Read dhopadhola Esita 7 Bible Online

Esita 7 - dhopadhola bible

Esita 7

¹Ameno kere gi Haman jokadho i kalima pa Esita.

²Munyo jomadho vini i kalima mar'ario, kere doko openjo Esita ni, “Esita nyamicala, aŋo m'ikwayo? Abino miyin. Aŋo m'imito? Makada nende bedi ni adec ma ker paran, abino ketho i kare.”

³Cipa kere Esita odwoko ni, “K'inen kere winjo kodan maber, aka anwaŋo wor wok bongi kere, kwo paran am'akwayo, aka kwo pa ji paran am'amito.

⁴Otana an gi ji paran ŋey worey wan woko, woneki wan, aka wotoŋ wan. Kabedi nende oyido otana wan paka ŋecin nyaka, mon gi cwo, dinyo aliŋ m'ongoye wac m'owok i dhokan; to ongoye jakwor pa kere manyalo culo go i waŋ nyekirok me.”

⁵Kere Aritakises openjo Esita nyamicala ni, “Meno obedo ŋa? Nikune ŋat'ocano timo gime?”

⁶Esita odwoko ni, “Jakwor mawan, aka ŋat'odak wan obedo jacwo marac me Haman.” Haman obwok swa ruwaŋ kere gi nyamicala.

⁷Aka kere oay malo gi nge, oweyo vini pere to wok i diedipo ma peco pere. Kome Haman odoŋ cen ywak ri Esita wonyali botho kwo pere rupiri go oyido otieko niaŋ paka kere nyalo reyo go woko.

⁸I wickwot Haman oriere piny i tiendi Esita kama Esita oyido obedo cemo. Kenyo won ama kere bende odwoko wok i diedipo pere to donjo i ot kam'oyido jomedh'iye. Kere oywaki gi dwonde ma malo ni, “Imito cayo nyamicala gi peco paran ka, ruwaŋan won!” Mafodi wac k'opodho i dhok kere, ŋecin pa kere jotweyo waŋ Haman ma nyutho gike pere.

⁹Acel kwoŋ ŋecin pa kere ma lur m'ilwoŋo ni Harbona owaco ni, “Haman omedere kiri to geto kanek ma fut piero abirio g'abic i diedipo pere ma ŋawo Modekay, ŋat'obotho kwo pa kere ndir m'oyido imito neko kere.” To kere waco ni, “Ŋaw win go i kanek no.”

¹⁰Oŋaw Haman i kanek ma fut piero abirio g'abic to nyaka nge pa kere kwe.