Read dhopadhola Nehemia 6 Bible Online

Nehemia 6 - dhopadhola bible

Nehemia 6

¹Onyo okow ri Sanbalat, Tobia gi Gesem gi jokwor mawan je ni oyido watieko geto kor ot aka waculo kisi kamoro, makada nende oyido fodi wakiketho thigin i waŋkace.

²Sanbalat gi Gesem jodhiro ran mikwenda ni arom gi jo iy'acel kwoŋ loka ma milelo ma Ono. Me oyido obedo rieko pajo ma timo ran gimarac.

³Ameno aoro jomikwenda waco rijo ni, “Atimo tic madwoŋ aka akinyali bino piny koro. Akinyali cungo tic, ro nyaka bino romo gi win.”

⁴Jodhiro ran mikwenda acel diŋwen, aka amiyo jo radwok acel no won.

⁵I nger acel Sanbalat odhiro ran ŋeca pere gi mikwenda mar'abic, gi balwa ma k'omwon.[2]

⁶Ondik'iye ni, “Nitie wac pokopoko ma winjere i dier nonin ni in gi Joyuda wimito gwenyirok, aka am'omiyo wigeto kendo kor ot, kwoŋbedo imito bedo kere. Aka Gesem bende waco ni obedo adieri.

⁷Iketho kiri jotuci wac Were i Yerusalem, waco ni pama ibedo kere ma Yuda. Iŋeyo paka kere ma Pasia lawinjo kwoŋ gime, riameno ber warom ŋey waluw kwoŋ gime.”

⁸Adhiro rigo radwok ni, “Ongoye kwoŋ gim'iwaco no m'obedo adieri. Meno gima in won icwogo i paro perin.”

⁹Oyido jotemo bwoko wan ŋey tic wocungi. To akwayo Were womiyan meni.

¹⁰Ndelo acel munyo akidho i ot pa Samaya wod Delaya aka nyakwar Mehetabel, m'oyido kinyal wok i ot pere. Go owaco ran ni, “Weyi wakadhi wapondi i Kabedo Maleŋ i Ot pa Were aka wacegi thigin, kole ibino nekin, adieri, wor me jobino nekin.”

¹¹To adwoko go ni, “Akibedo kite ŋata ŋweco to pondo. Iparo ni anyalo temo botho kwo paran gi pondo i Ot pa Were? Akibino timo gino.”

¹²Kenyo aniaŋ aka aneno ni Were oyido k'ooro go, to Tobia gi Sanbalat am'oyido jonyewo go thumo ran rieko.

¹³Jonyewo go ri atoŋa me, bwokan gi miyan timo reco, kwoŋbedo oyido jomito nyeko nyingan.

¹⁴Kenyo akwayo Were ni, “Awi Were paran, poyi gima Sanbalat gi Tobia jotimo aka imiy jo gir'acula. Poyi dhako no Nowadia gi jotuci wac Were man je ma jotemo bwokan.”

¹⁵Ameno geto kendo kor ot orumo ka piero ario g'abic i dwe ma Elul[3] aka geto otieko ndelo piero abic g'ario.

¹⁶Munyo jokwor mawan i piny m'othoko wan je jowinjo gime, jobedo gi lworo, kole joniaŋ ni tic me orumo gi kony pa Were mawan.

¹⁷Aka kiri i hongo me je jotel ma Yuda jondiko balwin ri Tobia, aka Tobia bende ondiko rijo.

¹⁸Kole ji madit i Yuda oyido jonitie i thenge pere, kwoŋbedo go oyido obedo or Sekaniya wod Ara; aka wode Yehohanan oyido onywomo nyar Mesulam wod Berekia.

¹⁹Ji oyido jowaco ran tim pa Tobia maber, aka oyido jokowo rigo wac paran je. Ameno Tobia obedo ka dhiro ran balwin, ma temo bwokan.