Read dhopadhola Ezira 9 Bible Online

Ezira 9 - dhopadhola bible

Ezira 9

¹Rumacen ma timo gigipiny me, jodhum jobino bongan aka jowaco ran ni, “Joisiraili, jocway ri Were i wi migam, gi Jolevi, jok'okure kwoŋ nonin ma jobedo i lowo me. Jomako kula ma mienirok pa Jokanan, Johiti, Joperiz, Joyebus, Joamon, Jomowab, Jomisir gi Joamor.

²Kole cwo Joyuda jonywomo mon jopath, aka onyo kodhi maleŋ oruwere gi ji ma lowo me, aka jotel gi jodhum ama jotelo i tim me.”

³Munyo awinjo gime, ayeco woko law paran, aka ajwaco ye wiyan gi ye tikan t'abedo piny i dhier gi rem.

⁴Kenyo jono je ma jokirin ro wac ma Were oyido owaco kwoŋ ngoye g'adieri pa ji m'oyido jodwoko wok i twec jocokere thokan paka abedo piny m'adhier cuka tundo sawa ma miyo cowirok m'othieno.

⁵I sawa ma miyo cowirok m'othieno aay malo wok kam'oyido aywak'iye gi law paran m'oyec, aguro congan piny t'arieyo cingan ri Rwoth Were paran.

⁶Akwayo ni, “Awi Were, anitie gi wickwot madwoŋ swa tiŋo waŋan ruwaŋin. Kole reco mawan odhure bor kalo kiri wiwan, aka komo mawan otundo malo kiri i polo.

⁷Wok i hongo pa kwarere mawan tundo kiri konon wajoreco m'oasere, aka ro reco mawan wan, kerin mawan, gi jocway ri Were i wi migam mawan wapodho i cingi kerin pa jopath, othum wan, onyaga wan, aka otiŋ wan paka jotwec i wickwot paka kiri pama.

⁸To onyo pama i hongo macek, Rwoth Were mawan, inyutho wan wor, t'iyeyo manok kwoŋ wan both bino bedo i Kabedo Maleŋ me i siem. Were mawan oyawo waŋ wan to miyo wan gonyirok kwoŋ twec.

⁹Kole oyido wabedo ŋecin; kucel Were mawan k'ojwango wan i twec. To go omiyo kere ma Pasia tero wan gi wor aka oyeyo wan geto kendo Ot pa Were, m'oyido odoŋ gunda, gi nwaŋo siem ka i Yuda gi Yerusalem.”

¹⁰“To onyo pama, Awi Were mawan, wanowaci rin aŋo ma gime je otieko timere? Kole wajwango or perin kendo,

¹¹m'imiyo wan luwo kwoŋ ŋecin perin jotuci wac Were. Jowaco riwan ni lowo m'oyido wadonjo bed'iye wok i gike tundo i gike obedo lowo makoc ro tim ma mienirok pa nonin m'oyido jobed'iye.

¹²Jowaco riwan ni wakiri wanywom kosa wanywomere gi jo, kosa wakiri wakony jo i nger moro je ŋey wabedi matek to wacamo bero ma lowo me to waweyo ri nyithindho mawan jowolunji cil gi cil.

¹³To makada nende gigipiny ma cale g'ameno otieko timere riwan i gir'acula ro reco mawan gi komo mawan, waŋeyo ni in, Were mawan, imiyo wan gir'acula mathin loyo m'oyido imiyo wan aka iweyo wan both.

¹⁴To onyo, waturo or perin kendo aka wanywomo to wanywomere gi ji ma jotimo gim'ikimiti. Adieri ilamako nge t'ireyo wan kicutho m'ongoye ŋata ladoŋ.

¹⁵Awi Rwoth, Were pa Isiraili, itimo tiro, iweyo wan both, paka wanitie konon. E watuco reco mawan ruwaŋin, wangoye gi dwoŋ bino ruwaŋin ro gime.”