Read dhopadhola Nehemia 8 Bible Online

Nehemia 8 - dhopadhola bible

Nehemia 8

¹I dwe mar'abirio Joisiraili je jobedo i tindin pajo. K'acel ma dwe no joje jocokere kanyacel i Yerusalem i kapido ruwaŋ Waŋkac ma Waŋ pi. Jokwayo Ezira, jafonji ma Cik, aka jandiko kelo kitawo m'ondik'iye Cik pa Musa, ma Rwoth oyido omiyo Joisiraili.

²Ameno Ezira okelo kama ji oyido jocoker'iye, cwo, mon gi nyithindho m'oyido jonitie gi niaŋ.

³Ezira osoma Cik pa Musa wok odikin tundo sawa aucel, aka ji je oyido jociko ithi jo winjo.

⁴Ezira oyido ocungo i wi kituti m'otimi gi mbawo ri atoŋa me. Me cwo m'oyido jocungo yuracuc pere: Matithia, Sema, Anaya, Uriya, Hilikia, gi Maseya. Aka yuracam pere oyido ocungo: Pedaya, Misael, Malikija, Hasum, Hasbadana, Zekaria, gi Mesulam.

⁵Paka Ezira ocungo malo i wi kituti, ji je joriko waŋ jo kwoŋe. Tekin go yawo kitawo ni, ji je joay malo.

⁶Ezira owaco ni, “Rwoth, Were madwoŋ wopak!” Ji je jotiŋo cingi jo malo i koyo aka jodwoko ni, “Obedi ameno! Obedi ameno!” Jokule piny to jolamo gi nyim jo piny i lowo.

⁷Rumacen ji joay malo to jocungo, aka Jolevi me jokonyo jo niaŋ Cik: Yesuwa, Bani, Serebia, Jamin, Akub, Sabethay, Hodia, Maseya, Kelita, Azaria, Yozabad, Hanan, gi Pelaya.

⁸Josoma cik pa Were ka jowiro ri ji i dhodhok m'oyido jonyalo niaŋ maber.

⁹Nehemia m'oyido obedo gavana, Ezira jacway ri Were i wi migam aka jafonji ma Cik gi Jolevi m'oyido jowiro ri ji cik jowaco ri ji ni, wikiri wiywak rupiri ndelo me obedo ndelo maleŋ ri Rwoth Were mewin. Ato ji oyido joywak munyo jowinjo gima Cik waco.

¹⁰Nehemia owaco ri ji ni, “Kadhi win yo mewin, cami win cemo aka wimadhi vini to wipoko ji ma jongoye gine. Konon me obedo ndelo maleŋ ri Rwoth Were mawan, aka wikiri wikumi. Kole kisangala pa Rwoth obedo meni mewin.”

¹¹Jolevi jorendo ji ka jowaco ni, “Liŋ win ywak, kole konon obedo ndelo maleŋ, wikiri wikumi.”

¹²Ameno ji jodok pecin pajo, jocemo to jomedho aka jopoko wadi jo m'oyido jongoye gine, kwoŋbedo oyido joniaŋ cik m'osoma rijo.

¹³Yawere jotel nonin, kanyacel gi jocway ri Were i wi migam gi Jolevi, jokidho bongi Ezira fonjirok Cik.

¹⁴Kenyo joniaŋ wok i Cik, ma Rwoth omiyo Musa ni, Rwoth omiyo Joisiraili cik bedo i kayindi i hongo ma kalima ma dwe mar'abirio ma oro.

¹⁵Aka bende joripo waco i tindin pajo je gi Yerusalem ni, “Kadhi win i tendere wijaki jangi yen ma boke pajo nyabokependi ma gero kayindi paka ondiki i Cik.”

¹⁶Ameno ji jojako jangi yen aka jogeto kayindi pajo, megi i wi udi pajo, i diedipo pajo gi i diedipo ma Ot pa Were, gi karomo ruwaŋ Waŋkac ma Waŋ pi gi Waŋkac pa Efrayim.

¹⁷Ji je m'oyido jodwoko wok i twec jogero kayindi aka jobed'iye. Me oyido obedo ma dicel jo timo ameno wok i hongo pa Yesuwa wod Nun, aka kisi dhano ofore gi kisangala.

¹⁸Wok i ndelo marapena ma kalima tundo i ndelo macowe jobedo ka josoma adec wok i Cik pa Were kisi ndelo. Jotimo kalima ma ndelo abirio, aka i ndelo mar'aboro jotimo kalima ma cego paka Cik waco.