Read dhopadhola 2 Kigana kwoŋ Kerin 24 Bible Online

2 Kigana kwoŋ Kerin 24 - dhopadhola bible

2 Kigana kwoŋ Kerin 24

¹Yowas oyido jaoro abirio munyo cako dhum; odhumo ma oro piero aŋwen i Yerusalem; nyingi min oyido Zibia ma Berseba.

²Yowas otimo gim'otire ruwaŋ Rwoth i hongo je apa jacway ri Were i wi migam Yehoyada.

³Yehoyada oyero mon ario, to jonywolo rigo yac gi nyir.

⁴Munyo go otieko bedo kere ma hongo moro, Yowas to ridho yiko Ot pa Rwoth.

⁵Ocoko kanyacel jocway ri Were i wi migam kodi Jolevi to waco rijo ni, “Kidhi win i tindin madongo ma Yuda wicoki pesa bongi Joisiraili je ma yiko Ot pa Were mewin, kisi ka oro orumo; aka neni win ni witimo gime piyo piyo.” To Jolevi jogalo gi timo.

⁶Ameno to kere lwoŋo Yehoyada jatel, to penjo go ni, “Raŋo ikineno ni Jolevi jokelo wok i Yuda gi Yerusalem misolo ma Musa ŋeca pa Rwoth omito ji woculi ma thielo wema ma cikirok?”

⁷Ri nyithindho pa Athalia, dhako ma jakidakana no, oyido joturo to jomwomere i Ot pa Were, to jooro kiri gigipiny je ma lamo ma Ot pa Rwoth ma lamo Bal.

⁸Ameno kere owodho or ri Jolevi, to jotimo sanduku ma joketho woko ma waŋkac ma Ot pa Rwoth.

⁹Jodhiro wac i Yerusalem paka rom kodi i Yuda ri kisi nyatoro ma kelo ri Rwoth misolo ma Musa, ŋeca pa Were oyimo kwoŋ Isiraili i thim.

¹⁰Jotel kodi ji je josangala to jokelo misolo pajo to jobolo i sanduku cuka opoŋ.

¹¹Noknok oyido Jolevi jotero ri jotic pa kere sanduku, k'oyido joneno pesa mathoth iye, jandiko pa kere kodi jatic pa jacway ri Were i wi migam madwoŋ oyido jobino to jokwanyo gima iy sanduku to jodwoko i kabedo mere. Jotimo ameno kisi ndelo, to jocoko pesa kweth.

¹²Kere kodi Yehoyada oyido jomiyo pesa no ri jono m'oyido okethi ma yiko Ot pa were to jopangisa jobaro telin, jogeto ma dwoko Ot pa Rwoth, kodi joma tiyo i nyweny ma yiko Ot pa Rwoth.

¹³Joje jotiyo matek, to jodwoko Ot pa were paka oyido nitie con, m'ocwiny makicutho.

¹⁴Aka munyo jotieko cowo, jokelo pesa man ruwaŋ kere aka Yehoyada, t'ioro ma timo acerin ma Ot pa Rwoth, ma timo tic ma mic awaŋa, kodi bakulere ma buban, kodi atewe ma zahabu gi feza. To jomiyo mic awaŋa i Ot pa Rwoth noknok i hongo pa Yehoyada je.

¹⁵Yehoyada olokere m'oti munyo hongo pere oromo, to tho; go oyido jaoro 130 munyo tho.

¹⁶Joyiko go i tindi madwoŋ pa Daudi i dier kerin, rupiri oyido otimo bero i Isiraili; kodi ri Were kodi Ot pere.

¹⁷Onyo munyo Yehoyada otieko tho, jotel ma Yuda jobino to jodwoŋo Yowas aka Yowas owinjo jo.

¹⁸Ameno to ji joweyo lamo i Ot pa Rwoth, Were pa kwarere pajo, to jocako lamo Asera werin ma mon gi cal. Banja pajo mareco me okelo keme pa Rwoth kwoŋ Yuda gi Yerusalem.

¹⁹Kucel Rwoth odhiro jotuci wac Were i dier jo ni jowodwoki jo bonge; jotito ri joreco pajo, to jokwero ŋuto.

²⁰Gikenyo to cuny pa Rwoth yimere kwoŋ Zekaria wod pa Yehoyada jacway ri Were i wi migam, to cungo ruwaŋ ji, to waco rijo ni, “Were waco ama, ‘Raŋo wituro cik pa Rwoth to wikelo kidamba kwoŋ win? Rupiri wijwango Rwoth, go bende otieko jwango win.’ ”.

²¹Ji jocamo tiendi Zekaria gi piny, aka munyo kere Yowas owodho or, t'icadho go gi telin i diedipo ma Ot pa Rwoth.

²²Gi tim no, wiy kere Yowas owil kodi ŋono ma Yehoyada ba Zekaria, onyutho go, to neko wode. Aka munyo Zekaria tho, owaco ni, “Weyi Rwoth wonen to culo kwor.”

²³Munyo oro cegin rumo, jolweny pa Josiria jobino lweny gi Yowas. Jobino i Yuda kodi i Yerusalem, to joneko jotel pa ji je ma dier ji, to jodhiro gima jonyaga je ri kere ma Damasiko.

²⁴Kada jolweny ma Siria oyido jonok, Rwoth oketho i cingi jo jolweny madwoŋ swa, rupiri oyido jojwango Rwoth, Were pa kwarere pajo. Ameno to jothumo banja ri Yowas.

²⁵Munyo jotieko pokere kwoŋe, m'owey munyo omiyo go litho ma kiwacere, ŋecin pere jocamo tiende gi piny ro remo pa wod Yehoyada jacway ri Were i wi migam, to joneko go i wi kitanda pere. Ameno to Yowas tho, to joyiko go i tindi madwoŋ pa Daudi; makiweno i limbo pa kerin.

²⁶Jono ma jocamo tiendi go gi piny jobedo Zabad wod pa Simith Jaamon, kodi Yehozabad wod pa Simirith dhako ma Mowab.

²⁷Gima mako kwoŋ wote, kodi gigipiny m'owacere kwoŋ go, gi geto Ot pa Were kendo, ondiki i Kigana ma Kitawo pa kerin. Amaziya wode olunjo go paka kere.