Read dhopadhola Esita 1 Bible Online

Esita 1 - dhopadhola bible

Esita 1

¹Gim'ondiki i kitawo me otimere i ndir ma dhum pa Kere m'ilwoŋo ni Aritakises m'odhumo adec kweth ma kalo 127 wok i piny Indiya tundo i thenge ma piny Ethopiya. I hongo me, kere oyido nitie i kom pere ma dhum i piny Pasia, i tindi madwoŋ Susa.

³I oro mar'adek ma dhum pere, kere otimo kalima madwoŋ swa ri jodhum kodi jotel pere. Jolweny ma Pasia kodi Mediya, jotel kodi rwodhe mar'adec je olwoŋi jo i kalima me.

⁴I kalima me, kere onyutho ŋono ma ŋaŋo ma ker pere je ma dwe aucel.

⁵Munyo kalima madwoŋ orumo, kere otimo ri ji je kalima man kendo gi diedipo pere i tindi madwoŋ Susa. Kalima me oriwo jocandi kodi joŋaŋo kanyacel; aka ocowo ndelo ario.

⁶Diedipo oloki maŋon gi nangin ma famba manyabululu kodi matar m'otwey gi law manyarangi ariŋo gi peta ma feza i tele ma pilin maŋon. Okethi kacemo pa wendo m'otimi gi zahabu gi feza i diedipo m'oyido oum gi telin ma pilin maŋon.

⁷Ŋecin pa kere jopoko medho iy'agwatin m'ocwey gi zahabu. Kisi agwata oyido opokere kwoŋ wadi. Kere oyeyo nyatoro je madho vini ma go won bende madho paka nyatoro won oyenyo.

⁸Kere omiyo ŋecin pere cik ni, “Ongoye geŋo nyatoro moro je medho, to kisi ŋata mito vini womedi go paka go mito.”

⁹I waŋceŋ acel no, Vasiti, nyamicala bende oyido otimo kalima ri mon je peco pa kere.

¹⁰I ndelo mar'abirio ma kalima mar'ario, munyo kere ocowo madho vini to ero yodirok, go olwoŋo wasemeli abirio ma jolur m'oyido jobedo ŋecin pere; nyingi jo obedo; Mehuman, Bizitha, Habona, Bigitha, Abagitha, Zethar, kodi Kokas.

¹¹Kere ooro jo ni jowokidhi jowokwaŋ Vasiti nyamicala wobin bongi kere kareno Vasiti oruko sangaria pere.[1] Ato Vasiti oyido obedo dhako ma dhiaŋ onaŋo waŋe, aka kere oyido mito nyutho wendo pere ma jowok i piny m'opokere opokere ŋono pa Vasiti.

¹²Munyo ŋecin pa kere jowaco ri Vasiti nyamicala wac ma kere ooro gine jo, go okwero. Gime oduwo cuny kere swa to mako nge.

¹³Paka oyido obedo tim pa kere, go openjo jomic rieko pere i thenge ma cik gi thenethene ma piny Pasia gir'atima.

¹⁴Jomic rieko me jobedo; Karsena, Sethar, Adimatha, Tarsis, Meres, Marsena kodi Memucan ma jowok i piny Pasia kodi Mediya. Cwo abirio me am'oyido jocore cegin gi kere; aka oyido jonitie gi dwoŋ ma malo i ker pa kere Aritakises.

¹⁵Kere openjo jo ni, “Aŋo ma cik waco ni ripo wotim ri Vasiti nyamicala, rupiri go okwero winjo cik paran munyo aoro ŋecin paran bonge?”

¹⁶To Memucan ay malo aka odwoko kere gi jodhum pere je ama, “Vasiti nyamicala k'ocayo kere kende; to go ocayo jodhum pa kere kiri gi ji je ma jonitie i ker me.”

¹⁷Memucan omedere waco ri kere ni, “Konon won me, mafodi piny k'oyutho, mon mawan ma piny Pasia gi Mediya jolawinjo ni Vasiti nyamicala ocayo kere, to jo bende jocako cayo cwogi jo. Mon je jolakwero bwonirok ri cwogi jo, aka cwo jobino mako nge gi mon pajo. Mon je ma ker perin ka jowinji gima Vasiti nyamicala otimo, jolacako cayo cwogi jo. Jobino waco ni, ‘Kole kere gipi olwoŋo Vasiti nyamicala, to Vasiti kwero.’

¹⁹Riameno, k'inen obedo mito pa kere, weyi cik wowoki i kom perin ma dhum; cik no wondiki i kitawo ma cik ma Pasia kodi Mediya m'odoko kilawire. Cik no wobedi ma riemo woko Vasiti ma doko go kilaneno ruwaŋ kere Aritakises; aka kiri dwoŋ pere je wotiŋ t'imiyo dhako man maloyo go gi kula.

²⁰Ka cik me ondiki, t'isoma iy'adec je ma ker perin, cwo je, ma jacandi kosa jaŋaŋo, dhako pere bino miyo wor.”

²¹Rieko me oyomo cuny kere gi jomic rieko pere, to kere timo paka Memucan owaco.

²²Kere ondiko balwin i dhodhok ma kisi nono ma waco ni, “Kisi jacwo moro je ripo bedo jadwoŋ ma peco pere, aka woluwi gi dwoŋ je.” Balwin me opok iy'adec je.