Read dhopadhola 2 Kigana kwoŋ Kerin 27 Bible Online

2 Kigana kwoŋ Kerin 27 - dhopadhola bible

2 Kigana kwoŋ Kerin 27

¹Yotham oyido jaoro piero ario g'abic munyo cako dhum, to dhumo ma oro apar g'aucel i Yerusalem. Yokimere oyido obedo Yerusa nyar Zadok.

²Go otimo gim'otire ruwaŋ Rwoth i nger paka gimoro je ma bamere Uziya oyido otimo, kwanyowoko go k'otimo reco ka waŋo buban i Ot pa Rwoth. To ji ama jomedere timo reco.

³Yotham ogeto waŋkac ma yumalo ma Ot pa Rwoth, to timo geto kweth i kor ot ma Ofel.

⁴Maloyo Yotham ogeto tindin madongo i piny matendere ma Yuda, gi cele kodi acurcurere i tendere ma yen.

⁵Yotham olwenyo kodi kere pa Joamon to kengila jo. Joamon jomiyo i oro no kilo 3,400 ma feza, tan 10,000 ma ŋano, gi tan 10,000 ma bale. Joamon joculo go rapim acel no ioro mar'ario gi mar'adek.

⁶Ameno Yotham olokere jameni rupiri oketho tim pere i Rwoth Were pere.

⁷Onyo tim pa Yotham je, lweny pere, royo, neni, ondiki i kitawo pa kerin ma Isiraili kodi ma Yuda.

⁸Yotham oyido jaoro piero ario g'abic munyo cako dhum to dhumo i Yerusalem ma oro apar g'aucel.

⁹Yotham otho, t'iyiko go i tindi madwoŋ pa Daudi; aka Ahaz wode olunjo go.