Read dhopadhola Ezira 6 Bible Online

Ezira 6 - dhopadhola bible

Ezira 6

¹Kenyo Kere Dario owodho or, aka odwar i ndiko ma ker m'oyido okan i Babilon.

²T'inwaŋo i tindi madwoŋ Ekibatana iy'adec ma Mediya gi kitawo m'ondik'iye wac me:

³“I oro marapena ma dhum pere, Kere Siras owodho or ni wogeti kendo Ot pa Were i Yerusalem paka kabedo ma miyo cowirok gi mic awaŋa. Ot pa Were ripo bedo mita piero ario g'ario i ŋawirok kodi piero ario g'ario i laco.

⁴Iripo geto kore i bol mbawo acel i wi bol telin adek. Cul je lawok i mugowa ma kan pa kere.

⁵Kiri gigipiny ma zahabu gi feza ma Kere Nebukadineza okelo i Babilon wok i Ot pa Were i Yerusalem iripo dwoko i kabedo pajo i Yerusalem i Ot pa Were.”

⁶Kenyo Dario odhiro radwok me: “Ri Tatenay gavana ma yuwok ceŋ ma malawa Yufrete, Sethar Bozenay, kodi jodhum wadi win, yuwok ceŋ ma Yufrete. Weyere win gi tic ma Ot pa Were

⁷aka wikiri wijuki geto mere. Weyi gavana ma Yuda gi jotel pa Joyuda jowogeti kendo Ot pa Were i gunda mere.

⁸Awodho or riwin konyo jo geto kendo. Wiripo miyo jome cul je, m'opoŋ aka m'ongoye galo, gi pesa ma wok kwoŋ misolo m'iculo yuwok ceŋ ma Yufrete, ŋey tic no wokiri wocungi.

⁹Kisi gima mitere, rwath dhok, wot rombo, kosa rombo ma mic awaŋa ri Were ma i polo, ŋano, cumbi, vini, kosa mo, paka jocway ri Were i wi migam i Yerusalem jomiti, wiripo miyo jo kisi ndelo ma wikikeŋ,

¹⁰ŋey jowomiy cowirok ma sangala Were ma i polo, aka jowokway ri kwo pa kere gi nyithindho pere.

¹¹Amedo wodho or ni ka nyatoro owir or me, ilaywayo mbawo wok i ot pere, m'oyedhi withe acel, t'icwowo kwoŋe. Aka ot pere ilaloko kidhur yuk.

¹²Weyi Were m'oyero Yerusalem paka kabedo m'iripo lam'iye go womaki ker pa kere kosa piny m'owir or me to temo reyo woko Ot pa Were kenyo. An, Dario, awodho or. Iripo luwo gi kinen je.”

¹³Kenyo Tatenay gavana, Sethar Bozenay, kodi jodhum wadi jo joluwo or pa Kere Dario gi kinen.

¹⁴ Ameno jotel pa Joyuda jogeto aka jomedere maber kareno jotuci wac Were Hagay gi Zekaria jomedo jo meni. Jocowo geto Ot pa Were paka Were pa Isiraili oyido owodho or rijo, gi or pa Siras, Dario gi Aritakises kerin ma Pasia.

¹⁵Ot me ocow geto k'adek ma dwe ma Adar i oro mar'aucel ma dhum pa Kere Dario.

¹⁶Kenyo Joisiraili, jocway ri Were i wi migam gi Jolevi, gi ji m'oyido jodwoko wok i twec je, jotimo kalima ma miyo Were ot gi kisangala.

¹⁷I kalima no jomiyo thwondhe 100 rombo 200 wot rombo 400 paka cowirok, gi diegi apar g'ario paka mic ma cwako reco, acel ri kisi nono pa Isiraili.

¹⁸Kenyo joketho jocway ri Were i wi migam i kitipin pajo gi Jolevi bende tiyo i Ot pa Were cungo kwoŋ fonji manitie i kitawo pa Musa.

¹⁹K'apar g'aŋwen ma dwe marapena ji m'oyido jodwoko wok i twec jotimo kalima ma Kadho.

²⁰Jocway ri Were i wi migam je kodi Jolevi oyido jolokere maleŋ; aka joje oyido jolony. Ameno jothumo ogwaŋe ma cowirok ma kalima ma Kadho ri ji m'oyido jodwoko wok i twec, ri jocway ri Were i wi migam gi jo wegi.

²¹Cemo ma kalima me ocamere gi Joisiraili je m'oyido jodwoko wok i twec gi jono je m'oyido jokwedere kwoŋ tim manyakafir pa nonin m'oyido jobedo i lowo no aka oyido jobino lamo Rwoth Were pa Isiraili.

²²Gi kisangala jotimo Kalima ma Mugat ma buthow ma ndelo abirio; kole Rwoth oyido omiyo jo kisangala gi wiro cuny kere ma Pasia bongi jo, ŋey wokonyi jo gi geto kendo Ot pa Were, Were pa Isiraili.