Read dhopadhola 2 Kigana kwoŋ Kerin 28 Bible Online

2 Kigana kwoŋ Kerin 28 - dhopadhola bible

2 Kigana kwoŋ Kerin 28

¹Ahaz oyido jaoro piero ario munyo cako dhum, to dhumo i Yerusalem ma oro apar g'acel. Go k'oluwo kite maber paka kwari mere Daudi,

²to oluwo kite marac paka kerin ma Isiraili. Go otimo kiri cal m'oleny ri Bal;

³to waŋo buban i milelo pa wod Hinom, to waŋo wote paka cowirok, cungo kwoŋ tim ma mienirok pa nonin ma Rwoth oriemo ruwaŋ Joisiraili.

⁴Ahaz omiyo cowirok to waŋo buban i kalamo je, i wi tendere, kodi i tiendi yen m'oyukino.

⁵Riameno Rwoth Were pere oketho go i cingi kere ma Siria, m'okengila go to mako go paka jatwec gi ji pere kweth to tero jo Damasiko. Oketho go bende i cingi kere ma Isiraili, m'okengila go gi nek ma kiwacere.

⁶Peka wod pa Remalia oneko ji 120,000 i Yuda i ndelo acel, joje cwo ma jomiseni, rupiri oyido jojwango Rwoth, Were pa kwarere pajo.

⁷To Zikiri, jalweny ma jameni ma Efrayim neko Maseya wod pa kere Ahaz, Azirikam jamituka ma cel pa kere kodi Elikana ma luwo kere i dwoŋ.

⁸Kada Joyuda oyido jobedo wade pajo ma k'osunga, jolweny ma Isiraili jomako mon gi nyithindho 200,000 paka jotwec to jodwoko jo Samaria, gi gim'onyaga kidhur.

⁹To jatuci wac Were pa Rwoth oyido nikenyo, m'oyido ilwoŋo ni Oded; owok woko romo gi jolweny ma jobino i Samaria, to waco rijo ni, “Neni, rupiri Rwoth, Were pa kwarere mewin, oyido omako nge gi Yuda, oketho jo i cingi win, to witieko neko jo i keme m'otundo malo i polo.

¹⁰Aka onyo pama winitie g'atoŋa ma loko cwo gi mon ma Yerusalem kodi Yuda ŋecin mewin. Wikuya ni wibende witieko timo reco kwoŋ Rwoth Were mewin?

¹¹Winjan win! Jotwec me jobedo wutmin win gi waŋin win. Weyi win jowokadhi, kosa Rwoth omiy win gir'acula, i keme pere.”

¹²Cwo aŋwen ma jotel yu ker ma yumalo, Azaria wod pa Yehohanan, Berekia wod pa Mesilemoth, Yehizikiya wod pa Salum, kodi Amasa wod pa Hadilay, bende jokwero tim pa jolweny.

¹³Jowaco ni, “Wikiri wikel jotwec no ka! Watieko timo reco kwoŋ Rwoth to wamiyo go nge m'oromo m'omiyo omiyo wan gir'acula. Onyo odoko imito giman ma lamedo banja mawan.”

¹⁴Ameno to jolweny jomiyo jotwec gi gim'onyaga ri ji kodi jotel pajo,

¹⁵t'iketho cwo aŋwen no ma poko jotwec nangin wok kwoŋ gim'onyaga. Jomiyo nangin kodi ware aruka, jomiyo jo gir'acama kodi gir'amadha ma romo, to joketho mo oliv iy'adholin pajo. Jom'oyido meni oloyo jo ma woth okethi jo bende i punde, aka jotwec je odwoki jo iy'adec ma Yuda i Yeriko, tindi ma yen thith. Onyo to Joisiraili jodok peco i Samaria.

¹⁶I hongo no kere Ahaz okwayo kere ma Siria kony.

¹⁷Rupiri Joedom oyido jomonjo to jokengila Yuda kendo to jomako ji.

¹⁸I hongo me Jofilistia jomonjo abwap tindin matendere ma tiendi got ma yupodho ceŋ kodi yupiny ma Yuda. Jomako tindin madongo ma Bethsemes, Ayijalon kodi Gederoth, kodi tindin madongo ma Soko, Timina, gi Gimizo gi calin mere to jobedo kenyo kicutho.

¹⁹Rupiri kere Ahaz ma Yuda oyido otiyo g'atoŋa m'ongoye tiende gi wiye to kwero winjo Rwoth, to Rwoth kelo teko kwoŋ Yuda.

²⁰Kere ma Asiria kapa konyo Ahaz, okwedere kwoŋe to kelo rigo teko.

²¹Ameno to Ahaz kwanyo zahabu wok i Ot pa Rwoth, i cel pa kere kodi i pecin pa jotel pa ji, to jomiyo kere ma Asiria; to gime je k'okonyo go.

²²I hongo ma kidamba pere, Ahaz otimo reco kweth kwoŋ Rwoth maloyo m'oyido otimo con.

²³Omiyo cowirok ri werin pa Joasiria, m'oyido jokengila go. Owaco ni, “Werin pa Josiria jokonyo kerin ma Siria, riameno k'amiyo jo cowirok, bende jolakonyan.” To gime okelo kisika kwoŋ go kodi Isiraili je.

²⁴To Ahaz coko kanyacel atewe je ma Ot pa Were to ŋondo mathindho thindho to cego thigin ma Ot pa Rwoth, to yiko rigo won migam i kisi thenge m'ogondere ma Yerusalem.

²⁵I kisi tindi madwoŋ kodi i tindi ma Yuda, ogeto kabedo ma kalamo manyakafir, kam'oyido ripo wowaŋ'iye buban ri werin pa jopath. Gi tim me, okelo kwoŋe keme pa Rwoth, Were pa kwarere pere.

²⁶Onyo tim pere man gi royo pere je wok i cakirok kiri i gike ondiki i kitawo pa kerin ma Yuda gi Isiraili.

²⁷Ahaz otho t'iyiko go i tindi madwoŋ, Yerusalem; to k'okeli go i kaliele pa kerin ma Isiraili. Wode Hezekia olunjo go paka kere.