Read dhopadhola 2 Kigana kwoŋ Kerin 6 Bible Online

2 Kigana kwoŋ Kerin 6 - dhopadhola bible

2 Kigana kwoŋ Kerin 6

¹Kenyo Solomon okwayo ni, “Rwoth, itieko yero bedo i pondeponde kodi mudho.

²Onyo atieko geto rin ot maŋon, kam'ilabed'iye cil gi cil.”

³Joisiraili je oyido jocungo kenyo, aka kere Solomon owire to ŋiyo jo, aka okwayo Were womiy jo silwany.

⁴Solomon owaco ni, “Rwoth Were pa Isiraili wopak! Okuro cikirok pere m'otimo ri baba Daudi, munyo owaco ni,

⁵‘Wok i hongo m'awodho ji paran wok i Misir, fodi akiyero tindi madwoŋ i lowo ma Isiraili ma Ot pa Were ripo woget'iye kam'inyalo laman'iye aka akiyero dhano telo ji paran Isiraili.

⁶To onyo atieko yero Yerusalem paka kabedo m'ilalaman'iye, aka in, Daudi, dhumo ji paran.’ ”

⁷“Baba Daudi oyido ocano geto Ot pa Were ma lamo Rwoth Were pa Isiraili,

⁸to Rwoth owaco rigo ni, ‘Oyido itire mito geto ran Ot pa Were,

⁹t'ikila geto. Obedo wodin, wodin won, ama lageto ran Ot pa Were.’ ”

¹⁰“Aka onyo Rwoth okuro cikirok pere. Alunjo baba paka kere ma Isiraili, aka atieko geto Ot pa Were ma lamo Rwoth Were pa Isiraili.

¹¹Atieko bende ketho kabedo ri Kakan ma Cikirok manitie iye cikirok ma Rwoth otimo Joisiraili.”

¹²Kenyo Solomon ocungo ruwaŋ migam i waŋ cokirok pa Joisiraili, aka orieyo cinge malo,

¹³(Solomon oyido otimo madala ma nyweny to ketho i dier diedipo. Oyido obedo mita 2.2 kisi thenge aŋwen, kodi mita 1.3 i ŋawirok. Oidho madala me, to guro conge piny kama kisi dhano onyalo nen'iye go, to rieyo cinge yupolo)

¹⁴to kwayo ni, “Awi Rwoth, Were pa Isiraili, ongoye Were ma cale in, i polo malo kosa i piny! Ikuro cikirok perin gi ji perin aka inyutho mar makiwire ka jowotho ruwaŋin gi cuny jo je.

¹⁵Itieko kuro cikirok m'itimo gi baba Daudi, konon kisi wac otundo i kare.

¹⁶Onyo riameno, Awi Rwoth, Were pa Isiraili kur bende cikirok man m'itimo gi baba munyo iwaco rigo nike noknok acel kwoŋ nyikwaye bino dhumo paka kere ma Isiraili, k'inen jowinjin paka go.

¹⁷Ameno onyo, Awi Were pa Isiraili, weyi kisi gim'iciko baba Daudi, ŋeca perin wotundi i kare.”

¹⁸ “To Were, inyalo adieri bedo i piny? Ma kiri polo je kilac rin ma romin, ameno Ot pa Were m'ageto me obedi malac ma romin nedi?

¹⁹Rwoth Were paran, abedo ŋeca perin. Winji kwayo paran, aka imiyan gim'akwayin konon.

²⁰Kur Ot pa Were me odieceŋ kodi wor, kabedo m'itieko yero nike wolamin'iye. Winjan k'aŋiyo Ot pa Were me t'akwayo.

²¹Winji kwayo paran gi kwayo pa ji perin ka joŋiyo kabedo me to jokwayo. I nyingin i polo winji wan aka icwaki reco mawan.”

²²“K'osegeya nyatoro timo gimarac ri nyawote t'ikelo go ruwaŋ migam perin i Ot pa Were kwoŋirok nike go bubanja,

²³Awi Rwoth, winji gi polo aka ithumi banja ri ŋecin perin. Miy gir'acula ri ŋatarac aka iwey ŋata bubanja wokadhi.”

