Read dhopadhola Wok 15 Bible Online

Wok 15 - dhopadhola bible

Wok 15

¹Kenyo Musa gi Joisiraili jowero ri Rwoth wer me. “Abino wero ri Rwoth kwoŋbedo olimo loyo madwoŋ, obolo kayinin gi jogwey i nam.

²Rwoth a meni paran aka wer paran, go ama obothan Me Were paran, aka abino pako go, go Were pa baba, aka abino wero dwoŋ pere.

³Rwoth obedo jalweny, Rwoth meno nyingi go.”

⁴“Obolo cawilin gi jolweny pa Farawo i nam, aka jomituka pere ma jober loyo jomunyere i nam.

⁵Lutho ma nam oumo jo, jomunyere i lutho pa tele.”

⁶“Rwoth, cingin maracuc, dwoŋ i meni, turo jokwor mathindho thindho.

⁷I meni perin madwoŋ ikengila jokwor perin; nge perin liel to waŋo jo pa kanja.

⁸Ikudho nam to pi cokere malo, ocungo tirtir pa kor ot, lutho ma nam olokere matek.

⁹Jakwor owaco ni, ‘Abino riemo jo t'amako jo, abino poko lim pajo t'atero m'ayenyo je; Abino celo abor paran, aka cingan bino reyo jo.’

¹⁰To gi kudho ma koyo, nam oumo jo, jomunyere pa got i pi ma tula.”

¹¹“Rwoth, ŋa ma calin, kwoŋ werin je? Ŋa ma calin, itek loyo joje? Ŋa manyalo timo gir'aura gi tim madongo paka aperin?

¹²Irieyo cingin maracuc, aka piny omwonyo jokwor mawan.

¹³Gi mar perin makiwire, itelo ji ma ibotho, gi meni perin inyutho jo yo ma kidho i lowo perin maleŋ.

¹⁴Nonin jowinjo, aka jokirin gi lworo, Jofilistia jopoŋ gi lworo.

¹⁵Jotel ma Edom jobwok swa, cwo matek i Mowab jokirin, ji ma Kanan jongoye gi miseni.

¹⁶Jopoŋ gi lworo aka jokirin. Joneno meni perin, a Rwoth, aka jocungo m'ongoye kony gi lworo cuka ji perin joŋanjo jokadho, ji ma ibotho bedo ŋecin.

¹⁷Ikelo jo to ipidho jo i got perin, kabedo ma in, Rwoth, itieko yero bedo peco perin, ot ma lamo ma in won igeto.

¹⁸Rwoth bino dhumo cil gi cil.”

¹⁹Joisiraili joluwo i nam i lowo m'othwo. To munyo cawilin pa Farawo, jogwey kayinin kodi kayinin jodonjo i nam, Rwoth odwoko pi to umo jo.

²⁰Kenyo Miriam, jatuci wac Were madhako, okwanyo seke pere, aka mon man bende joluwo go ka jogoyo seke aka jomielo.

²¹Miriam owero rijo, “Wer ri Rwoth, kwoŋbedo olimo loyo madwoŋ, obolo kayinin gi jogwey i nam.”

²²Kenyo Musa otelo Joisiraili wok i Nam M'obokere kidho i thim ma Sur. Ma ndelo adek jowotho i thim, to jok'onwaŋo pi.

²³Munyo jotundo Mara, jok'onyalo madho pi ma kenyo kwoŋbedo oyido kec, aka am'omiyo ocwoki ni Mara.[3]

²⁴Ji jogeŋisa ri Musa aka jopenjo ni, “Aŋo ma wakidho madho?”

²⁵Musa oywaki ri Rwoth, aka Rwoth onyutho go yath m'obolo i pi to pi lokere mamit. Kenyo Rwoth omiyo jo or ma nger ma kwo, aka bende otemo jo

²⁶ka waco ni, “Ka winowinjan kicutho gi timo gim'atero ni otire kodi luwo or paran, akibino miyo win gir'acula ma two m'akelo kwoŋ Jomisir. An abedo Rwoth ma botho two mewin.”

²⁷Kenyo jotundo i Elim kam'oyido nitie iye waŋ pi apar g'ario, kodi yen thith piero abirio, aka joketho kenyo kambi cegin gi pi.