Read dhopadhola 2 Kigana kwoŋ Kerin 8 Bible Online

2 Kigana kwoŋ Kerin 8 - dhopadhola bible

2 Kigana kwoŋ Kerin 8

¹Solomon ogeto Ot pa Were kodi peco pere ma oro piero ario.

²Kere Solomon bende ogeto kendo tindin madongo ma Kere Hiram oyido omiyo go, to ketho Joisiraili bedo i jo.

³Solomon omonjo adec ma Hamath Zoba to mako.

⁴Solomon ogeto tindi madwoŋ Tadmor i thim kodi tindin man m'oyido obedo kakan i Hamath.

⁵Go bende ogeto kendo Bethhoron ma Yumalo kodi ma Yupiny, tindin madongo m'otinda gi kor ot, waŋkace kodi nyweny,

⁶tindi madwoŋ Balath, tindin madongo je ma go okano iye gigipiny, kodi ma kayinin pere kodi cawilin pere oyido jobed'iye. Otimo can pere je ma geto i Yerusalem, i Lebanon, kodi iy'adec je ma go oyido dhumo.

⁷Ri tic pere arom, Solomon ooro nyikway ji ma Kanan ma Joisiraili oyido jok'oneko munyo jotero lowo pajo. Me obedo Joamor, Johiti, Joperiz, Johivi, kodi Joyebus, ma nyikway jo jomedere bedo ŋecin kiri konon.

⁹To Solomon k'ooro Joisiraili i tic arom, jo jotiyo paka jolweny, jotel pa jolweny, jomituka ma cawilin kodi jogwey kayinin pere.

¹⁰Solomon oyido nitie gi jodhum 250 m'oyido jonitie gi dwoŋ kwoŋ ji.

¹¹Solomon okelo dhako pere, nyar farawo wok i tindi pa Daudi bedo i ot m'oyido ogeto rigo, kole go owaco ni, “Dhako paran kiripi bedo i ot pa Kere Daudi ma Isiraili, kwoŋbedo kabedo je ma Sanduku ma Kakan ma Cikirok otieko bed'iye leŋ.”

¹²Kenyo Solomon omiyo cowirok awaŋa ri Rwoth i wi migam m'oyido ogeto yuwaŋ Ot pa Were.

¹³Go omiyo cowirok paka cik pa Musa waco ri kisi ndelo: Sabato, Kalima ma Dwe Manyen kodi Kalima adek ma oro. Kalima ma Mugat ma buthow, Kalima ma Keco kodi Kalima ma Kayindi.

¹⁴Luwo kwoŋ cik ma Daudi bamere oketho, ocano tic ma kisi ndelo ri jocway ri Were i wi migam kodi Jolevi m'oyido jokonyo jo i wer kodi timo tic pajo. Solomon bende oketho jokur ma Ot pa Were i kitipin pajo i kisi waŋkac, luwo kwoŋ cik ma Daudi jacwo pa Were omiyo.

¹⁵Jocway ri Were i wi migam kodi Jolevi joluwo i kare cik je ma Daudi omiyo kwoŋ jo kodi udi ma kan.

¹⁶Ameno tic pa Solomon je oyido orumo wok i ndelo m'ocak'iye misingi ma Ot pa Rwoth cuka Ot pa Rwoth ocow geto maber.

¹⁷Onyo Solomon okadho i Eziongeba kodi Eloth i thengi nam, i piny Edom.

¹⁸Kere Hiram odhiro rigo cwo pere mogo ma jotieko niaŋ tic ma nam tiyo gi ŋecin pa Solomon. Jocewere kidho i lowo ma Ofir, aka jodwoko ri Solomon gi zahabu ma kalo kilo 15,000.