Read dhopadhola 2 Kigana kwoŋ Kerin 34 Bible Online

2 Kigana kwoŋ Kerin 34 - dhopadhola bible

2 Kigana kwoŋ Kerin 34

¹Yosia obedo kere ma Yuda munyo jaoro aboro, aka odhumo ma oro piero adek g'acel i Yerusalem.

²Yosia otimo gim'osangala Rwoth, oluwo kite pa kwari mere Daudi ma k'otangatanga racuc kosa racam.

³I oro mar'aboro ma dhum pa Yosia, munyo go fodi thin, ocako lamo Were pa kwari mere Daudi. Rumacen munyo oro aŋwen okadho, to cako reyo woko kabedo ma lamo manyakafir i Yuda kodi cal pa were madhako Asere gi cal megi je.

⁴I nyim go, ji joturo woko migame pa Bal to joŋinyo piny migame ma buban m'oyido jocungo i wi jo, to turo mathindho werin ma mon Aserin gi cal ma kaliel m'oleny to loko jo fukefuke to ywoyo i wi kaliele pa jono m'oyido jomiyo jo cowirok.

⁵Yosia bende owaŋo cokin pa jocway ri were i wi migame ma kam'oyido jolamere iye. Gi tim me je, Yosia oloko Yuda gi Yerusalem m'olony kendo.

⁶Otimo gimoro acel no won i tindin madongo pa Manase, Efrayim kodi Simeo, kiri yumalo tundo Nafital, i gundin m'othoko.

⁷I tindin ma ker ma yumalo parom, oŋinyo migame gi cal pa Asera, orego cal to loko fukefuke, to turo mathindho thindho migame ma buban je. Gikenyo nyaka to dok Yerusalem.

⁸I oro mar'apar g'aboro ma dhum pa Yosia, munyo otieko loko m'olony piny kodi Ot pa Rwoth munyo kelo i gike lamo manyakafir, kere Yosia odhiro cwo adek yiko Ot pa Were: Safan jandiko wod pa Azaliya, Maseya gavana ma Yerusalem, gi Yowa wod pa Yehoahaz, jatic madwoŋ.

⁹Jotundo bongi Hilikia jacway ri Were madwoŋ i wi migam to miyo jo pesa m'oyido okeli i Ot pa Rwoth were, ma Jolevi jokur ŋaŋo oyido jocoko bongi Manase kodi Efrayim gi jom'odoŋ je ma Isiraili gi Yuda gi Benyamin kodi joma bedo i Yerusalem.

¹⁰Pesa me omiy cwo adek ma joneno paka iyiko Ot pa Rwoth, to jomiyo

¹¹jopac, jogeto, ma jonyewo mbawo kodi telin m'ioro ma yiko udi ma kerin ma Yuda oweyo onyekere.

¹²Aka cwo no jotimo tic gi genirok. Okethi Yahath kodi Obadia Jolevi wot Merari, Zekaria kodi Mesulam, wot Kohath ma neno paka tic kadho. Jolevi je oyido jondijo gi jower.

¹³Jolevi megi oyido jobiel bieto, gi jopok tic ma nger je, jomegi oyido jondiko, gi jotel kodi jokur waŋkace.

¹⁴Munyo iwodho pesa i kisika, Hilikia to nwaŋo kitawo ma Cik pa Rwoth, cik m'oyido Rwoth omiyo Musa.

¹⁵Hilikia owaco ri Safan ni, “Atieko nwaŋo kitawo ma Cik ka i Ot pa Rwoth.” Hilikia to miyo Safan kitawo,

¹⁶to Safan tero ri kere. Owaco ni, “Watieko timo gimoro je m'ioro wan.

¹⁷Watieko kwanyo pesa m'oyido okan i Ot pa Rwoth to wamiyo jotic gi joma kaŋasa.”

¹⁸Gikenyo to Safan jandiko waco ri kere ni, “Anitie gi kitawo ma Hilikia omiyan.” Gikenyo to Safan soma malo ri kere.

¹⁹Munyo kere owinjo wac ma cik, to yeco nangin pere.

²⁰Gikenyo to kere wodho or ri Hilikia, Ahikam wod pa Safan, Abidon wod pa Mika, Safan jandiko kodi Asaya ŋeca pa kere ni:

²¹“Kidhi wipenji ran Rwoth kodi ri jono ma jodoŋ i Isiraili gi Yuda, gima mako wac ma kitawo m'onwaŋ; kole keme pa Rwoth dwoŋ m'okonjere kwoŋ wan, rupiri kwarere mawan jok'okuro wac pa Rwoth, ma timo gimoro je m'ondiki i kitawo me.”

²²Ameno to Hilikia kodi jono ma kere oyido odhiro to jokidho bongi Hulda jatuci wac Were madhako cipa Salum wod pa Tokath, nyakwar Hara, jakur kabada ma nangin ma Ot pa rwoth. Jotito rigo gim'otimere,

²³to waco rijo gik bongi kere to jomiyo go mikwenda,

²⁴me wok bongi Rwoth: “Akidho miyo Yerusalem gi ji mere je gir'acula gi lam m'ondiki i kitawo m'osoma ri kere.

²⁵Jokweran aka jotieko miyo cowirok ri werin man, aka jotieko guro nge paran gi gima jotieko timo je. Keme paran oliel kwoŋ Yerusalem, aka k'otho.

²⁶To ri kere ma Yuda, m'odhiro win penjo paro pa rwoth, wilawaco rigo ama: Rwoth were pa Isiraili waco ama: Mako kwoŋ wac m'iwinjo,

²⁷rupiri iŋuto t'imwole ruwaŋ Were munyo iwinjo wac pere kwoŋ kabedo me gi ji mere, aka itieko mwole ruwaŋan, aka itieko yeco nangin perin t'iywakere ruwaŋan, abende atieko winjin, Rwoth waco.

²⁸Panen, alacoko win bongi kwarere mewin, t'icoko win kanyacel i kaliel ma siem, aka waŋ win k'oneni reco je m'abino kelo i kabedo me kodi ji ma iye.” To jodwoko wac ri kere.

²⁹Kenyo kere odhiro wac to coko kanyacel jotel je ma Yuda kodi Yerusalem,

³⁰aka okidho gi jo i Ot pa were kanyacel kodi jocway ri Were i wi migam, jotuci wac were kodi ji je, jocandi kodi joŋaŋo. Kere osoma kitawo ma cikirok m'onwaŋere i Ot pa Rwoth.

³¹Kere ocungo cegin gi siro acel aka otimo cikirok gi Rwoth winjo go, kuro cik kodi or pere gi cunye je kodi adundo pere je kodi ketho i tim gima cikirok mito paka ondiki i kitawo.

³²Gikenyo omiyo ji je m'oyido jonitie i Yerusalem kodi i Benyamin bende kuro cikirok. Aka ji ma Yerusalem jotimo paka cik pa Were pa kwarere pajo waco.

³³Gikenyo to Yosia kwanyo woko mienirok je iy'adec m'oyido obedo apa Joisiraili, to miyo ji je ma Isiraili lamo Rwoth Were pajo. I ndelo pere je, jok'owire luwo Rwoth Were pa kwarere pajo.