Read dhopadhola 2 Kigana kwoŋ Kerin 36 Bible Online

2 Kigana kwoŋ Kerin 36 - dhopadhola bible

2 Kigana kwoŋ Kerin 36

¹Ji ma Yuda joyero Yehoahaz wod Yosia lunjo go paka kere.

²Yehoahaz oyido jaoro piero ario g'adek munyo ocako dhum, aka odhumo i Yerusalem ma oro adek.

³Kenyo Neko kere ma Misir otero go paka jatwec to miyo Yuda culo kilo 3,400 ma feza kodi kilo 34 ma zahabu paka misolo.

⁴Neko oketho Eliakim omin Yehoahaz paka kere ma Yuda gi Yerusalem, aka owiro nyinge ni Yehoyakim. To Neko tero Yehoahaz i Misir.

⁵Yehoyakim oyido jaoro piero ario g'abic munyo bedo kere ma Yuda; aka odhumo i Yerusalem ma oro apar g'acel. Go otimo reco ruwaŋ Rwoth Were pere.

⁶Kere Nebukadineza ma Babilon omonjo Yuda, to tweyo Yehoyakim gi lijegere to tero go i Babilon.

⁷Nebukadineza bende okadho g'atewe ma Ot pa Rwoth i Babilon to ketho peco pere i Babilon.

⁸Gigipiny man je ma kere Yehoyakim otimo, kiri gi tim pere mienirok, kodi raco m'otimo je, ondiki i Kitawo pa Kerin ma Isiraili. Wode Yehoyakin olunjo go paka kere.

⁹Yehoyakin oyido jaoro aboro munyo cako dhum, aka odhumo ma dwe adek gi ndelo apar i Yerusalem. Go otimo gimarac ruwaŋ Rwoth.

¹⁰I hongo ma cwir, Kere Nebukadineza ooro t'ikelo go i Babilon paka jatwec, kanyacel g'atewe ma welo wok i Ot pa Rwoth; aka oketho Zedekia omin Yehoyakin paka kere ma Yuda gi Yerusalem.

¹¹Zedekia ocako dhum munyo jaoro piero ario g'acel, aka odhumo ma oro apar g'acel i Yerusalem.

¹²Go otimo gimarac ruwaŋ Rwoth Were pere. Go k'omwole ruwaŋ jatuci wac Were Yeremia, m'oluwo wac pa Rwoth.

¹³Zedekia ogwenyere kwoŋ Kere Nebukadineza, m'omiyo go kwoŋirok i nyingi Were nike lawinjo go. Go otimo wictek to tweyo cunye aka okwero gik bongi Rwoth Were pa Isiraili.

¹⁴Medo kwoŋ meno, jotel ma Yuda, jocway ri Were i wi migam kodi ji je joluwo mienirok pa nonin m'oyido jothoko jo, aka jokoco Ot pa Rwoth m'oyido oloko maleŋ i Yerusalem.

¹⁵Rwoth, Were pa kwarere pajo oyido omedere dhiro jotuci wac Were piro jo, kwoŋbedo go oyido nitie gi wor ri ji pere kodi ot pere,

¹⁶to jomedo ŋalo jomikwenda pa Were, cayo wac pa Were, kodi nyero jotuci wac Were pere, tundo kama keme pa Rwoth olokere madwoŋ kwoŋ jo to m'ongoye both.

¹⁷Riameno Rwoth miyo kere ma Babilon monjo jo, to neko soye pajo g'aserin i Ot pa Were ma k'omako wor gi dhano moro je, nyathi kosa jadwoŋ, ma two kosa maber. Were omiyo joje i cingi kere ma Babilon.

¹⁸Kere ma Babilon onyaga Ot pa Were, lim mere kodi lim pa kere kodi jodhum pere, aka otero je i Babilon.

¹⁹Kere ma Babilon owaŋo woko Ot pa Were, tindi madwoŋ, gi peco pa kere kodi lim mere, aka oturo piny kor ot ma tindi madwoŋ.

²⁰Go otero jom'odoŋ i Babilon tic rigo kodi wote cuka ker ma Pasia otula.

²¹Aka wac ma Rwoth oyido otieko waco gi dhok Yeremia otundo i kare ni, “Lowo ladoŋ nono ma oro piero ario, ma culo waŋ Sabato m'oyido kikur.”

²²I oro marapena ma dhum pa Kere Siras ma Pasia, wac ma Rwoth oyido otieko waco gi dhok Yeremia otundo i kare. Rwoth oguro cuny Kere Siras ma Pasia dhiro mikwenda i ker pere gipi aka owaco i ndiko ni,

²³ “Me cik pa Siras kere ma Pasia. Rwoth, Were ma i polo, omiyin kerin je ma piny, aka otieko miyan meni ma geto Ot pa Were i Yerusalem, manitie i Yuda. Kwoŋ win ma wibedo ji pere, dok win koro, aka weyi Rwoth Were mewin wobedi gi win!”