Read dhopadhola Nehemia 13 Bible Online

Nehemia 13 - dhopadhola bible

Nehemia 13

¹I ndelo no munyo isoma kitawo pa Musa ma kisi dhano je winjo, onwaŋ adec ma waco ni Joamon kosa Jomowab jokiripi riwirok gi ji pa Were.

²Me obedo kwoŋbedo Joamon gi Jomowab jok'omiyo Joisiraili cemo kosa pi munyo jowok i Misir. Kwanyowoko, joculo Balam pesa lamo Joisiraili, to Were mawan owiro lam no i silwany.

³Munyo Joisiraili jowinjo osoma cik me, jopokere woko kwoŋ jopath je.

⁴Onyo mafodi gime, Eliasib, jacway ri Were i wi migam, m'oyido obedo jatel ma kisikin ma kan i Ot pa Were, oyido tiyere gi Tobia hongo malac.

⁵Go oyeyo Tobia oro kisika malac m'oyido iripo kan'iye mic ma ŋano kodi buban, gigipiny m'ioro i Ot pa Were, mic pa jocway ri Were i wi migam, acel wiy apar ma ŋano, vini, kodi mo m'imiyo Jolevi, jower kodi jokur ma Ot pa Were.

⁶Munyo gime timere, oyido angoye i Yerusalem, kwoŋbedo i oro ma piero adek g'ario ma dhum pa Kere Aritakises ma Pasia, go oyido obedo kere ma Babilon aka oyido agik bonge. Rumacen ma hongo moro, go oyeyan

⁷gik i Yerusalem. Kenyo aniaŋ kwoŋ komo ma Eliasib oyido otimo gi yeyo Tobia oro kisika i Ot pa Were.

⁸Amako nge swa, aka abolo woko gigipiny pa Tobia ma ot je.

⁹Kenyo awodho or ni wotim kwer ma lonyo kisika, aka wodwok'iye gigipiny ma Ot pa Were, mic ma ŋano, kodi buban.

¹⁰Aniaŋ kendo ni ji oyido jokimiy jower ma Ot pa Were kodi Jolevi adec ma mic m'iripo miyo jo, aka nyo oyido joeye woko i Yerusalem jodok fur ndelin pajo.

¹¹Ameno apusa jodhum aka apenjo jo ni, “Raŋo wijwango Ot pa Were?” Kenyo acoko Jolevi kodi jower t'adwoko jo tic i Ot pa Were kendo.

¹²Ji ma Yuda jocako kelo acel wiy apar ma ŋano, vini, kodi mo i kisikin ma kan.

¹³Aketho cwo me kuro kisikin ma kan: Selemia, jacway ri Were i wi migam, Zadok jafonji cik, Pedaya, Jalevi, Hanan, wod Zakur aka nyakwar Matania oyido obedo jakony pajo. An oyido aŋeyo ni cwo me jogenere i poko wadi jo gigipiny.

¹⁴Poyan, Awi Were paran, ro gigipiny je m'atieko timo ri Ot perin kodi lam'iye.

¹⁵I hongo no aneno ji i Yuda ka jodhiŋo nyingi vini i ndelo ma Sabato. Megi oyido jociwo ŋano, nyingi vini, kodi nyandere kodi gigipiny man i wi punde pajo jotero i Yerusalem. Agwoko jo ni jokiri jowotana cemo i ndelo ma Sabato.

¹⁶Ji mogo ma jowok i tindi madwoŋ Tire m'oyido jobedo i Yerusalem jokelo rec kodi nger gigipiny je i tindi madwoŋ kitana ri ji ma Yuda i ndelo ma Sabato.

¹⁷Apusa jotel pa Joyuda aka apenjo jo ni, “Me raco aŋo ma witimo! Wiloko ndelo ma Sabato makoc!

¹⁸Cango Were k'omiyo tindi madwoŋ me gir'acula kwoŋbedo kwarere mawan jotimo nger gime! Kucel ee kendo wilwoŋo keme pa Were kwoŋ Isiraili gi loko Sabato makoc!”

¹⁹Ameno awodho or ni wocegi waŋkace ma tindi madwoŋ ka ndelo ma Sabato cakere, tekin piny cako yutho, aka okiri woyawi cuka Sabato rumo. Aketho cwo paran mogo kuro waŋkace neno ni ongoye gim'ikelo i tindi madwoŋ i ndelo ma Sabato.

²⁰Jomitan ma jotana nger gigipiny je jonindo woko ma tindi madwoŋ dicel kosa dirio.

²¹To agwoko jo aka apenjo jo ni, “Raŋo winindo ruwaŋ kor ot? Ka winotim ameno kendo, alamako win.” Wok i ndelo no jok'odwoko i ndelo ma Sabato.

²²Amiyo Jolevi cik lokirok maleŋ aka jokadhi jowokuri waŋkace neno ni okur Sabato maleŋ. Poyan, Awi Were paran, ri gime bende, aka ikuran ro dwoŋ ma mar perin makiwire.

²³I hongo no bende aniaŋ ni cwo kweth ma Joyuda oyido jonywomo mon jopath wok i Asdod, Amon, kodi Mowab.

²⁴Adec ma nyithindho pajo oyido joluwo dhodhok Asdod kosa dhodhok man aka oyido jokuya luwo dhodhok mawan won.

²⁵Apusa cwo no, alwoŋo lam kwoŋ jo, agoyo jo, aka ajwaco woko ye tik jo. Kenyo amiyo jo kwoŋirok i nyingi Were ni jo kosa nyithindho pajo, jokilanywomo kosa nywomirok gi jopath.

²⁶Awaco rijo ni, “Mon jopath ama jomiyo Kere Solomon timo reco. Go oyido obedo jacwo madwoŋ loyo kerin ma piny man je. Were omaro go aka oketho go kere pa Joisiraili, to, kucel go otimo reco me.

²⁷Onyo waluw gima witimo, aka watim gir'akor kwoŋ Were mawan gi nywomo mon jopath?”

²⁸Acel kwoŋ wot Yoyada, wod Eliasib, jadwoŋ pa jocway ri Were i wi migam, onywomo nyar Sanbalat, ma wok i tindi Bethhoron, ameno amiyo Yoyada eye woko i Yerusalem.

²⁹Poyi jo, Awi Were paran, kwoŋbedo jokoco tic ma cwayo rin, cikirok ma cango itimo gi jocway ri Were i wi migam kodi Jolevi.

³⁰Ameno alonyo woko ji kwoŋ gigipiny pa jopath je. Aketho cik ri jocway ri Were i wi migam kodi Jolevi ŋey kisi dhano wonyali ŋeyo tic pere.

³¹Atimo can ri yen ma waŋo mic i sawa ma ripo, kodi ri ji kelo mic pajo ma ŋano, kodi olemo macek marapena. Poyan, Awi Were paran, ro bero m'atieko timo.