Read dhopadhola Wok 12 Bible Online

Wok 12 - dhopadhola bible

Wok 12

¹Rwoth owaco ri Musa kodi Aron i piny Misir ni,

²“Dwe me bino bedo riwin, dwe marapena ma oro.

³Miy Joisiraili je cik me; k'apar ma dwe me, kisi jacwo ripo yero nyathi rombo kosa nyathi diel wok i ot pere.

⁴Ka peco pere thin ri nyathi rombo acel, jowopoki gi jager pere cungo kwoŋ welo ma ji kodi adec ma kisi nyatoro nyalo camo.

⁵Winyalo yero nyathi rombo kosa diel, to joripo bedo ma jokitwo, ma k'oŋol kosa waŋe k'otho.

⁶Aka othieno ma ndelo k'apar g'aŋwen ma dwe me, Joisiraili je jowothum ogwaŋe pajo.

⁷Jowokwany remo moro to joreyo i miango thigo kodi ruwaŋ dhiot ma udi m'ilacam'iye ogwaŋe no.

⁸Wor no riŋo wobul, t'icamo gi yen makec kodi mugat ma buthow.

⁹Wikiri wicam manumu, kosa m'otedi, to cami win je m'obul, kiri gi wic, tiende, kodi gigipiny ma iye.

¹⁰Wikiripi weyo kada mathin tundo odikin, ka man odoŋ, wiripo waŋo.

¹¹Wicam piyo munyo witieko rukirok ma woth, gi ware mewin i tiendi win kodi ludhe mewin i cingi win. Obedo kalima ma kadho ma miyan Rwoth, dwoŋ.”

¹²“Wor no abino wotho i lowo ma Misir, neko kisi okayo, ji g'ogwaŋe, kodi miyo werin ma Misir gir'acula. An abedo Rwoth.

¹³Remo bino bedo ranyuth ma nyutho udi mewin ma wibedo iye. K'aneno remo, abino kalo win m'akimiyo win litho k'amiyo Jomisir gir'acula.

¹⁴Wiripo poyo ndelo me, aka wikuri paka kalima pa Rwoth. Wiripo timo i luse mewin je paka cik i hongo je ma bino.”

¹⁵Rwoth owaco ni, “Ma ndelo abirio wiripo camo mugat ma buthow. I ndelo marapena wongoye thow ma wonwaŋere i udi mewin, kole ka nyatoro ocam mugat m'otimi gi thow i ndelo abirio no, k'okwanere paka acel kwoŋ ji paran kendo.

¹⁶I ndelo marapena kodi i ndelo mar'abirio wiripo romo lamo Rwoth. Wikiripi timo tic i ndelo abirio no, to winyalo tedo cemo.

¹⁷Poyi win kalima me, kwoŋbedo i ndelo me am'awodh'iye nonin mewin wok i Misir. I luse mewin je wiripo timo kalima me.

¹⁸Othieno ma k'apar g'aŋwen kiri othieno ma ka ndelo piero ario g'acel ma dwe marapena, wiripo camo mugat ma buthow.

¹⁹Ma ndelo abirio wongoye thow ma wonwaŋere i udi mewin, kole ka nyatoro, anywola mewin kosa japath, ocam mugat m'otimi gi thow, k'okwanere paka acel kwoŋ ji paran kendo.”

²⁰

²¹Kenyo Musa olwoŋo jotel ma Isiraili aka owaco rijo ni, “Kisi nyatoro kwoŋ win woyeri nyathi rombo kosa nyathi diel ma cwo, aka withum ŋey pecin mewin jowocami kalima ma kadho.

²²Kwany win cangwe, aka wirwaki i remo to wiwiro i miango ma thigo kodi ruwaŋ dhiot. Wongoye ŋata wowoki cuka piny oyawere.

²³Kole Rwoth bino wotho i Misir neko Jomisir, aka ka go onen remo i miango thigo kodi ruwaŋ dhiot, go k'owey Malaika ma Tho donjo i udi mewin.

²⁴Win kodi nyithindho mewin wiripo luwo cik me cil gi cil.

²⁵Aka ka witundo i lowo ma Rwoth omiy win paka ociko, wiripo timo kwer me.

