Read dhopadhola 2 Kigana kwoŋ Kerin 29 Bible Online

2 Kigana kwoŋ Kerin 29 - dhopadhola bible

2 Kigana kwoŋ Kerin 29

¹Hezekia obedo kere ma Yuda munyo jaoro piero ario g'abic, to dhumo i Yerusalem ma oro piero ario g'abuŋwen. Yokimere oyido ilwoŋo ni Abija, nyar Zekaria.

²Go oluwo kite pa kwari mere Daudi, aka otimo gim'osangala Rwoth.

³I dwe marapena i oro marapena munyo Hezekia obedo kere, go oyawo kendo waŋkace ma Ot pa Were to yiko jo.

⁴Ocoko kanyacel kitipa pa jocway ri Were i wi migam kodi Jolevi i diedipo ma yuwok ceŋ ma Ot pa Were,

⁵to luwo gi jo kenyo. Go owaco ni, “Win Jolevi, wiripo lokirok maleŋ, to wiloko Ot pa Rwoth, Were pa kwarere mewin maleŋ. Kwany win woko kisi gimoro je ma koco go.

⁶Kole kwarere mawan jok'ogenere to jotimo reco ruwaŋ Rwoth Were mawan. Jokwero go aka jokano waŋ gin to jowiro ŋey jo ri kabedo pa Rwoth.

⁷Jo bende jocego thigin ma Ot pa Were, joneko talin to jokwero waŋo buban kiri gi miyo cowirok awaŋa i wi migam i Ot pa Rwoth Were pa Isiraili.

⁸Riameno keme pa Rwoth obino kwoŋ Yuda gi Yerusalem, aka gima go otieko timo rijo obwoko to kelo lworo ri kisi dhano. Wiŋeyo gime maber swa.

⁹Kole, kwarere mawan oneki jo i lweny, mon gi nyithindho mawan jonitie i twec ro gime.”

¹⁰“Onyo atieko yero timo cikirok gi Rwoth, Were pa Isiraili, ŋey nge pere ma kiwacere wokiri wotundi kwoŋ wan.

¹¹Nyithindho paran, wikiri wijala gimoro, rupiri Rwoth otieko yero win ni wicungi ruwaŋe ma tiyo rigo aka bende ni wibedi jotic pere to wiwaŋo rigo buban.”

¹²Me Jolevi m'oyido jonitie kenyo: Wok i nono pa Kohath, Mahath wod pa Amasay kodi Yowel wod pa Azaria. Wok i nono pa Merari, Kisi wod pa Abidi kodi Azaria wod pa Yehalelel. Wok i nono pa Gerison, Yowa wod pa Zimina kodi Eden wod pa Yowa.

¹³Wok i nono pa Elizafan, Simiri kodi Jewel. Wok i nono pa Asaf,

¹⁴Zekaria kodi Matania. Wok i nono pa Heman, Yehuel kodi Simey, wok i nono pa Yeduthun, Semaya kodi Uziel.

¹⁵Cwo me jocoko Jolevi wadi gin, to jolonyo kwo pajo. Gikenyo paka kere oyido owodho or ni jowotimi, to jocako lonyo Ot pa Were paka cik pa Rwoth owaco.

¹⁶Jocway ri Were i wi migam jodonjo i Ot pa Rwoth ma loko macil, to jowodho woko ma diedipo ma Ot pa Were kisi gimoro makoc. Wok kenyo to Jolevi jowodho je i tindi madwoŋ tero i milelo ma Kidron.

¹⁷Tic ocakere i ndelo marapena ma dwe mar'acel aka cegin k'aboro oyido jocowo je, kiri kisika ma donjo i Ot pa Were. Onyo doko to jotiyo i ndelo aboro m'oluwo, cuka k'apar g'aucel ma dwe no, yiko Ot pa Rwoth ma lamo.

¹⁸Gikenyo to Jolevi jokidho bongi kere Hezekia to jowaco rigo ni, “Watieko cowo lonyo Ot pa Rwoth, migam ma cowirok awaŋa, meza ma mugat maleŋ, gi gigipiny mere je.

