Read dhopadhola Nehemia 5 Bible Online

Nehemia 5 - dhopadhola bible

Nehemia 5

¹Onyo ji jobedo gi ywak madwoŋ swa kwoŋ Joyuda m'oyido jobedo jotel.

²Kole nitie jono ma jowaco ni, “Wanitie gi peco malac, waripo limo ŋano ma pidhirok.”

³Oyido nitie jono bende ma jowaco ni, “Wasinga ndelin mawan gi ndelin vini gi udi mawan nyaka wanyal limo ŋano i hongo ma kec.”

⁴Aka oyido nitie jono ma jowaco ni, “Wakopa pesa ma culo misolo pa kere i ndelin mawan gi ndelin vini mawan.

⁵Wabedo Joyuda paka jo bende, aka nyithindho mawan bende jobedo ji paka nyithindho pajo; kucel joriyo nyithindho mawan bedo ŋecin. Nyir mawan megi otiek kitana woko jo paka ŋecin. Wangoye gi kony kwoŋbedo omay wan ndelin mawan gi ndelin vini mawan.”

⁶Munyo an, Nehemia awinjo ywak pajo gi kiŋunyaŋunya pajo, amako nge swa.

⁷Munyo atieko paro kwoŋ gime, akelo banja kwoŋ jotel gi jodhum, aka awaco rijo ni, “Winyalo nedi miyo ji mewin won culo magowa?” Kenyo alwoŋo cokirok pa ji aka asegeya jo.

⁸Awaco rijo ni, “Paka wanyalo, wanyewo woko ji mawan m'oyido otana i twec. To win ee, kendo witana megi kwoŋ jo aka wanyew!” Jodhum gi jotel jok'otuco wac, kwoŋbedo oyido joŋeyo ni obedo adieri.

⁹Amedo waco ni, “Gima witimo me okom! Wiripo winjo Were to witimo gim'otire ŋey wikiri wimiy nonin ma jobedo jokwor mawan jowoyet wan.

¹⁰Wade paran, merin paran gi an bende oyido wakopa ji pesa gi ŋano, to, wakiripi kendo kibanja cul.

¹¹Onyo dwoki win rijo, konon won me, ndelin pajo, ndelin vini pajo, ndelin oliv gi udi pajo, magowa ma pesa, ŋano, vini gi mo m'oyido wikwanyo wok bongi jo.”

¹²Jotel jodwoko ni, “Waladwoko gigipiny je aka wakilakibanja kendo. Walatimo paka iwaco.” Aka alwoŋo jocway ri Were i wi migam t'amiyo jotel kwoŋirok, timo paka jowaco.

¹³Kenyo agonyo dende m'oyido atweyo i pieran t'ayengo aka awaco ni, “Ameno weyi Were woyengi woko ŋata k'okuro cikirok pere. Were lamayin udi gi lim perin je t'idoŋ nono.” Ji m'oyido jonitie i cokirok je jodwoko ni, “Obedi ameno.” Jopako Rwoth aka jotel jokuro cikirok pajo.

¹⁴Wok i hongo m'oyido abed'iye gavana ma Yuda, wok i oro piero ario ma dhum pa Kere Aritakises, tundo i oro piero adek g'ario ma dhum pere, ongoye kwoŋ an kosa wade paran ŋat'ocamo cemo m'oyido obedo apa gavana.

¹⁵Jogavana ma jotelo dhumo ran oyido joketho bieto mapek kwoŋ ji, to jomiyo jo culo penzi feza piero aŋwen kisi ndelo ma cemo gi vini pajo. Kiri ŋecin pajo je oyido jodiyo ji. To, akitimo ameno, kwoŋbedo oyido alworo Were.

¹⁶Adieri, amiyere ri tic ma geto kendo kor ot aka akilimo lim kad'acel. Kisi ŋat'oyido tiyo ran bende otimo ameno.

¹⁷Noknok oyido apidho Joyuda 150 gi jotel pajo, medo i wi ji m'oyido jobino bongan wok i piny man m'othoko wan.

¹⁸Kisi ndelo athumo thwon, rombo aucel mabeyo, gwendi kweth, aka kisi k'apar orumo apoko vini mandiko. To oyido aŋeyo bieto mapek ma ji oyido jotiŋo, ameno akikwayo cul ma gavana oyido ripo nwaŋo.

¹⁹Awi Were paran, poyi gigipiny je m'atieko timo ri ji me, ri bero paran.