Read dhopadhola Esita 3 Bible Online

Esita 3 - dhopadhola bible

Esita 3

¹Munyo hongo moro okadho, kere omedo jadhum pere m'ilwoŋo ni Haman dwoŋ ma malo loyo jodhum wadi go je. Haman oyido obedo wod pa Hamedatha, aka nyakwar Agag.[4]

²Kere omiyo jodhum ma ker pere je cik ni joripo woro Haman. Joripo guro rigo congi jo to jobwonere ruwaŋ go. To Modekay okwero miyo Haman dwoŋ no.

³Wadi Modekay ma bende jobedo jodhum jopenjo go ni, “Raŋo ikwero luwo cik pa kere?”

⁴Kisi ndelo jotemo naŋo go, to go kwero winjo wac pajo. Modekay odwoko jo ni, “An abedo Jayuda; aka akinyali bwonirok ri Haman.” Wadi Modekay joosa go ri Haman kareno jomito neno k'adieri go ridho wac pere.

⁵Munyo Haman won bende oneno gi waŋe ni Modekay kiwor go aka kibwonere ruwaŋe, owinjo marac swa aka omako nge.

⁶Rumacen Haman oniaŋ ni Modekay obedo Jayuda. Riameno go k'omito neko Modekay kende, to cano reyo woko Joyuda je m'oyido jonitie i ker pa Aritakises.

⁷I oro mar'apar g'ario ma dhum pa kere Aritakises, i dwe marapena dwe m'ilwoŋo ni Nisan[5] Haman omiyo nonin man bolo kwir ma yero ndelo ma neko Joyuda. Munyo obol kwir no, oyer k'apar g'adek ma dwe mar'apar g'ario, dwe m'ilwoŋo ni Adar.[6] Kwir no ilwoŋo ni Purim.

⁸Ameno Haman okidho bongi kere Aritakises, aka owaco rigo ni, “Nitie nono ji ma jonitie i kisi adec ma ker perin me aka jopokere kwoŋ nonin man aka kiri cik pajo je opokere. Jome jokiluwi cik pa kere m'oyido kiber weyo jo medo kwo.

⁹K'inen obedo mito pa kere, ayere ketho kilo 340,000 ma feza i dero pesa pa kere. Miy cik ma waco ni jonono me je woneki jo.”

¹⁰Kere olunyo peta ma go oro ma ketho cinge i kisi ndiko wok i lwet cinge, aka omiyo Haman wod pa Hamedatha ma bende nyakwar Agag jakwor pa Joyuda.

¹¹Aka kere owaco ri Haman ni, “Pesa no aperin, aka ri nono no, tim gi jo gima cunyin mito.”

¹²Ameno k'apar g'adek, i dwe marapena, Haman olwoŋo jondiko pa kere je aka owaco rijo ndiko gima go waco rijo je i kisi dhodhok. Munyo jotieko ndiko, go oketho nyingi kere Aritakises gi peta pa kere aka opoko rwodhe, jotel, gi jodhum je ma kisi adec.

¹³T'ioro jomikwenda mayil yil poko balwin no i kisi adec. Ndiko me oyido miyo nonin man je cik reyo woko Joyuda je, mathindho gi madongo, mon gi nyithindho i ndelo acel, k'apar g'adek i dwe ma Adar; aka jowodoŋ gi lim pajo.

¹⁴Osoma ndiko me paka cik i kisi adec ŋey kisi nyatoro je woyikere ri ndelo no.

¹⁵Kere owodho or aka osoma cik me i tindi madwoŋ Susa. Oor jomikwenda mayil yil poko ndiko me i kisi adec. Kere gi Haman jobedo piny aka jocako madho vini, kucel nyawin ocakere i tindi madwoŋ Susa.