Read dhopadhola 2 Kigana kwoŋ Kerin 25 Bible Online

2 Kigana kwoŋ Kerin 25 - dhopadhola bible

2 Kigana kwoŋ Kerin 25

¹Amaziya oyido jaoro piero ario g'abic munyo cako dhum, to dhumo ma oro piero ario g'abuŋwen i Yerusalem. Yokimere oyido obedo Yehoadin ma wok i Yerusalem.

²Go otimo gim'otire ruwaŋ Rwoth, to k'otimo gi cunye ma bwonere.

³Tekin Amaziya cwiny i dhum, oneko jodhum ma joneko bamere.

⁴To go k'oneko nyithindho pajo, oluwo cik ma Rwoth omiyo Musa ni, “Jonywol kiripi neko jo ro reco pa nyithindho pajo, aka nyithindho kiripi neko ro reco pa jonywol pajo; to kisi nyatoro iripo neko ro reco pere won.”

⁵Gikenyo to Amaziya coko cwo je ma Yuda to ketho jo i udi pa bacere pajo i cingi jomituka ganin gi miyin nonin pa Yuda kodi Benyamin je. Oyido nitie iye cwo ma jooro piero ario kadho malo, joje oyido obedo 300,000. Oyido jobedo jolweny m'odim ma joyikere lweny, m'oyido jonitie gi ndijo ma oro tonge gi kwote.

⁶Medo kwoŋ meno, Amaziya opangisa jolweny 100,000 wok Isiraili ma kilo 3,400 ma feza.

⁷To jatuci wac Were kidho bongi kere to waco rigo ni, “Ikir'ikadhi gi jolweny ma Isiraili me, kole Rwoth kinitie gi Joisiraili kodi Joefrayim me je.”

⁸“To k'iparo ni i royo me ilabedo matek ri jolweny, Were lagoyin piny ruwaŋ jokwor, kole Rwoth nitie gi meni ma konyo kosa ma redho piny.”

⁹To Amaziya penjo jatuci wac Were ni, “Wanotim aŋo gi kilo 3,400 ma feza m'awok miyo jolweny ma Isiraili?” To jatuci wac Were dwoko ni, “Rwoth nigi nyalo m'amiyin kweth maloyo me.”

¹⁰Gikenyo to Amaziya riemo woko jolweny m'oyido jobino bonge wok i Efrayim, ni jowodoki peco kendo. To nge mako jo swa gi Yuda, to jodok peco gi nge ma kiwacere.

¹¹Amaziya ocoko miseni to wodho woko ji pere, to kidho i Milelo ma Cumbi, jolwenyo kenyo to joneko jolweny ma Edom 10,000.

¹²Jolweny ma Yuda jomako jolweny 10,000 man makwo, to jotero jo i wi Sela, aka jobolo jo piny to joŋinyere ma mathindho thindho.

¹³To jolweny ma Amaziya oriemo ma k'oyeyo jo kadho i lweny, jomonjo kwoŋ tindin madongo ma Yuda, wok i Samaria tundo Bethhoron, to joneko ji 3,000 kwoŋ jo, to jonyaga gigipiny kweth.

¹⁴Munyo Amaziya odwoko wok neko Joedom, okelo werin ma Edom to ketho jo paka werin pere, to lamo jo, ka miyo jo cowirok.

¹⁵Gime omiyo Rwoth omako nge gi Amaziya to dhiro rigo jatuci wac Were, m'owaco rigo ni, “Raŋo nyo ilamo werin pa ji ma jok'onyalo botho ji pajo wegi i cingin?”

¹⁶To munyo go fodi luwo, kere openjo go ni, “Walokin jamic rieko? Liŋ kenyo! Raŋo imito tho?” Ameno jatuci wac Were k'omedere, to waco ni, “Aŋeyo nike Rwoth otieko ridho reyin rupiri itieko timo gime aka onyo ikwero winjo rieko m'amiyin.”

¹⁷Gikenyo Amaziya kere ma Isiraili owinjo to dhiro Yowas wod pa Yehoahaz nyakwar Yehu, kere ma Isiraili ka waco ama: “Biye warom.”

¹⁸To Yowas kere ma Isiraili dhiro wac ri Amaziya kere ma Yuda ni, “Ndelo acel kasugu kudho i gote ma Lebanon odhiro mikwenda ri yath sida ni, ‘Miyan nyarin wonywomere gi wodan.’ Ogwaŋ madudi ma Lebanon oluwo to nyono kasugu no piny.

¹⁹Onyo Amaziya, ikengila Joedom, aka ipoŋ gi kwoto. Yeŋ gi dwoŋ perin akibedo peco. Raŋo irango teko ŋey ipodhi, in kodi Yuda kanyacel?”

²⁰To Amaziya kwero winjo. Oyido obedo mito pa Were ni wokengila Amaziya rupiri go oyido olamo werin pa Joedom.

²¹Ameno to Yowas kere pa Joisiraili ay malo; aka go kodi Amaziya kere ma Yuda joromo i lweny i Bethsemes, i Yuda.

²²Isiraili okengila Yuda, to jolweny joringo dok i pecin pajo.

²³Yowas kere ma Isiraili omako Amaziya kere ma Yuda, wod pa Yowas, nyakwar Ahazia, i Bethsemes, ak'obino Yerusalem to turo kor ot ma tindi madwoŋ wok i waŋkac ma Efrayim tundo i waŋkac ma sonda, boro ma romo mita 200.

²⁴Okwanyo feza kodi zahabu je ma go onwaŋo, gigipiny je ma Ot pa Rwoth m'oyido Obed Edom kuro, kodi lim je ma cel pa kere to tero Samaria. Go bende omako ji.

²⁵Kere Amaziya ma Yuda oyido loyo kere Yowas ma Isiraili gi oro apar g'abic.

²⁶Gigipiny man je ma Amaziya otimo wok cako tundo gike ma dhum pere ondiki i Kitawo ma Kigana ma mako kwoŋ kerin ma Yuda kodi Isiraili.

²⁷Wok i hongo ma go owir'iye ri Rwoth, jotimo can ma mako go i Yerusalem, to go ringo i tindi madwoŋ ma Lakis. To jokwor pere joluwo go kenyo to joneko go.

²⁸Otiŋ delkwoŋe i kayina t'itero i Yerusalem aka oyiki go i kaliel pa kerin i tindi madwoŋ pa Daudi.