Read dhopadhola Nehemia 3 Bible Online

Nehemia 3 - dhopadhola bible

Nehemia 3

¹Kenyo Eliasib jadwoŋ pa jocway ri Were i wi migam jocako tic gi jocway ri Were i wi migam wadi aka jogeto kendo Waŋkac ma Rombo. Joloko maleŋ tundo kiri i Acurcur ma Miya tundo kiri i Acurcur ma Hananel.

²Aka cwo ma jowok Yeriko jogeto adec ma luwo. Zakur wod Imiri ogeto adec ma luwo.

³Wot Hasena jogeto Waŋkac ma Rec. Joketho miango mere gi thigin i kabedo, aka joketho peta gi nywenye ma cego.

⁴Meremoth, wod Uriya nyakwar Hakoz, ogeto adec ma luwo. Mesulam, wod Berekia aka nyakwar Mesezabel ogeto adec ma luwo. Zadok wod Bana ogeto adec ma luwo.

⁵Cwo ma jowok Tekowa jogeto adec ma luwo, to jodongo ma tindi jokwero timo tic acingi ma rwodhe pajo jomiyo jo.

⁶Yoyada wod Paseya gi Mesulam wod Besodeya jogeto kendo Waŋkac ma Yesana. Joketho miango mere, thigin, petin gi nywenye ma cego.

⁷Melatia ma wok Gibeon, Yadon ma wok Meronoth, gi cwo ma jowok i Gibeon gi Mizipa jogeto adec ma luwo, tundo kiri peco pa gavana ma yupodho ceŋ ma Yufrete.

⁸Uziel wod Harhaya, jacwogi gigipiny gi nywenye, ogeto adec ma luwo. Hanania jayiki mo maŋwe kur ogeto adec ma luwo meno, aka otundo kiri i Kor ot ma woko mere.

⁹Refaya wod Hur, m'oyido dhumo adec Yerusalem, ogeto adec ma luwo.

¹⁰Yedaya wod Harumaf ogeto adec ma luwo, m'oyido cegin gi ot pere. Hatus wod Hasabineya ogeto adec ma luwo.

¹¹Malikija wod Harim gi Hasub wod Pahath Mowab ogeto adec ma luwo gi Acurcur Oven.

¹²Salum wod Halohes, m'oyido dhumo adec Yerusalem man ogeto adec ma luwo. (Nyir pere jokonyo go gi tic.)

¹³Hanun gi ji ma jobedo i tindi madwoŋ Zanowa jogeto kendo Waŋkac ma Milelo. Joketho thigin mere i kabedo, petin gi nywenye ma cego waŋkac, aka joyiko kore mere mita 440 tundo kiri i Waŋkac ma Woyo.

¹⁴Malikija wod Rekab, jadhum mar'adec ma Beth Hakerem, ogeto kendo Waŋkac ma Woyo. Oketho thigin mere i kabedo, petin gi nywenye ma cego waŋkac.

¹⁵Salum wod Kolhoze, jadhum mar'adec ma Mizipa, ogeto kendo Waŋkac ma Kidiwa; oumo royo mere, oketho thigin i kabedo, petin gi nywenye. Go ogeto kor ot macegin gi ndelo pa kere i kidiwa ma Sela, tundo kiri i madala ma kadho piny wok i tindi madwoŋ pa Daudi.

¹⁶Nehemia wod Azibuk, jadhum mar'adec ma Bethzur, ogeto adec ma luwo, tundo kiri i kaliel pa Daudi, kabuko pi gi ot pa jolweny.

¹⁷Me Jolevi ma jogeto adec man ma kor ot. Rehum wod Bani ogeto adec ma luwo. Hasabia, jadhum mar'adec ma Keila ogeto adec ma luwo i nyingi ji mar'adec pere.

¹⁸Bavay wod Henadad, jadhum mar'adec ma Keila ogeto adec ma luwo.

¹⁹Eza wod Yesuwa, jadhum ma Mizipa, ogeto adec ma luwo ruwaŋ kakano gilweny, tundo kiri kama kor ot gonder'iye gine.

²⁰Baruk wod Zabay ogeto adec ma luwo, tundo kiri i dhiot ma ot pa Eliasib jadwoŋ pa jocway ri Were i wi migam.

²¹Meremoth wod Uriya aka nyakwar Hakoz, ogeto adec ma luwo, tundo kiri i gike ma ot pa Eliasib.

²²Me jocway ri Were i wi migam ma jogeto adec man ma kor ot. Jocway ri Were i wi migam ma jowok thoko Yerusalem jogeto adec ma luwo.

²³Benyamin gi Hasub jogeto adec ma luwo, m'oyido nitie ruwaŋ udi pajo. Azaria, wod Maseya aka nyakwar Anania, ogeto adec ma luwo m'oyido nitie ruwaŋ ot pere.

²⁴Binuy wod Henadad ogeto adec ma luwo, wok i ot pa Azaria tundo i sonda ma kor ot.

²⁵Palal wod Uzay ogeto kendo adec ma luwo, m'ocako i sonda ma kor ot gi acurcur ma ot pa kere ma malo cegin gi kabedo pa jakur. Pedaya wod Paros ogeto adec ma luwo,

²⁶tundo kiri kama jotic ma Ot pa Were jobed'iye m'oyido cegin gi tindi madwoŋ Ofel gi kam'obedo tirtir gi Waŋkac ma Waŋ pi yuwok ceŋ gi acurcur ma umo Ot pa Were.

²⁷Cwo ma jowok Tekowa jogeto adec ma luwo, aka oyido obedo adec pajo mar'ario, wok kam'obedo tirtir gi acurcur malac ma umo Ot pa Were tundo kiri i kor ot macegin gi Ofel.

²⁸Kitipa pa jocway ri Were i wi migam jogeto adec ma luwo, wok yumalo ma Waŋkac ma Kayina, kisi dhano ogeto ruwaŋ ot pere won.

²⁹Zadok wod Imer ogeto adec ma luwo, m'oyido nitie ruwaŋ ot pere. Samaya wod Sekaniya, jakur ma Waŋkac ma yuwok ceŋ, ogeto adec ma luwo.

³⁰Hanania wod Selemia gi Hanun, wod Zalaf mar'aucel, jogeto adec ma luwo, m'obedo adec pajo mar'ario. Mesulam wod Berekia ogeto adec ma luwo, m'oyido nitie ruwaŋ ot pere.

³¹Malikija, jacwogi gigipiny gi cuma, ogeto adec ma luwo, tundo kiri i geto ma jotic ma Ot pa Were gi jomitan jooro, m'oyido cegin gi Waŋkac ma Mifkad, cegin gi kisika ma malo i sonda.

³²Jocwogi gigipiny gi nyweny gi jomitan jogeto adec macowe, wok i kisika manitie i sonda tundo kiri i Waŋkac pa Rombo.