketho sangaria i wiye, to miyo go kitawo manitie i iye cik ma mako kwoŋ dhum, t'iloko go kere, to Yehoyada kodi wote jowiro go gi mo, to jowaco ni, “Kere woyindira.”

¹²Munyo Athalia owinjo woy pa ji ma joŋweco aka jopako kere, okidho i Ot pa Rwoth bongi ji;

¹³aka munyo oneno, kere oyido nitie ocungo i ŋeti siro pere i dhiot, gi jotel kodi jokudhi gwarin i ŋeti kere, kareno ji je ma piny oyido jofore aka jokudho gwara, aka jower gi gigipiny pajo ma wer oyido jotelo i kalima. To Athalia yeco nangin pere, to ywak ni, “Banja ma temo neko kere! Banja ma temo neko kere!”

¹⁴Kenyo Yehoyada jacway ri Were i wi migam owodho woko jotel pa jolweny to waco rijo ni, “Wodhi win go woko gi dier bol pa jolweny aka ŋat'otemo luwo go woneki g'abor.” Kole jacway ri Were i wi migam owaco ni, “Wikiri wineki go i Ot pa Rwoth.”

¹⁵To jomako go, aka odonjo i ot pa kere gi i Waŋkac ma Kayina t'ineko go kenyo.

¹⁶Aka Yehoyada otimo cikirok i dier go kodi ji je kanyacel gi kere ni joripo bedo ji pa Rwoth.

¹⁷Kenyo ji je jokidho i ot pa Bal to jokedho piny; joŋinyo woko migame kodi cal je, to joneko Matan jacway ri were i wi migam pa bal ruwaŋ migame.

¹⁸Aka Yehoyada oketho jokur tic i Ot pa Rwoth kareno jocway ri Were i wi migam pa Jolevi ama waco rijo gir'atima kodi Jolevi m'oyido Daudi oyiko ma kuro Ot pa Rwoth, ma miyo cowirok awaŋa ri Rwoth, paka ondiki i cik pa Musa, gi forok kodi wer, paka Daudi owaco nike wotim.

¹⁹Oketho jokur waŋkac i waŋkace je ma Ot pa Rwoth m'ongoye nyatoro m'onyalo donjo m'oyido koc.

²⁰Yehoyada okwanyo jotel pa jolweny, ji ma jobedo i ot pa kere, jogavana pa ji kodi jopiny kodi ji je, to jokelo kere piny wok i Ot pa Rwoth, ka joŋanjo i waŋkac ma yumalo kidho i ot pa kere. To joketho kere i kom ma dhum.

²¹Ameno ji je ma piny josangala; tindi madwoŋ to liŋ, munyo otiek neko Athalia g'abor.