Read dhopadhola 2 Kigana kwoŋ Kerin 32 Bible Online

2 Kigana kwoŋ Kerin 32 - dhopadhola bible

2 Kigana kwoŋ Kerin 32

¹Munyo gigipiny me otieko timirok, kere Senakerib ma Asiria obino to monjo Yuda, otinda tindin madongo m'ogoy'iye cel, kareno paro ni kidho kikengila jo woloki apere.

²Aka munyo kere Hezekia oneno ni Senakerib oyido obino g'atoŋa ma lweny gi Yerusalem,

³to cano kodi jotel gi cwo pere ma jomeni ma cego waŋ pi m'oyido nitie woko ma tindi madwoŋ to jokonyo go.

⁴Ji kweth jocokere, to jocego waŋ pi je, gi pi ma mol i piny, ka jopenjere ni, “Raŋo kerin ma Asiria jonyalo bino to jonwaŋo pi kweth?”

⁵Hezekia ocako tic gi derino to geto kendo kor udi m'oyido otur je, ojengo acurcur i wiye, ogeto kor ot man woko mere, to loko matek cel ma tindi madwoŋ pa Daudi. Go bende otimo gilweny gi kwote kidhur.

⁶Hezekia oketho jomituka pa jolweny kuro ji, ocoko kanyacel bonge kam'othangere ma jasonda aŋwen marom i waŋkac ma tindi madwoŋ to luwo gi jo wac ma miseni ni,

⁷“Bedi win matek gi miseni maber. Wikiri wibwok kosa wikirin ruwaŋ kere ma Asiria gi jolweny pere je m'otelo jo. Wanitie gi meni maloyo yuthenge mawan loyo ma go nitie gine yuthenge pere.

⁸Senakerib nitie gi meni ma nyadhano, to wanitie gi Rwoth Were mawan ma konyo wan gi lwenyo riwan.” To ji jonwaŋo miseni gi wac pa Kere Hezekia me.

⁹Rumacen mere, munyo Senakerib gi jolweny pere oyido fodi jonitie i Lakis, odhiro mikwenda me ri Hezekia kodi ri ji ma Yuda m'oyido jonigine i Yerusalem:

¹⁰“An Senakerib kere ma Asiria, apenjo win ni: Aŋo m'amiyo win miseni doŋ i Yerusalem, tindi m'otinda?

¹¹Hezekia ama kimien win, lamiyo witho kec gi riyo, ka waco riwin ni, ‘Rwoth Were mawan labotho wan i cingi kere ma Asiria’?

¹²K'obedo Hezekia acel me won m'okwanyo woko kalamo pere manyakafir gi migame pere to wodho or ri Yuda gi Yerusalem, ka waco ama: ‘Wilalamo i wi migam acel kende, to wimiyo mic mewin i wiye’?

¹³Wikuya gima kwarere mewin gi an jotieko timo ri ji ma nonin man? Werin ma nono man jobotho ji pajo kwoŋ kere ma Asiria?

¹⁴Keraŋo m'acel kwoŋ werin ma piny no je jobotho piny pajo kwoŋ wan? Onyo aŋo ma miyin paro ni Were perin nyalo bothin?

¹⁵Onyo riameno, wikiri wiyey Hezekia wowondi win kosa womien win ameno. Wikiri wiyey. Ongoye were kad'acel ma piny kosa ma ker moro m'otieko nyalo botho ji pere wok i cingan kosa i cingi kwarere paran. Onyo Were perin obothin masisiri nedi i cingan!”

¹⁶Ŋecin pere jomedo waco gigipiny kweth mareco ma mako Rwoth Were, gi ŋeca pere Hezekia.

¹⁷Senakerib bende ondiko balwa ma bwono Rwoth, Were pa Isiraili, gi luwirok kwoŋe wac mareco ka waco ama: “Paka werin ma piny man fodi jok'obotho ji pajo kwoŋ meni paran, apaka bende Were pa Hezekia k'obothi ji pere kwoŋan.”

¹⁸Jokoko malo gi gime i dhodhok pa Yuda ri ji ma Yerusalem m'oyido jonitie i kor ot, ma loko jo malwor gi miyo jo kirin, ŋey jowonyal mako tindi madwoŋ.

¹⁹Joluwo kwoŋ Were ma Yerusalem paŋini go oyido cale werin pa ji ma piny, ma jobedo tic ma cingi dhano.

²⁰Gikenyo to kere Hezekia kodi Isaya wod pa Amoz, jatuci wac Were, jokwayo Were ka joywak rigo ni wokonyi jo.

²¹To Rwoth dhiro malaika m'oneko jolweny ma jomeni, jomituka gi jotel i kambi pa kere ma Asiria. Ameno to kere dok i piny pere giwickwot ruwaŋe. Aka munyo odonjo i ot pa were pere, to acel kwoŋ wote rwadho go piny kenyo g'abor.

²²Ameno to Rwoth botho Hezekia gi ji ma Yerusalem i cingi Senakerib kere ma Asiria kodi i cingi jokwor pere je, to miyo jo siem kisi thenge.

²³Ji kweth jokelo mic kweth ri Rwoth i Yerusalem gi gigipiny ma welo ri Hezekia kere ma Yuda, ŋey woŋawere malo ruwaŋ nonin man je wok i hongo no kadho yuwiye.

²⁴I hongo no, two omako Hezekia aka oyido cegin tho, to kwayo Rwoth, to Rwoth winjo go, to miyo go ranyuth.

²⁵To Hezekia k'ofoyo bero m'otimi rigo, rupiri go oyido obedo jakwoto. Riameno keme pa Rwoth opodho kwoŋe, kwoŋ Yuda gi Yerusalem

²⁶Gikenyo to Hezekia gi ji ma Yerusalem jomwole, ŋey keme pa Rwoth k'opodho kwoŋ jo kendo i hongo pa Hezekia.

²⁷Hezekia olokere ŋat'oŋaŋ swa to kisi dhano je miyo go dwoŋ. Obedo gi kakano gigipiny m'ogeto ri zahabu pere, feza, telin ma welo, gima ŋwe kur, kwote gi gigipiny man ma welo.

²⁸Medo kwoŋ meno, oyido nitie gi ot ma kakan m'ogeto ri ranyak pere, vini, mo oliv; cele dhok gi rombo nger gi nger.

²⁹I nger acel no won, obedo gi tindin madongo rigo won, dhok gi mwendi kidhur; rupiri Were oyido omiyo go ŋaŋo madwoŋ.

³⁰Hezekia acel won me, ocego waŋ pi ma yumalo Gihon to baro fereji rijo yuthenge ma yupiny ma yupodho ceŋ ma tindi madwoŋ pa Daudi. Kisi gimoro m'otimo okadho rigo maber.

³¹Ameno bende, i gima mako kwoŋ jomikwenda pa jotel ma Babilon, m'oyido odhir bonge penjo gima mako kwoŋ ranyuth m'otimere i piny, Were okoyo go rigo won, ma temo go gi ŋeyo gimoro je manitie i cuny.

³²Kisi gimoro je ma kere Hezekia otimo, gi tim pere mabeyo je, ondiki i menyirok pa Isaya wod pa Amoz jatuci wac Were kodi i Kigana pa Kerin ma Yuda kodi Isiraili.

³³Hezekia otho t'iyiko iy'adec ma malo ma kaliele pa nyikway Daudi; aka ji je ma yuda kodi Yerusalem jomiyo go dwoŋ i tho pere. Wode Manase olunjo go paka kere.