Read dhopadhola 2 Kigana kwoŋ Kerin 31 Bible Online

2 Kigana kwoŋ Kerin 31 - dhopadhola bible

2 Kigana kwoŋ Kerin 31

¹Munyo kalima orumo, ji je ma Isiraili jokidho i kisi tindi madwoŋ i Yuda to joturo sirin ma telin, jotoŋo piny cal pa were madhako Asera, to joreyo migame kodi kabedo ma lamo manyakafir. Jotimo gimoro acel no i Yuda paka rom, iy'adec pa Benyamin, Efrayim kodi Manase; nyaka to joje jodok peco.

²Kere Hezekia ocako kendo oriwa pa jocway ri were i wi migam kodi Jolevi ma i iye, kisi dhano oyido nitie gi gir'atima. Tic ago oyido obedo miyo cowirok awaŋa kodi cowirok ma siem, bedo i lamo i Ot pa Rwoth, gi miyo pak gi foyo iy'adec m'opokere opokere ma Ot pa Rwoth.

³Gima kere owodho wok kwoŋ gima go nitie gine obedo ma cowirok awaŋa m'odikin kodi m'othieno, kodi cowirok awaŋa ma sabato, ma dwe manyen, gi kalima m'oyik, paka ondiki i cik pa Rwoth.

⁴To kere Hezekia waco ri ji m'oyido jobedo i Yerusalem ni jowomiy adec m'obedo apa jocway ri Were i wi migam kodi Jolevi, ŋey jowomiy kwo pajo ri cik pa Rwoth.

⁵Tekin wac ywore wiloka, Joisiraili jomiyo i thotho olemo marapena, vini, mo oliv, mo kic, kodi ranyak je ma ndelo, to jokelo i thotho acel wiy apar ma kisi gimoro.

⁶Aka Joisiraili kodi Yuda m'oyido jobedo i tindin madongo ma Yuda, bende to jokelo acel wiy apar ma dhok kodi rombo gi gigipiny m'oyido oloki maleŋ ri Rwoth Were pajo to jocano jo wic wic.

⁷I dwe mar'adek to jocako cano cemo m'odhure no, to jocowo i dwe mar'abirio.

⁸Munyo kere Hezekia gi jotel pere jobino to joneno gim'omiy, jopako Rwoth, gi Joisiraili, jomiyo ji silwany.

⁹To kere Hezekia penjo jocway ri Were i wi migam kodi Jolevi kwoŋ mic no.

¹⁰Azaria jadwoŋ pa jocway ri Were i wi migam m'oyido wok i ot pa Zadok odwoko go ni: “Wok cuka jocaki kelo mic i Ot pa Rwoth watieko cemo aka watieko yeŋ aka nitie kidhur m'odoŋ, kole Rwoth otieko miyo ji pere silwany m'omiyo kidhur me odoŋ.”

¹¹Gikenyo to Hezekia oro jo ni jowoyiki kisikin ma kano gigipiny i Ot pa Rwoth; to joyiko.

¹²To jokelo mic pajo m'ongoye piem, acel wiy apar gi gigipiny m'obedo apa Rwoth. Jatel madwoŋ ma gigipiny me oyido obedo Konaya Jalevi gi Simey omin go ma luwo go i dwoŋ,

¹³kareno Yehiel, Azaria, Nahath, Asahel, Yerimoth, Yozabad, Eliel, Ismakaya, Mahath kodi Benaya oyido jomeny gigipiny me aka oyido jokonyo Konaya gi Simey omin, aka kere Hezekia kodi Azaria jatel ma Ot pa Were am'oyido joketho jo.

¹⁴Aka Kore wod pa Imina Jalevi, jakur ma waŋkac ma yuwok ceŋ ma Ot pa Rwoth, am'oyido obedo jajoli mic pa Rwoth gi poko.

¹⁵Eden, Miniamin, Yesuwa, Semaya, Amaria, kodi Sekaniya jokonyo go maber swa i tindin madongo pa jocway ri Were i wi migam, jopoko cemo marom ri Jolevi wadi gin mathindho gi madongo paka tic pajo oyido nitie,

¹⁶makiweno manyanono. Kwanyo woko jono m'ondiki nywolirok pajo, ma yac cako i oro adek kadho malo, joje ma jodonjo i Ot pa Rwoth paka tic pa ŋat'acel acele oyido waco, wok i dwoŋ pajo, i pokirok pajo.

¹⁷Ondiki jocway ri Were i wi migam wok kwoŋ udi pa bacere jo, ma ot pa Jolevi cako i oro piero ario kadho malo wok i tic pajo kodi pokirok.

¹⁸Ondiki jocway ri Were i wi migam kodi nyithindho pajo je ma nyaka joay, mon pajo, wot jo, gi nyiki jo, lwak ji je, rupiri oyido jogenere i kuro kwo pajo bedo maleŋ.

¹⁹Aka ri nyikway Aron, jocway ri Were i wi migam m'oyido jonitie i lowo pa kisi dhano ma tindi madwoŋ, oyido nitie cwo i tindin kweth m'oyido oŋey jo gi nyingi gin ma poko cemo ri kisi jacwo i dier jocway ri were i wi migam kodi ri kisi dhano i dier Jolevi m'ondiki nyinge.

²⁰Ameno i Yuda parom, kere Hezekia otimo gim'otire kendo m'osangala Rwoth Were pere.

²¹Aka kisi tic m'otimo ri Ot pa Were kendo i kuro cik gi or, ma rango Were pere, otimo gi cunye je aka obedo maber.