Read dhopadhola 2 Kigana kwoŋ Kerin 3 Bible Online

2 Kigana kwoŋ Kerin 3 - dhopadhola bible

2 Kigana kwoŋ Kerin 3

¹Solomon ocako geto Ot pa Rwoth i Yerusalem wi got Moria, kama Rwoth oyido omenyere iye ri bamere Daudi, i kabedo ma Daudi oyido oyiko, i kasia pa Arauna Jayebu.

²Solomon ocako geto k'ario i dwe mar'ario i oro mar'aŋwen ma dhum pere.

³Me a rapim pa Solomon ma geto Ot pa Were: Mita 27 i boro, mita abuŋwen i laco.

⁴Kisika ma dhiot oyido rom gi laco ma Ot pa Were gibe, mita abuŋwen, kodi ŋawirok mita piero abic g'aŋwen. Iy kisika oyido oum gi zahabu macil.

⁵Kisika madwoŋ oyido otim gi sida t'iumo gi zahabu macil, to jotim'iye cal ma thith kodi lijegere ma loko maŋon.

⁶Kere oyiko Ot pa Were maŋon gi telin ma welo kodi zahabu m'oom wok i Parvayim

⁷Ameno kere oumo ot gi zahabu, kore, wiye, kodi thigo to goro cal ma cwec ma jobwombi gin i kore ot.

⁸Otimo Kabedo Maleŋ Loyo, kisika ma iye oyido mita abuŋwen i boro, m'oyido rom gi laco ma Ot pa Were. Solomon oumo gi tan piero ario ma zahabu macil.

⁹Oor zahabu gram 570 ma timo musumal, aka kor ot ma kisikin ma malo bende oum gi zahabu.

¹⁰I Kabedo Maleŋ Loyo kere otimo cwec ma jobwombi gin, ario gi nyweny to umo jo gi zahabu.

¹¹Jocungo ma joŋiyere kareno joŋiyo kadonjo. Kisi moro onwaŋo nitie gi bwombe ario,

¹²kisi bwombi acel oyido boro mere mita 2.2 aka laco mere oyido mita abuŋwen; oyido bwombi jo acel oyare i dier kisika to joromo;

¹³aka bwombi jo ario man oyido jogeyo kor ot i thenge, aka oyido mita abuŋwen i laco.

¹⁴Kitambala ma Kabedo Maleŋ Loyo oyido otim gi nangin kodi rangi manyabululu, ma ariŋo, kodi m'obokere gi cal cwec ma jobwombi gin iye.

¹⁵Kere otimo sirin ario, kisi acel oyido mita 15.5 i ŋawirok to ketho ruwaŋ Ot pa Were. Kisi acel oyido nitie gi kisul ma mita 2.2 i ŋawirok.

¹⁶Otimo lijegere m'okedi, to ketho jo i wi sirin, to timo pomo 100 to jengo i wi lijegere.

¹⁷Solomon ojengo sirin ruwaŋ Ot pa Were, acel racuc kodi man racam; maracuc mere olwoŋo ni Jakin, aka maracam mere olwoŋo ni Bowaz.