Read dhopadhola 2 Kigana kwoŋ Kerin 30 Bible Online

2 Kigana kwoŋ Kerin 30 - dhopadhola bible

2 Kigana kwoŋ Kerin 30

¹Hezekia ondiko balwa ri Efrayim kodi Manase to lwoŋo Joisiraili je kodi Joyuda je, ni joripo bino i Ot pa Rwoth i Yerusalem, timo kalima ma Kadho pa Rwoth Were pa Isiraili.

²Rupiri kere gi jotel pere kodi ji je i Yerusalem oyido joyere timo Kalima ma Kadho i dwe mar'ario

³jok'otimo i hongo ma ripo rupiri jocway ri Were i wi migam oyido jonok ma loko kwo pajo maleŋ, aka ji oyido bende fodi jok'ocokere i Yerusalem.

⁴Aka can no oneno m'otire ri kere kodi ri ji je.

⁵Ameno to jolwoŋo Joisiraili je, wok Dan yumalo tundo Berseba yupiny, ma bino kanyacel i Yerusalem ma timo Kalima ma Kadho paka cik waco, i thotho loyo con mere.

⁶Jomikwenda jokidho paka kere owodho or gi jotel pere i Yuda kodi Isiraili paka rom gi lwoŋo me: “Ji ma Isiraili, witieko both i cingi kerin ma Asiria. Onyo pama gik win bongi Rwoth, Were pa Abraham, Isaka kodi Yakobo aka go lagik bongi win.

⁷Wikiri wibedi paka kwarere mewin gi Joisiraili wadi win ma jok'ogeno Rwoth Were pajo. Paka winyalo neno, omiy jo gir'acula malith.

⁸Wikiri wibedi jowictek paka jo, to lwor win Rwoth. Biye win i Ot pa Rwoth i Yerusalem, ma Rwoth Were mewin otieko loko maleŋ cil gi cil, wilam go ŋey wokiri womaki nge gi win.

⁹Ka wigik bongi Rwoth, nyaka jono ma jomayo win wade mewin paka jotwec jomaki gi jo wor to joweyo jodwoko. Rwoth Were mewin jakisa doko jaŋono, aka ka wigik bongi go, go lajolo win.”

¹⁰Jomikwenda jokidho i kisi tindi iy'adec pa nonin pa Efrayim kodi Manase, kiri yu kamabor ma yumalo ma nono pa Zebulun, to ji jonyero jo to jocayo jo.

¹¹Fodi oyido nitie manok wok i nono pa Asa, Manase kodi Zebulun m'oyido joyere kidho i Yerusalem.

¹²Were oyido tiyo i Yuda to riwo ji kanyacel gi ridho ma timo gima go yenyo cungo kwoŋ or pa kere kodi jotel pere.

¹³Ji mathoth jocokere i Yerusalem i dwe mar'ario ma timo Kalima ma Mugat ma buthow.

¹⁴Jocako tic to jokwanyo migame je m'oyido nitie i Yerusalem, kodi migame je ma waŋo buban to jobolo i milelo ma Kidiron.

¹⁵Aka k'apar g'aŋwen ma dwe mar'ario, to joneko wot rombo ma Kalima ma Kadho. Jocway ri Were i wi migam kodi Jolevi m'oyido jokoc okwot wiy jo aka, nyaka jolokere maleŋ to jokelo cowirok awaŋa i Ot pa Rwoth.

¹⁶Jomako kabedo pajo i Ot pa Rwoth paka Musa dhano pa Were ofonjo i cik. Jolevi jomiyo jocway ri Were i wi migam remo ma cowirok, to jokiro i wi migam.

¹⁷Rupiri ji mathoth i kacokirok oyido jokileŋ, riameno Jolevi joneko wot rombo ma Kalima ma Kadho ri kisi dhano je m'oyido koc, ma loko go maleŋ ri Rwoth.

¹⁸Kole ji kweth, mathoth kwoŋ jo wok i Efrayim, Manase, Isakar kodi Zebulun oyido jok'otimo tim ma cwako reco, aka kucel jocamo Kalima ma Kadho paka k'owaci ni jowocami. Kole Hezekia oyido otieko kwayo rijo ni,

¹⁹“Rwoth wocwaki kisi dhano je m'oketho adundo pere rango Were, Rwoth Were pa kwarere pajo, kada jotur cik ma lonyo ma Kabedo Maleŋ.”

²⁰Rwoth owinjo Hezekia to cango ji.

²¹Aka Joisiraili m'oyido jonitie i Yerusalem jotimo kalima ma Mugat ma buthow ma ndelo abirio gi kisangala madwoŋ, aka Jolevi kodi jocway ri Were i migam jopako Rwoth kisi ndelo, kareno jowero gi meni pajo je ri Rwoth.

²²To Hezekia luwo gi miseni ri Jolevi je ma jonyutho ndijo maber i tic pa Rwoth. Ameno to ji jocamo cemo ma kalima ma ndelo abirio, ka jomiyo cowirok ma siem gi foyo Rwoth Were pa kwarere pajo.

²³Gikenyo to cokirok gipi joyere kanyacel camo kalima kendo ma ndelo abirio, onyo to jotimo ma ndelo abirio man gi kisangala.

²⁴Hezekia, kere ma Yuda omiyo cokirok no thwondhe 1,000 gi rombo 7,000 jotel bende jomiyo thwondhe 1,000 gi rombo 10,000. Aka jocway ri Were i wi migam mathoth joloko kwo pajo maleŋ.

²⁵Cokirok, gi je ma ji ma Yuda, jocway ri Were i wi migam, Jolevi, gi kweth m'owok woko ma Isiraili, gi jokicar ma k'onywol jo i Isiraili, gi jokicar ma jobedo Yuda to josangala.

²⁶Kisangala obedo madwoŋ i Yerusalem, rupiri wok i hongo pa Solomon wod pa kere Daudi ma Isiraili oyido fodi k'otimere i Yerusalem.

²⁷Gikenyo to jocway ri Were i wi migam kodi Jolevi jocungo to jomiyo ji silwany, aka dwondi jo owinjere; kwayo pajo otundo i kabedo pa Were maleŋ i polo.