Read dhopadhola Ezira 5 Bible Online

Ezira 5 - dhopadhola bible

Ezira 5

¹ I hongo no jotuci wac Were ario, Hagay gi Zekaria wod Ido, jocako luwo i nyingi Were pa Isiraili ri Joyuda m'oyido jobedo i Yuda gi Yerusalem.

² Munyo Zerubabel wod Siltiel gi Yesuwa wod Yehozadak jowinjo mikwenda pajo, jocako geto kendo Ot pa Were i Yerusalem, aka jotuci wac Were ario no jokonyo jo.

³I hongo acel no Tatenay gavana mar'adec ma yupodho ceŋ ma Yufrete, Sethar Bozenay, gi jodhum wadi jo jobino i Yerusalem aka jopenjo ni, “Ŋa m'owodho or riwin geto ot me kendo gi dwoko gigipiny mere?”

⁴Jo bende jopenjo nyingi ji je m'oyido jomiyo kony ma geto Ot pa Were.

⁵To, waŋ Were oyido nitie kwoŋ Joyuda, aka jodhum ma Pasia jok'onyalo juko jo geto cuka jodhiro mikwenda ri Dario to jonwaŋo radwok.

⁶Me mikwenda ma jodhiro ri kere Dario:

⁷“Ri Kere Dario, weyi idhumi i siem.

⁸Mondo Jadwoŋ, ŋey ni wakidho iy'adec ma Yuda aka wanwaŋo ni igeto kendo Ot pa Were madwoŋ gi telin mapando gi mbawin i kore. Tic me itimo gi kinen aka kadho maber.

⁹Kenyo waluwo gi jodongo no aka wapenjo jo ni, ‘Ŋa m'owodho or riwin geto kendo ot me gi dwoko gigipiny mere?’

¹⁰Wapenjo jo bende nyingi jo, ŋey wanyal miyin ŋeyo, ŋey wandiki nyingi ji ma jotelo geto me.

¹¹Jodwoko wan ni, ‘Wabedo ŋecin pa Were ma polo gi piny, aka wageto kendo ot m'oyido ogeti oro kweth yucen, gi kere madwoŋ ma Isiraili.

¹²To kwoŋbedo kwarere mawan jomiyo Were ma i Polo nge, ojwango jo i cingi Kere Nebukadineza ma Babilon, kere ma ker pa Jokaldin, ma joreyo woko ot me to jokadho gi ji i Babilon.

¹³To Kere Siras ma Babilon, i oro marapena ma dhum pere, owodho or ni Ot pa Were iripo geto kendo.

¹⁴Kiri, gigipiny ma zahabu gi feza, ma Kere Nebukadineza oyido okwanyo wok i Ot pa Were i Yerusalem, Kere Siras owodho woko wok i ot pa were ma Babilon, aka omiyo jacwo m'ilwoŋo ni Sesibazar, ma go oketho paka gavana.

¹⁵Siras owaco rigo ni woter jo wokethi i Ot pa Were i Yerusalem, aka wogeti kendo Ot pa Were i gunda mere.

¹⁶Ameno Sesibazar obino to cako misingi mere, geto omedere wok i hongo no tundo gunyo ni, to Ot pa Were fodi k'orumo.’

¹⁷Aka nyo, mondo jadwoŋ, k'inen sangala in, wodhi or worangi i ndiko k'inen adieri kosa be Siras owodho or wogeti kendo Ot pa Were me i Yerusalem, aka iwaci riwan mito perin kwoŋ wac me.”