Read dhopadhola 2 Kigana kwoŋ Kerin 26 Bible Online

2 Kigana kwoŋ Kerin 26 - dhopadhola bible

2 Kigana kwoŋ Kerin 26

¹Aka ji ma Yuda joketho Uziya m'oyido jaoro apar g'aucel paka kere ma lunjo bamere Amaziya.

²Uziya omako Eloth aka ogeto kendo to dwoko ri Yuda rumacen ma tho pa bamere.

³Uziya obedo kere ma Yuda munyo jaoro apar g'aucel aka odhumo i Yerusalem ma oro piero abic g'ario. Yokimere oyido obedo Yekoliya ma wok i Yerusalem.

⁴Go oluwo kite pa bamere Amaziya aka otimo gim'osangala Rwoth.

⁵Go oketho kwo pere ma rango Were i hongo pa Zekaria, m'ofonjo lworo Were, aka noknok ka Uziya orango Rwoth, gimoro okadho rigo maber.

⁶Uziya okidho i lweny kodi Jofilistia, to turo kor ot ma Gath, ma Yabine kodi ma Asdod; to geto tindin madongo iy'adec ma Asdod kodi kaman i dier Jofilistia.

⁷Were okonyo go to kengila Jofilistia kodi Jowarabu ma jobedo i Gurbal, kodi kwoŋ Jomeuna.

⁸Joamon joculo pesa ma neno Uziya, to nyingi go nyay kiri i kew ma Misir, rupiri olokere matek swa.

⁹Medo kwoŋ meno, Uziya ogeto acurcurere i Yerusalem i thengi waŋkac ma Sonda kodi i waŋkac ma Milelo kodi kama kor ot wir'iye.

¹⁰Uziya bende ogeto acurcurere i thim, to goro kacoki pi kweth, rupiri oyido nitie gi mwendi kweth, i Sefela kodi kam'obipere, aka oyido nitie kodi jofur kodi jolwer olemo i tendere kodi i lowo ma diwa, rupiri go oyido omaro lowo.

¹¹Medo kwoŋ meno, Uziya oyido nitie kodi jolweny ma jonyalo lweny, m'opokere opokere paka i kwan pajo kanyacel m'oyikere kodi Jeyel jandiko kodi Maseya jadwoŋ, kareno Hanania, acel kwoŋ jomituka pa kere ama wodho or.

¹²Jolweny oyido jonitie kodi jomituka 2,600.

¹³Oyido jotelo jolweny 307,500 m'oyido jonyalo lweny gi maker to jobotho kere kwoŋ jokwor pere.

¹⁴Uziya opoko jolweny kwote, tonge, jungin, kabutere, atum bor g'aserin, kodi telin ma asumulu.

¹⁵I Yerusalem, Uziya otimo cumin, ma jondijo jokelo, ni wobedi iy'acurcurere kodi sondin, ma bayo aserin kodi telin madongo. Nyinge oŋeyere bor, kwoŋbedo kony m'onwaŋo bongi Were.

¹⁶To munyo kere Uziya olokere matek, to wiye bedo matek, to gino miyo go podho. Okwero winjo Rwoth Were pere, odonjo i Ot pa Rwoth ma waŋo buban i wi migam ma buban.

¹⁷To Azaria jacway ri Were i wi migam kodi jocway ri Were i wi migam pa Rwoth ma jomiseni piero aboro bende jodonjo ma cero go timo ameno.

¹⁸Jowaco rigo ni, “Ingoye gi meni Uziya ma waŋo buban ri Rwoth. Jocway ri Were kende, nyikway Aron am'owir jo ma timo gime. Weyi Kabedo Maleŋ me. Itieko ŋedho cuny Rwoth Were, aka onyo ingoye gi silwany pere.”

¹⁹Gikenyo to Uziya mako nge. Oyido otiŋo giwaŋo buban aka munyo nge omako kodi jocway ri Were i wi migam, dhowo cakere i nyime ruwaŋ jocway ri were i wi migam i Ot pa Rwoth dho migam ma buban.

²⁰Aka Azaria, jacway ri Were i wi migam madwoŋ, kodi jocway ri Were i wi migam je, joneno go aka neni, dhowo oyido nitie i nyime. To jobolo go woko piyo piyo, aka go won gipi okwakere wok, rupiri Rwoth oyido omiyo go gir'acula.

²¹Aka kere Uziya obedo jadhowo cuka tundo ndelo pere ma tho, aka paka go oyido jadhowo, obedo i ot ma kakende, rupiri oyido oriem go i Ot pa Rwoth. To wode Yotham kuro gigipiny ma ot, kareno telo ji ma piny.

²²Onyo gigipiny man je ma Uziya otimo, wok i cakirok kiri i gike, Isaya jatuci wac Were wod pa Amoz ondiko.

²³Uziya otho ot, t'iyiko go kam'iyik'iye kerin to k'oyiki go i kaliele pa kerin ro dhowo. Wode Yotham to lunjo go paka kere.