¹⁹Bende watieko dwoko gigipiny je ma kere Ahaz oyido okwanyo i oro no m'oyido k'ogeno Were, aka watieko loko maleŋ. Jonitie je ruwaŋ migam pa Rwoth.”

²⁰Piyo piyo to kere Hezekia coko jotel ma tindi madwoŋ, to jodonjo i Ot pa Rwoth kanyacel.

²¹Paka mic ma kwanyo woko reco peco pa kere gi ji ma Yuda, kodi loko m'olony Ot pa Rwoth, jotero thwondhe ario, wot rombo abirio, rombo abirio ma mon gi wot diegi abirio. Kere owaco ri jocway ri Were i wi migam, nyikway Aron ni, jowomiy ogwaŋe no paka cowirok i wi migam.

²²Jocway ri Were i wi migam kutho jopen neko thwondhe, to joluwo gi wot rombo gi rombo ma mon to jokiro remo ma kisi cowirok i wi migam.

²³Rumacen to jotero diegi ri kere kodi jolamo megi, aka jome joketho cingi gin kwoŋ jo.

²⁴Gikenyo to jocway ri Were i wi migam joneko diegi, to jokiro remo pajo i wi migam paka cowirok ma kwanyo woko reco pa ji je, rupiri kere oyido owodho or ma miyo cowirok awaŋa kodi ma kwanyo reco ni wotim ri ji je ma Isiraili.

²⁵Kere oluwo fonji ma Rwoth oyido omiyo kere Daudi ka luwo gi Gad, jatuci wac Were Nathan, go oketho Jolevi i Ot pa Rwoth gi tongol kodi teŋo agwatin,

²⁶nger meno ma Daudi oyido ooro con. Jocway ri Were i wi migam bende jocungo kenyo gi gwara.

²⁷Gikenyo to Hezekia wodho cik ni womiy cowirok i wi migam. Aka munyo cowirok awaŋa ocakere, wer ri Rwoth bende ocakere gi gwara kodi gi wer man je pa kere Daudi ma Isiraili.

²⁸Kisi dhano je m'oyido nitie kenyo joriwere kanyacel i lamo, aka wer kodi thum madwoŋ omedere cuka cowirok je owaŋ.

²⁹Munyo cowirok orumo, kere Hezekia kodi ji je m'oyido jonitie joguro congi gin piny to jolamo Were.

³⁰Kere Hezekia kodi jotel ma piny jowaco ri Jolevi jowower ri Rwoth wer ma pak ma Daudi kodi Asaf jatuci wac Were jondiko. Onyo to kisi dhano wero gi kisangala madwoŋ to joguro congi gin to jolamo Were.

³¹Gikenyo to Hezekia waco ri ji ni, “Pama onyo wileŋ ri Rwoth; core win cegin, keli win cowirok kodi mic ma foyo ri Rwoth.” Joworo aka jomegi kwoŋ jo wegi jokelo ogwaŋe ma cowirok gine paka mic awaŋa.

³²Jokelo thwondhe piero ario, wot rombo miya acel, kodi rombo ma mon miya ario paka mic awaŋa ri Rwoth,.

³³Jokelo bende thwondhe miya aucel, rombo miya adek paka cowirok ri ji acama.

³⁴Paka jocway ri Were i wi migam oyido jonok ma neko ogwaŋe me je, Jolevi jokonyo jo cuka tic orumo. Kole Jolevi jocil i cuny gin loyo jocway ri Were i wi migam iloko kwo pajo maleŋ.

³⁵Medo kwoŋ miyo cowirok m'owaŋ gipi, jocway ri Were i wi migam am'oyido jowaŋo bor m'omiy wok kwoŋ cowirok ma ji jocamo, gi konjo vini m'omiy kodi cowirok awaŋa. Aka gikenyo to lamo i Ot pa Rwoth cakere kendo.

³⁶Kere Hezekia kodi ji je josangala, ro gima Were oyido otimo ri ji; rupiri oyido obino abwap.