Read dhopadhola Ezira 4 Bible Online

Ezira 4 - dhopadhola bible

Ezira 4

¹Munyo jokwor pa Yuda kodi Benyamin jowinjo ni ji ma jodwoko wok i twec oyido jogeto kendo Ot pa Rwoth, Were pa Isiraili,

²jokidho bongi Zerubabel kodi jotel ma nonin aka jowaco rijo ni, “Weyi wariwere gi win i geto Ot pa Were, kole walamo Were acel ma wilamo, aka oyido ti wamiyo go cowirok wok cuka Esarhadon, kere ma Asiria keli wan bedo ka.”

³To Zerubabel, Yesuwa kodi jotel nonin jodwoko jo ni, “Wakimiti kony mewin geto ot ri Rwoth Were mawan. Wan wegi walageto, paka Siras, Kere ma Pasia owodho or riwan.”

⁴Kenyo ji m'oyido jobedo i lowo no jocako bwoko kodi geŋo kodi kwanyo woko cuny Joyuda kwoŋ geto.

⁵Jo bende jonyewo jodhum ma Pasia geŋo can pajo. Jomedo timo gime i hongo ma dhum pa Siras kiri i dhum pa Dario.

⁶I dhum pa Aritakises, i oro pere m'ocak'iye dhum, jokwor pa ji m'oyido jobedo i Yuda gi Yerusalem jondiko misegey kwoŋ jo.

⁷I oro ma dhum pa Aritakises, kere ma Pasia, Bislam, Mithredath, Tabel, kodi jotic wadi jo jondiko balwa ri kere i Dhoaramayik.

⁸Rehum gavana, Simisay jandiko, bende jondiko balwa me ri Aritakises kwoŋ Yerusalem.

⁹Wok bongi Rehum gavana, Simisay jandiko, jotic wadi jo, jothum banja, kodi jodhum man je, ma jobedo cwo ma jowok i Erek, Babilon, kodi Susa i lowo ma Elam,

¹⁰kanyacel gi nonin je ma Asurbanipal ma jameni aka dwoŋ otero bedo i tindin madongo ma Samaria, kodi kaman je iy'adec ma yupodho ceŋ ma malawa Yufrete.

¹¹Me cal ma balwa ma jodhiro: Ri Kere Aritakises. Ŋecin perin, ji ma jobedo iy'adec kalo malawa Yufrete, jodhiro rin moth. Aka nyo

¹²wamito miyin ŋeyo ni Joyuda ma jodwoko ka i Yerusalem wok i Babilon jogeto kendo tindi madwoŋ me m'opoŋ gwenyirok gi kidakana. Jotieko cako geto kendo kore aka jocegin cowo.

¹³Mondo jadwoŋ, ka tindi madwoŋ me ogeti kendo t'icowo kore mere, ji jolaweyo culo misolo, aka lim perin ma ker lamojere.

¹⁴Onyo, paka wan bende walimo bero ma muluwir aka kiber wan neno gime ka timere, riameno wadhiro rin wac me.

¹⁵Oyido wawaco ni idwari i randik ma kwarere perin jokano. K'itimo, ilanwaŋo ni tindi madwoŋ me jagwenyirok noknok aka wok cene omiyo kerin gi jodhum mar'adec teko. Tek swa dhumo ji mere, aka am'omiyo orey woko.

¹⁶Wamito kere woŋey ni, ka tindi madwoŋ me ogeti kendo t'icowo kore, ilangoye gi lim iy'adec ma yupodho ceŋ ma malawa Yufrete.

¹⁷Kere odhiro radwok me: Ri Rehum gavana, Simisay jandiko, kodi jotic wadi jo ma jobedo i Samaria gi yupodho ceŋ ma malawa Yufrete, amotho win.

¹⁸Balwa ma widhiro ran oloki t'isoma ran.

¹⁹Awodho or wodwari tiende, aka adieri onwaŋere ni wok i hongo macene Yerusalem ogwenyere kwoŋ kerin, aka opoŋ jodudi gi jokitegenya.

²⁰Kerin madongo jodhumo Yerusalem aka jodhumo adec gipi ma yupodho ceŋ ma malawa Yufrete, ka jocoko misolo.

²¹Riameno wodhi win or ni cwo no joripo juko geto kendo tindi madwoŋ cuka anowodhi or.

²²Wikiri wigal, kole wakiripi weyo gime wokal kor wan.

²³Tekin osoma balwa m'owok bongi kere Aritakises ri Rehum, Simisay, kodi jotic wadi jo, joredo kadho i Yerusalem aka joromo Joyuda juko geto kendo tindi madwoŋ.

²⁴ Tic i Ot pa Were oyido ojuki aka oyido ocungo kutho cuka i oro mar'ario ma dhum pa Dario, kere ma Pasia.