Read dhopadhola Wok 13 Bible Online

Wok 13 - dhopadhola bible

Wok 13

¹Rwoth owaco ri Musa ni,

²“Kethi ran gicen nyithindho makayo, kole kisi okayo pa Joisiraili kodi apa ogwaŋe jobedo aparan.”

³Aka Musa owaco ri ji ni, “Poyi win ndelo ma wiwok'iye i Misir kam'oyido wibedo ŋecin. Me ndelo ma Rwoth owodho win gi meni pere madwoŋ. Wikiripi camo mugat m'otimi gi thow.

⁴Wiwok i Misir i ndelo me, i dwe mar'acel, dwe ma Abib.

⁵Aka ka Rwoth okeli win i lowo pa Jokanan, Johiti, Joamor, Johivi, kodi Joyebus, lowo ma mol gi cak kodi mo kic, ma go ociko kwarere mewin nike bino miyo win, wiripo timo kalima me i dwe mar'acel kisi oro.

⁶Ma ndelo abirio wiripo camo mugat ma buthow, aka i ndelo mar'abirio wobedi kalima ma miyo Rwoth dwoŋ.

⁷Ma ndelo abirio wikiripi camo mugat m'otimi gi thow, aka wongoye thow kosa mugat m'otimi gi thow ma wonwaŋere iy'adec mewin.

⁸Aka wititi ri wot win i ndelo no nike witimo gime kwoŋbedo gima Rwoth otimo riwin munyo wiwok i Misir.

⁹Kalima me bino bedo rapoy, paka gim'otwey i cingi win kosa ruwaŋ win, bino poyo win medo waco cik pa Rwoth, kwoŋbedo Rwoth owodho win wok i Misir gi meni pere madwoŋ.

¹⁰Riameno wiripo timo kalima me i hongo mere kisi oro.”

¹¹“Aka ka Rwoth okeli win i lowo pa Jokanan, paka okwoŋere ri kwarere mewin to miyo win,

¹²wiripo miyo go okayin mewin kodi apa ogwaŋe. Kisi okayo mewin kodi apa ogwaŋe jobedo apa Rwoth.

¹³To wiripo wilo okayin pa punde mewin gi nyithindhi rombo ma cwo wok bongi Rwoth. Ka wikimiti wilo, tur win ŋuti gin. Wiripo bende nyewo okayin mewin.

¹⁴Comoro ka wot win jopenji win gima gime nyutho, dwoki win nike, gi meni madwoŋ Rwoth owodho wan wok i Misir kam'oyido wabedo ŋecin.

¹⁵Munyo Farawo okwero weyo wan kadho, Rwoth oneko kisi okayo i Misir, apa ji kiri g'ogwaŋe. Am'omiyo wamiyo Rwoth okayin mawan kiri gi apa ogwaŋe. To okayin mawan wanyewo jo.

¹⁶Gime bino bedo rapoy, paka gim'otwey i cingi wan kosa ruwaŋ wan, bino poyo wan nike Rwoth owodho wan wok i Misir gi meni pere madwoŋ.”

¹⁷Aka munyo Farawo oweyo Joisiraili kadho, Were k'otelo jo luwo gi yo ma kidho kiri i thengi Filistia makada nende oyido cek. Kole Were owaco ni, “Ji jonyalo wiro paro pajo gik i Misir ka joneni nike jokidho bedo gi lweny.”

¹⁸To Were otelo jo luwo gi thim ma Nam M'obokere. Aka Joisiraili oyido joyikere lwenyo.

¹⁹Aka Musa otiŋo cokin ma delkwoŋ Yozefu, paka Yozefu oyido ociko jo timo. Yozefu oyido owaco ni, “Ka Were obothi win, wiripo tiŋo cokin paran wok ka.”

²⁰Joisiraili joeye Sukoth to joketho kambi i Etham i thengi thim.

²¹Aka Rwoth otelo jo gi siro ma pondeponde odieceŋ nyutho jo yo, kodi siro ma mac wor miyo jo lero, ŋey jowonyal woth wor gi odieceŋ.

²²Siro ma pondeponde oyido bedo yuwiy gin odieceŋ, aka siro ma mac bedo wor.