²⁴“Ka ji perin Isiraili jokwor pajo jokengila jo kwoŋbedo jotimo reco kwoŋin, to jowire bongin kendo to jobino i Ot pa Were me, pusirok gi mwolo,

²⁵winji jo gi polo. Cwaki reco pajo, aka idwoki jo i lowo m'imiyo kwarere pajo.”

²⁶“K'itweyo koth kwoŋbedo ji perin jotimo reco kwoŋin, ka jopusere to joŋiyo Ot pa Were me kwayin gi mwolo,

²⁷winji jo gi polo. Cwaki reco pa ŋecin perin Joisiraili. Fonji jo timo gimo'tire. Kenyo, Awi Rwoth, dhiri koth i lowo perin me, m'imiyo ji perin paka lim pajo alunja.”

²⁸“Ka kec kosa two nundu obedi i lowo, kosa koyo malieth kosa tome bonyo, onyeki cemo, kosa jokwor pa ji perin jomonji jo iy'acel kwoŋ tindin pajo madongo, kosa two obedi i dier jo,

²⁹Ka Joisiraili perin mogo, wok i ŋuto ma cuny jo, jotiŋ cingi jo malo i Ot pa Were me,

³⁰winji kwayo pajo. Winji jo gi peco perin i polo, cwaki jo, aka kony jo. In kende iŋat'iŋeyo paro ma cuny nyatoro. Tiyi gi kisi nyatoro paka yenyere,

³¹ŋey jowolworin i kwo pajo je i lowo m'imiyo kwarere mawan.”

³²“I nger acel ka japath, ma k'obedo acel kwoŋ ji perin owinji kwoŋ dwoŋ perin kodi gigipiny madongo m'itieko timo ri ji perin, to bino lamin kodi kwayin i Ot pa Were me,

³³winji kwayo pere. I polo, kam'ibed'iye, winji go aka tim gima go kwayin timo, ŋey nonin je i piny gibe jowoŋeyin aka jowowinjin, paka ji perin Isiraili jotimo. Kenyo jobino ŋeyo nike Ot pa Were m'ageto me kabedo m'iripo lamin'iye.”

³⁴“K'imiyo ji perin cik kadho i lweny gi jokwor pajo to jokwayin, kama jobed'iye je, ka joŋiyo tindi madwoŋ me m'iyero kodi Ot pa Were m'ageto rin me,

³⁵winji kwayo pajo. Winji jo gi polo aka miy jo loyo.”

³⁶“Ka ji perin jotimi reco kwoŋin, kole ongoye ŋata kitim reco, to i nge perin iweyo jokwor pajo kikengila jo, t'itero jo paka jotwec i lowo man, bor kosa cegin,

³⁷kucel ka joŋuti reco pajo i lowo m'oter'iye jo paka jotwec, to jopusere, to joywak rin i lowo no, ka jowaco ni, ‘Watimo reco, watimo gi komo; aka watimo gikidakana,’

³⁸Ka jopusere gi cuny jo je kodi adundo pajo je i lowo pa jokwor pajo, ka joŋiyo lowo me, m'imiyo kwarere pajo, tindi madwoŋ me m'iyero, kodi Ot pa Were m'ageto rin me,

³⁹kenyo winji kwayo pajo kodi ywak pajo gi polo kam'ibed'iye, maki wor gi jo aka icwaki reco pajo je.”

⁴⁰“Onyo pama, Awi Were paran, weyi waŋin woyawere kwoŋ wan, aka ciki ithin iwinji kwayo i kabedo me.”

⁴¹“Onyo pama ay malo, Awi Rwoth Were, aka ikadhi i kabedo ma ywomirok perin, in kodi Sanduku ma Cikirok, ranyuth madwoŋ perin. Weyi jocway ri Were i wi migam perin, Awi Rwoth Were, jowolimi both, aka weyi jor'adieri perin jowofore i bero perin.

⁴²Awi Rwoth Were, ikir'ikwer kere m'itieko yero! Poyi mar perin makiwire ri ŋeca perin Daudi.”