Read dhopadhola Nehemia 9 Bible Online

Nehemia 9 - dhopadhola bible

Nehemia 9

¹Onyo ka piero ario g'aŋwen ma dwe mar'abirio ji oyido jocokere joriyo kec i kutiyin to jowiro i wi jo fukefuke ma nyutho rem.

²Joisiraili jopokere kwoŋ jopath, aka jocungo to jotuco reco pajo gi reco pa kwarere pajo.

³Ma sawa ma romo adek josoma Cik pa Rwoth Were pajo, aka ma sawa ma romo adek kendo jotuco reco pajo to jolamo Rwoth Were pajo.

⁴Kenyo Yesuwa, Bani, Kadmiel, Sebania, Buni, Serebia, Bani gi Kenan jocungo i wi kituti pa Jolevi aka joywak gi dwondi gin malo ri Rwoth Were pajo.

⁵Kenyo Jolevi, Yesuwa, Kadmiel, Bani, Hasabineya, Serebia, Hodia, Sebania, gi Pethahia jowaco ni, “Ay win malo wipak Rwoth Were mewin, pak win go cil gi cil. Weyi kisi dhano wopak nyingi go madwoŋ, makada nende go dwoŋ loyo pak pa dhano.”

⁶Kenyo ji jokwayo ama: “In kende, ibedo Rwoth, icweyo polo gi micalin je. Icweyo lowo gi nam gi cwec ma jokwo i joje, imiyo joje kwo. Waŋceŋ, dwe gi micalin je jolamin.

⁷In, Rwoth Were, iyero Abram, iwodho go wok i Ur i Babilon, aka iwiro nyinge ni Abraham.

⁸Inwaŋo ni Abraham oyido timo adieri, aka itimo gi go cikirok. Iciko miyo go lowo ma Kanan, lowo pa Johiti, Joamor, Joperiz, Joyebus, gi Jogirigas, bedo lowo pa nyikwaye. Onyo ikuro cikirok me, kwoŋbedo itimo adieri.”

⁹“Ineno candirok pa kwarere mawan i Misir iwinjo ywak pajo ri kony i Nam M'obokere.

¹⁰ Itimo gir'aura m'okelo dhier kwoŋ Kere ma Misir, jodhum pere gi ji ma lowo pere, kwoŋbedo oyido iŋeyo nger ma jodiy'iye ji perin. Aka ilimo dwoŋ tundo gunyo ni.

¹¹Ibaro royo i nam ri ji perin, aka itelo jo i lowo m'othwo. Jono m'oyido joriemo jo jomunyere i pi maluth, paka tele luthere i nam.

¹²Itelo jo gi siro ma pondeponde odieceŋ, aka wor imenyo rijo gi siro ma mac.

¹³Iloro piny wok i polo wi got Sinai, aka imiyo jo Or gi fonji maber.

¹⁴Ifonjo jo kuro Sabato maleŋ, aka imiyo jo Cik luwo kwoŋ ŋeca perin Musa.”

¹⁵“Munyo kec oneko jo, imiyo jo mugat wok i polo, gi pi wok i tele munyo riyo oneko jo. Iwaco rijo mako lowo, m'oyido iciko jo.

¹⁶To kwarere mawan jobedo gi noro gi wictek, aka jokwero winjo cik perin.

¹⁷Jokwero winjo, wi jo owil gi gim'imito je, gi gir'aura m'oyido itieko timo. I noro pajo joyero jatel dwoko jo i twec i Misir. To ibedo Were ma cwako; inyutho wor, ipoŋ gi mar makiwire, aka ikimaki nge piyo. Inyutho wor madwoŋ, aka ikijwango jo.

¹⁸Jotimo cal ma rwath, aka jolwoŋo ni were pajo m'owodho jo wok i Misir! Awi Rwoth, neni nger ma jocayin'iye!

¹⁹To ikijwango jo kenyo i thim, kole inyutho wor madwoŋ. Imedo telo jo gi siro ma pondeponde odieceŋ, aka wor gi siro ma mac.

²⁰I bero perin iwaco rijo gima joripo timo, ipidho jo gi mana aka imiyo jo pi amadha.

