Read dhopadhola 2 Kigana kwoŋ Kerin 35 Bible Online

2 Kigana kwoŋ Kerin 35 - dhopadhola bible

2 Kigana kwoŋ Kerin 35

¹Yosia otimo Kalima ma Kadho ri Rwoth i Yerusalem, to thumo nyathi rombo ma kalima ma kadho i ndelo mar'apar g'aŋwen i dwe marapena.

²Go oyero jocway ri Were i wi migam timo tic pajo aka omiyo jo miseni ma timo tic i Ot pa Rwoth.

³Yosia bende owaco ri Jolevi m'oyido jofonjo Joisiraili je aka m'oyido joleŋ ri Rwoth ni, “Kethi win Kakan ma Cikirok maleŋ i ot ma Solomon wod pa Daudi ogeto, wikiripi kendo tiŋo i badi win. Onyo pama tiyi win ri Rwoth Were mewin kodi ji pere Isiraili.

⁴Yikere win cungo kwoŋ nonin pa kwarere mewin, pak Kere Daudi owodho or kodi cik ma wod go Solomon omiyo.

⁵Canere win i Kabedo Maleŋ cungo kwoŋ nonin mewin aka weyi Jalevi wotel kisi kitipa.

⁶Wiripo thumo nyathi rombo, lokere win maleŋ, aka tim win can i kawaŋ wade mewin, ka wiluwo or ma Rwoth owodho ri Musa.”

⁷Yosia omiyo ri ji mic ma kalima ma Kadho, nyithindhi rombo kodi nyithindhi diegi wok i mwendi pere je 30,000 kodi dhok 3,000. Me oyido owok kwoŋ lim pa kere won.

⁸Jodhum pere bende jowodhi mic ri ji, jocway ri Were i wi migam, kodi Jolevi. Hilikia, Zekaria, kodi Yehiel, jotel madongo ma Ot pa Were, jomiyo jocway ri Were i wi migam nyithindhi rombo kodi nyithindhi diegi 2,600 paka mic ma kalima ma Kadho.

⁹Jotel pa Jolevi, Konania, kodi wutmin go Semaya, Hasabia, Jeyel, kodi Yozabad, jowodho ri Jolevi nyithindhi rombo kodi nyithindhi diegi 5,000 kodi thwondhe 500 paka mic ma kalima ma Kadho.

¹⁰Munyo jotieko cano kisi gimoro je ma kalima, jocway ri Were i wi migam kodi Jolevi jocungo i kabedo pajo cungo kwoŋ cik ma kere owodho.

¹¹Jothumo nyathi rombo ma kalima ma Kadho, aka jocway ri Were i wi migam jokiro remo, kareno Jolevi jodaŋo.

¹²Joketho gicen adec ma mic awaŋa to jopoko kisi peco ŋey jowonyal miyo Rwoth paka ondiki i cik pa Musa. Jotimo gimoro acel gi thwondhe bende.

¹³Jobulo nyathi rombo ma Kalima ma Kadho i wi mac, paka owodhi cik, aka jotedo mic maleŋ i degi, binika kodi sapikere, aka jopoko ji piyo piyo.

¹⁴Rumacen Jolevi jopoko riŋo pajo kodi apa jocway ri Were i wi migam, kwoŋbedo jocway ri Were i wi migam, nyikway Aron oyido joriwin wor gipi miyo mic awaŋa kodi mic mabor mere.

¹⁵Jower ma jonono pa Asaf oyido jomako kabedo pajo ma Kere Daudi omiyo jo; Asaf, Heman, kodi Yeduthun, jatuci Wac Were pa kere. Jokur waŋkace oyido jonitie i kisi waŋkac ma jok'oeye rupiri Jolevi, wade pajo, oyido jotimo ri ji can ma kalima.

¹⁶Ameno paka Kere Yosia owodho cik, otim kisi gimoro i ndelo no, ma kuro kalima ma Kadho kodi miyo mic awaŋa i wi migam pa Rwoth.

¹⁷Ji ma Isiraili m'oyido jonitie jotimo kalima i hongo, kodi kalima ma mugat ma buthow ma ndelo abirio.

¹⁸Wok i hongo pa jatuci wac Were Samwiri, oyido ongoye kere ma Isiraili m'otimo kalima ma Kadho paka ma Yosia, jocway ri Were i wi migam, Jolevi, kodi Joyuda je kodi Isiraili, gi ji m'oyido jobedo i Yerusalem jotimo.

¹⁹Kalima me otim i oro mar'apar g'aboro ma dhum pa Kere Yosia.

²⁰Munyo Kere Yosia otieko timo gime je ri Ot pa Were, Kere Neko ma Misir okadho lweny i Karkemis i malawa Yufrete, aka Yosia otemo cero go.

²¹To Neko odhiro rigo mikwenda ni, “Lweny me kimaki kwoŋin, Kere ma Yuda. Akibino lweny kodin, to gi jokwor paran, aka Were owaco ran redo. Weyi geŋo gima Were mito, kole go nitie kodan ŋey wokiri woreyin.”

²²To Yosia k'onyalo weyo go, kwanyo woko orukere nyaman ŋey wonyali lweny gi Neko. Go k'owinjo wac pa Neko m'owok i dhok Were, to oriwere i lweny kam'obipere i Megido.

²³Munyo jolwenyo, aserin pa Jomisir ocelo Kere Yosia; aka okoko ri ŋecin pere ni, “Kwanyan win woko, alimo litho swa.”

²⁴Ameno ŋecin pere jokwanyo go woko i cawila pere to joketho go i cawila man, to jotero go i Yerusalem. Kenyo go otho, aka oyiki go i kaliel pa kwarere pere. Yuda gipi kodi Yerusalem joywako Yosia.

²⁵Yeremia jatuci wac Were, kodi jower je jocwogo wer ajore ri kere Yosia. Gime olokere kwer ri jower i Isiraili, wero wer ajore me ka joywako go, aka ondiki i wer je mar'ajore.

²⁶Giman je ma kere Yosia otimo, miyirok pere ri Rwoth, kodi winjo cik pa Rwoth,

²⁷kodi kigana pere wok i cakirok tundo i gike, ondiki i kitawo ma Kigana pa Kerin ma Isiraili kodi Yuda.