²⁶Ka nyithindho mewin jopenji win ni, ‘Kwer me nyutho aŋo.’

²⁷Dwoki win jo ni, ‘Me cowirok ma Kalima ma Kadho ma miyo Rwoth dwoŋ, kwoŋbedo go okalo udi pa Joisiraili i Misir. Go oneko Jomisir to weyo wan.’ ” Joisiraili jokule piny to jolamo Rwoth.

²⁸Kenyo jokidho to jotimo ameno, paka Rwoth oyido omiyo Musa gi Aron cik.

²⁹Sawa aucel ma wor, Rwoth oneko okayin i lowo ma Misir, wok kwoŋ okayo pa Farawo m'oyido obedo ma ripo lunjo ker, tundo kwoŋ okayo pa jajiera. Nyithindhi ogwaŋe makayo ma cwo je oneki.

³⁰Wor no Farawo, jodhum pere, kodi Jomisir je jocewi, aka obedo ywak madwoŋ i Misir rupiri oyido ongoye peco ma wod pajo k'otho.

³¹Aka wor no Farawo olwoŋo Musa gi Aron to waco ni, “Ay win wieye i piny paran, kiri gi Joisiraili; kadhi wilam Rwoth paka wiwaco.

³²Kwany win rombo mewin, diegi, kodi dhok mewin wikadhi. Kway ran win bende silwany.”

³³Jomisir joywak gi Joisiraili jowoeye woko i piny pajo. Jowaco ni, “Ka wikikadho, wajoje wabino tho.”

³⁴Ameno ji jotiŋo atewe pajo, ŋano ma buthow, aka jotweyo i nangin pajo to jotiŋo i badi gin.

³⁵Joisiraili bende oyido jotimo paka Musa owaco rijo, kole jokwayo Jomisir thiwino m'otimi gi Zahabu gi feza kodi nangin.

³⁶Rwoth omiyo Jomisir lworo Joisiraili to jomiyo jo gima jokwayo. I nger me Joisiraili jotiŋo lim pa Jomisir.

³⁷Aka Joisiraili jowotho wok i Rameses kidho Sukoth. Oyido joromo cwo 600,000 m'ikikwano mon gi nyithindho.

³⁸Aka ji kweth man, rombo kweth, diegi, kodi dhok bende jokadho gi jo.

³⁹Jotedo ŋano pajo ma buthow m'oyido jowok gine wok i Misir, kwoŋbedo oriem jo wok i Misir abwap ma jok'onyalo bedo gi hongo ma tedo cemo pajo kosa tedo mugat ma thwo.

⁴⁰Joisiraili jobedo i Misir ma oro 430.

⁴¹I ndelo macowe ma oro 430 mere, nonin pa ji pa Rwoth je joeye i Misir.

⁴²Obedo wor ma Rwoth okuro jo munyo wodho jo wok i Misir; wor acel me Joisiraili jomiyo ri Rwoth i luse pajo je aka joripo poyo.

⁴³Rwoth owaco ri Musa gi Aron ni, “Me cik ma mako kwoŋ kalima ma kadho; wongoye japath ma wocam cemo mere,

⁴⁴to ŋeca ma winyewo nyalo camo nyaka ka withumo go kende.

⁴⁵Wongoye jawoth, kosa jatic m'opangisa ma wocam cemo mere.

⁴⁶Cemo je iripo camo i ot m'oted'iye, kiripi wodho woko. Aka wikiri wimwodi cokin mere.

⁴⁷Joisiraili je joripo timo kalima me,

⁴⁸to wongoye jacwo ma k'othumere ma wocam. Ka japath moro bedo i dier win aka mito timo kalima ma miyo Rwoth dwoŋ, kutho wiripo thumo cwo je ma ot pere. Nyaka go bino kwanirok paka acel kwoŋ anywola ma Isiraili to bende riwere i kalima me.

⁴⁹Cik acel bende ri anywola ma Isiraili kodi jopath ma jobedi i dier win.”

⁵⁰Joisiraili jowinjo aka jotimo paka Rwoth omiyo Musa gi Aron cik.

⁵¹Aka i ndelo no won Rwoth owodho nonin ma Isiraili wok i Misir.