Read dhopadhola 2 Kigana kwoŋ Kerin 9 Bible Online

2 Kigana kwoŋ Kerin 9 - dhopadhola bible

2 Kigana kwoŋ Kerin 9

¹Nyamicala ma Seba owinjo kwoŋ ŋeyirok pa Solomon aka okidho i Yerusalem temo go gi penji matek. Obino gi kitipa madwoŋ ma jotic pere, gi ŋamin ma jotiŋo gigipiny maŋwe kur, thiwino, kodi zahabu madit. Munyo go gi Solomon joromo, openjo Solomon penji je m'oparo kwoŋe.

²Solomon odwoko penji je, aka ongoye gim'otek rigo tito.

³Nyamicala ma Seba owinjo rieko pa Solomon aka oneno peco pere m'ogeto,

⁴cemo m'itoko i meza pere, pecin pa jodhum pere, kitipin pa jotic kodi ŋecin pere kodi nangin pajo ma cale ma joruko, jotic pere, kodi cowirok ma Solomon miyo i Ot pa Were aka cunye okwe.

⁵Nyamicala ma Seba owaco ri Solomon ni, “Gim'awinjo i piny paran ma mako kwoŋ tim perin kodi rieko perin obedo adieri!

⁶To akinyalo yeyo cuka an won abino t'aneno. Aka neni adec mere oyido k'owaci ran. Iriek kalo kama ji jowaco.

⁷Josilwany a ji perin! Josilwany a ŋecin perin me, ma noknok jonitie ruwaŋin aka jonitie gi silwany ma winjo rieko perin.

⁸Rwoth Were perin wopak m'onyutho nger m'osangala iye kodin to kethin kere, dhumo i nyinge. Kwoŋbedo mar pere ri Isiraili kiwire, okethin bedo kere pajo ŋey inyal kuro cik kodi tiro.”

⁹Nyamicala omiyo Solomon mic m'okelo; zahabu ma kalo kilo 4,000 kodi gigipiny maŋwe kur kodi thiwino madit. Ongoye kendo dito ma gigipiny maŋwe kur ma Solomon olimo paka ma nyamicala omiyo go.

¹⁰(Aka ŋecin pa kere Hiram kodi kere Solomon ma jokelo zahabu wok Ofir bende jokelo mbawin ma yen m'ilwoŋo ni algum kodi telin ma welo.

¹¹Solomon ooro mbawin me ma geto madala ma Ot pa Were kodi ma peco pere, kodi timo adungin kodi tongol ri jower. Nger mbawo ma yen algum no fodi k'oneno kendo tundo kiri konon i piny Yuda.)

¹²Kere Solomon omiyo nyamicala ma Seba kisi gima go okwayo, medo i wi mic m'oyido omiyo go loyo m'okelo rigo. Kenyo nyamicala odok i Seba gi jotic pere.

¹³Kisi oro kere Solomon oyido limo zahabu ma romo kilo 23,000

¹⁴medo i wi misolo ma wok bongi jomitan, kerin pa Jowarabu kodi jogavana mar'adec ma Isiraili.

¹⁵Solomon otimo kwote malac 200 gi zahabu m'ocadh, kisi kwot acel otim gi zahabu ma romo kilo abirio.

¹⁶Solomon bende otimo kwote mathindho 300 gi zahabu m'ocadh, kisi kwot acel otim gi zahabu ma romo kilo ario. Kwote me je kere oketho i Ot ma Lul ma Lebanon.

¹⁷Solomon bende otimo kom ma dhum malac gi lak liec, aka oum gi zahabu ma mangil.

¹⁸Kom ma dhum no oyido nitie gi madalin aucel kodi nyathukthuk ma zahabu m'omakere kwoŋe. Oyido nitie gi cinge i kisi thenge, kodi cal ma simbwor i kisi thenge.

¹⁹Oyido nitie cal ma simbwor apar g'ario, acel i gike ma kisi madala. Nger kom ma dhum me oyido ongoye i ker mogo je.

²⁰Atewe pa Kere Solomon ma medho je otim gi zahabu, kiri g'atewe ma Ot ma Lul ma Lebanon je otim gi zahabu ma mangil, kwoŋbedo i ndir pa Solomon feza oyido ongoye gi cwe.

²¹Solomon oyido nitie gi bogi ma mel ma jocewere gi bogi pa Kere Hiram. Dicel kisi oro adek bogi pere oyido dwoko m'otiŋo zahabu, feza, lak liec, oŋere ambu, kodi oŋere.

²²Kere Solomon oyido oŋaŋ aka riek loyo kere man je i piny.

²³Kerin je ma piny jorango Solomon winjo rieko pere ma Were omiyo go.

²⁴Kisi kere okelo rigo mic ma gigipiny m'otimi gi feza, zahabu, nangin, gilweny, gigipiny maŋwe kur, kayinin kodi punde. Gime omedere timirok kisi oro.

²⁵Solomon obedo gi cel kayinin 4,000 gi cawilin, gi kayinin 12,000 m'oketho i tindin madongo ma cawilin kodi i Yerusalem.

²⁶Go odhumo kerin je wok i malawa Yufrete tundo i lowo pa Jofilistia, kodi kew gi Misir.

²⁷I hongo ma dhum pa Kere Solomon feza oyido nitie kisi kamoro paka telin i Yerusalem, aka yen sida oyido thoth paka yen musikamol ma Yuda.

²⁸Oyido ikelo ri Solomon kayinin wok i piny Misir kodi wok i piny man je.

²⁹Tim pa Solomon man je wok i cako tundo i gike, ondiki i kitawo ma Kigana pa jatuci wac Were Nathan, kodi i Wac ma Were oluwo luwo i dhok Ahija ma wok Silo kodi i Menyirok pa Ido, ma bende luwo kwoŋ dhum pa Yerobowam wod pa Nebat

³⁰Solomon odhumo Isiraili gi Yerusalem ma oro piero aŋwen.

³¹Solomon otho aka oyiki go i tindi madwoŋ pa Daudi aka wode Rehobowam olunjo go.