Read dhopadhola 2 Kigana kwoŋ Kerin 7 Bible Online

2 Kigana kwoŋ Kerin 7 - dhopadhola bible

2 Kigana kwoŋ Kerin 7

¹Munyo Solomon otieko kwayo, mac owok i polo to waŋo woko mic kodi cowirok awaŋa, aka dwoŋ pa Rwoth oumo Ot pa Were.

²Jocway ri Were i wi migam jok'onyalo kiri donjo i Ot pa Rwoth Were rupiri dwoŋ pa Rwoth oyido oumo.

³Munyo Joisiraili je joneno mac loro piny wok i polo kodi dwoŋ pa Rwoth ka umo Ot pa Were, jokule piny ruwaŋ jo i lowo to jolamo aka jopako Rwoth, ka jowaco ni, “Go ber swa! Mar pere makiwire bedo cil gi cil.”

⁴Kenyo kere Solomon kodi ji je jomiyo Rwoth cowirok.

⁵Solomon omiyo Rwoth cowirok ma siem ma dhok 22,000 kodi rombo 120,000. Aka ameno kere kodi ji je joketho i cingi Rwoth Ot pa Were.

⁶Jocway ri Were i wi migam kodi Jolevi jomako kabedo pajo gi giwer ma Kere Daudi oyido otimo ma pako Rwoth, kareno jowero ni: “Mar pere makiwire bedo cil gi cil.” Paka Daudi oyido owodho or. Jocway ri Were i wi migam oyido jokudho gwara, kareno Joisiraili je jocungo.

⁷I ndelo no won Solomon oloko dier diedipo maleŋ, yuwaŋ Ot pa Were, aka omiyo kenyo mic awaŋa gikululu, mic ma cemo manyinge, kodi mic mabor ogwaŋe paka cowirok ma siem. Otimo gime kwoŋbedo migam ma ywel oyido thin ri cowirok me je.

⁸Solomon kodi Joisiraili je jotimo kalima ma ndelo abirio. Oyido nitie lwak ji wok i ger ma Hamath tundo yumalo kodi kew gi Misir yupiny.

⁹I ndelo mar'aboro jotimo kalima ma cego cokirok, kole oyido jobedo gi ndelo abirio ma ketho i cingi Rwoth migam kodi ndelo abirio man ma kalima.

¹⁰Ka ndelo piero ario g'adek ma dwe mar'abirio, Solomon osewila ji dok i pecin pajo. Ji oyido josangala ro silwany je ma Rwoth oyido otieko miyo Daudi, Solomon kodi ji pere Isiraili.

¹¹Ameno Solomon ocowo geto Ot pa Rwoth kodi ot pa kere; kisi gima Solomon oyido otieko cano timo i Ot pa Rwoth kodi i ot pere won go ocowo maber.

¹²Kenyo Rwoth omenyere ri Solomon to waco rigo ni, “Atieko winjo kwayo perin, aka atieko yero Ot pa Were me paka kam'iripo miyan iye cowirok.

¹³K'acego polo to koth ngoye, kosa amiyo bonyo cik camo cemo, kosa adhiro two nundu i dier ji paran,

¹⁴ka ji paran ma jolwoŋere gi nyingan jomwole, jokway, jorangan, to joweyo yo pajo ma kidakana, kenyo alawinjo gi polo, alacwako reco pajo t'abotho piny pajo.

¹⁵Pama onyo alayawo waŋan aka alaciko ithan winjo kwayo m'ilakwayo ka.

¹⁶Kole pama atieko yero t'aloko ot me maleŋ ŋey nyingan wobedi kenyo cil gi cil, waŋan kodi adundo paran labedo kenyo i hongo je.

¹⁷To ri in, k'inotiy ran paka benin Daudi, kareno iwinjo cik paran kodi gim'amiyin cik timo je,

¹⁸kenyo alaridho dhum perin, paka atimo cikirok gi benin Daudi k'awaco ni, ‘Wangi ilabedo gi nyakwarin ma ladhumo Isiraili.’ ”

¹⁹“To ka winokwer winjo cik kodi or paran m'atieko miyo win, to witiyo ri werin man, to wilamo jo,

²⁰kenyo alafudho win wok i lowo m'atieko miyo win, aka alajwango Ot pa Were me, m'atieko loko maleŋ paka kam'iripo laman'iye. Ji kisi kamoro jolaloko gir'ageca aka jolatero gi cay.”

²¹“Aka Ot pa Were me, ma pama imiyo dwoŋ me, kisi ŋat'oluwi je ladhier to penjo ni, ‘Raŋo Rwoth otimo gime ri lowo me kodi Ot pa Were me?’

²²Ji joladwoko ni, ‘Kwoŋbedo jojwango Rwoth Were m'owodho kwarere pajo wok i piny Misir. Joworo werin man, to jolamo jo; riameno go okelo teko me kwoŋ jo.’ ”