²¹Ma oro piero aŋwen i thim imiyo jo gima jomito je; nangin pajo k'oyec, aka tiendi jo k'obomere.”

²²“Imiyo jo kikengila kerin gi nonin, aka jotero lowo pajo. Jomako kiri lowo ma Hesbon ma Kere Sihon oyido dhumo, gi lowo ma Basan ma Kere Og oyido dhumo.

²³Imiyo jo nyithindho kweth ma cale micalin i pondeponde, aka iweyo jo bedo i lowo, m'oyido iciko kwarere pajo ni ilamiyo jo.

²⁴Jomako lowo ma Kanan, ikengila rijo ji m'oyido jobedo kenyo. Imiyo ji perin meni timo paka jomito, gi ji kodi kerin ma Kanan.

²⁵Jomako tindin madongo matek, lowo maber, udi m'opoŋ lim, buce m'okuny ma kano pi, yen oliv, yen ma nyak nyandere, gi ndelin vini. Jocamo gima jomito je aka jopoŋ; aka jofore gi gigipiny mabeyo je m'imiyo jo.”

²⁶“To ji perin jogwenyere aka jok'owinjin, jowiro dieŋey jo ri Cik perin. Joneko jotuci wac Were ma jogwoko jo, ma jowaco rijo gik bongin. Jocayin swa.

²⁷Ameno imiyo jo i cingi jokwor pajo, ma jomiyo jo candirok. Joywak rin i candirok pajo, aka iwinjo jo gi polo. Aka kwoŋbedo inyutho wor madwoŋ, idhiro rijo joboth, botho jo wok i cingi jokwor pajo.

²⁸To munyo oyido jonitie i siem, jotimo reco ruwaŋin kendo, aka ijwango jo i cingi jokwor pajo, ŋey jodhumo jo. Kucel munyo jopusere to jokwayin botho jo, iwinjo gi polo, aka ibotho jo dikweth, kwoŋbedo inyutho wor madwoŋ.

²⁹Igwoko jo wirok winjo cik perin, to i noro jokwero cik perin, makada nende kuro Cik perin obedo yo ma kwo. Jotimo gi cay gi wictek, jokwero winjo.

³⁰Ma oro kweth, ibedo moth gi jo, aka igwoko jo gi cuny perin luwo kwoŋ jotuci wac Were perin, to jok'onyalo winjo. Riameno iweyo nonin man kikengila jo.

³¹To kwoŋbedo inyutho wor madwoŋ, ikijwango jo, kosa ikireyo woko jo. Inyutho wor aka inyutho wor Awi Were!”

³²“Awi Were, Were mawan, idwoŋ! Ikelo lworo, aka ijameni! Ro mar perin makiwire, ikuro cikirok perin, ikir'iter gi sewo dinyo je m'otieko podho kwoŋ wan, kerin mawan, jodhum, jocway ri Were i wi migam, jotuci wac Were, kwarere mawan, gi ji mawan je, wok i hongo ma kerin ma Asiria jodiyo wan'iye tundo gunyo ni.

³³Itimo gim'otire miyo wan gir'acula, kole itimo adieri, to watimo gikidakana.

³⁴Kwarere mawan, kerin mawan, jotel, gi jocway ri Were i wi migam, jok'okuro Cik perin. Jok'owinjo or perin gi fonji perin.

³⁵Imiyo jo silwany gi keri, gi lowo ma diwa, maber, to jokwero tiyo rin, aka jok'oweyo tim pajo ma kidakana.

³⁶Onyo neni, konon wabedo ŋecin i lowo m'imiyo wan, lowo maber me ma miyo wan cemo.

³⁷Gima lowo nyak je itero ri kerin, m'imiyo jo dhumo wan kwoŋbedo watimo reco. Jotimo gima jomito gi delkwoŋ wan g'ogwaŋe mawan, aka wanitie i litho madwoŋ!”

³⁸Ameno, Joisiraili jotimo cikirok m'ondiki piny ma joridho, aka jodhum pajo, Jolevi, gi jocway ri Were i wi migam joketh'iye cingi gin.