Read dhopadhola Ezira 3 Bible Online

Ezira 3 - dhopadhola bible

Ezira 3

¹Munyo dwe mar'abirio otundo, Joisiraili je oyido jonitie i tindin pajo, aka ji jocokere kanyacel i Yerusalem.

²Kenyo Yesuwa wod Yehozadak, kodi jocway ri Were i wi migam wadi, kodi Zerubabel wod Siltiel kodi wade pere jogeto kendo migam pa Were pa Isiraili, miyo cowirok awaŋa i wiye, paka ondiki i cik pa Musa jacwo pa Were.

³Jogeto migam i misingi mere, makada nende oyido jonitie gi lworo ri joger pajo, aka jomiyo Rwoth cowirok awaŋa i wiye odikin g'othieno.

⁴ Jotimo Kalima ma Kayindi cungo kwoŋ cik mere; aka jomiyo cowirok ma kisi ndelo paka mitere ri kisi ndelo.

⁵Jo bende jomiyo cowirok awaŋa ma jokikeŋ, mic ma Kalima ma Dwe Manyen kodi i kalima je m'ilam'iye Rwoth, kiri gi mic ma dhano won miyo Rwoth.

⁶Wok i ndelo marapena ma dwe mar'abirio jocako miyo Rwoth cowirok awaŋa, makada nende oyido fodi k'okuny misingi ma Ot pa Were.

⁷Ameno ji joculo jogeto kodi jopac pesa, aka jowilo kasike yen sida gi cemo, vini kodi mo wok i tindin madongo Tire gi Sidon. Okeli kasike me piny wok wi gote ma Lebanon luwo gi nam kiri Yopa. Gime je otimere gi cik pa Siras, kere ma Pasia.

⁸Ameno i dwe mar'ario ma oro mar'ario munyo jotieko dwoko i Yerusalem, jocako tic. Me obedo Zerubabel wod Siltiel Yesuwa wod Yehozadak, kanyacel gi ji pajo, jocway ri Were i wi migam gi Jolevi kodi jono je m'oyido jodwoko i Yerusalem wok i twec. Okethi Jolevi je m'oyido jo oro piero ario kadho malo telo geto kendo Ot pa Rwoth.

⁹Yesuwa, wote kodi wade pere, Kadmiel kodi wote, Binuy kodi Jodavia kanyacel gi nyikway Henadad, ama jotelo geto kendo Ot pa Were.

¹⁰Munyo jogeto jocako misingi ma Ot pa Rwoth, jocway ri Were i wi migam joruko law pajo aka jomako kabedo pajo gi gwara i cingi jo, Jolevi ma nono pa Asaf jocungo kenyo gi nyweny m'irudo. Jopako Rwoth cungo kwoŋ cik ma Kere Daudi oyido omiyo.

¹¹Gi pak kodi foyo, jowero wer me ri Rwoth: Rwoth ber, mar pere makiwire ri Isiraili bedo cil gi cil. Kisi dhano okoko gi meni pere, ka jopako Rwoth, kwoŋbedo oyido otiek cako misingi ma Ot pa Rwoth.

¹²To jocway ri Were i wi migam ma joti, Jolevi, kodi jotel nonin m'oyido joneno Ot pa Were marapena, munyo joneno i geto misingi, joywak aka jogoyo ndur, makada nende joman jokoko ri kisangala.

¹³Derino ma koko ma kisangala kodi ywak pa ji oyido kipokere kole ji jokoko malo swa ma owinjere gi bor.